Փաստ ինֆո

2016թ․ Քառօրյա պատերազմում ժողովուրդը հաղթեց, իշխանությունը պարտվեց, 2020թ․ ժողովուրդն էլ պարտվեց, իշխանությունն էլ։ 5 տարվա մեջ տեղի ունեցած երկու պատերազմները համեմատելով՝ այսպիսի եզրահանգման է եկել արցախյան պատերազմի առաջին հրամանատար, գնդապետ Արկադի Կարապետյանը (Արկո)։

2016 թվականը թեստավորում էր․ թշնամին իմացավ մեր տրամադրությունները, թե դեպի ներքև ազատ թռիչքի մեջ որտեղ ենք հասել ու ըստ այդմ էլ՝ հաշվարկել իր քայլերը։ 2020թ․ արդեն նրանք լուծեցին իրենց առջև դրած խնդիրը»,-«Փաստինֆո»-ի հետ զրույցում ասել է գնդապետը։

Մարտի դաշտում ունեցած անհաջողությունների գլխավոր պատճառը, ըստ հրամանատարի, գաղափախարոսության բացակայությունն է, առանց որի կշարունակենք պարտվել ու ավելի շատ կորուստներ տալ։

«Մեր խնդիրներից մեկն այն է, որ մտածում ենք, թե Աստված, բարոյականությունը, գաղափարախոսությունը, կարճ ասած՝ բարձր արժեքները վերացական բաներ են, բայց այդպես չէ։ Զինվորը պետք է իմանա, թե ինչ համար է կռվում։ Եթե նրա համար արժեքը փողն է, չի կռվելու, փախչելու է»-ասել է հրամանատարը՝ վստահեցնելով, որ բարոյականության բացակայության դեպքում չենք կարող նաև նյութապես լավ ապրել։
Ազատամարտիկի արձանագրմամբ՝ գաղափարախոսությունը շատ կարևոր ու ընդգրկուն թեմա է, որի շուրջ ժամերով կարելի է խոսել, բայց, եթե փորձենք կարճ ձևակերպել, ապա պետք է, նախևառաջ, ֆիքսենք՝ գաղափարախոսության սկիզբը կարող է դառնալ ազգովի բանակաշինության և պաշտպանության գործի մեջ ներգավվելը։

Գաղափարախոսության, ազգային նպատակների ձևավորման հարցում դպրոցների դերը Կարապետյանը շատ է կարևորում է․ կրթական ներկա մոդելը, ըստ նրա, ոչ մի կերպ չի նպաստում դրան, հակառակը՝ թույլ չի տալիս, որ ձևավորվի կարգապահ, նպատակասլաց քաղաքացի․

«Մենք պիտի նպատակ ունենանք թե՛ որպես անհատ, թե՛՝ որպես ազգի ներկայացուցիչ։ Պետք է նաև նպատակին հասնելու ձևերն իմանանք։ Պետք է հասկանանք՝ ուզում ենք ապրել ստրուկի՞ պես, թե՞ այնպես, որ մեր երկրում մեր կամքը լինի։ Կրթությունն ու դաստիարակությունն այստեղ առանցքային նշանակություն ունեն ․ զինվորը պետք է կարգապահ լինի։ Եթե չկա կարգապահություն, չկա բանակ»։

Խաղաղության քարոզները հրամանատարն ընդամենը խաբկանք է համարում։ Ասում է՝ նման պատրանքներ պետք չի ունենալ, փոխարենը՝ պետք է պատրաստ լինենք պատերազմելու։ Այն, որ հիմա քաղաքակրթությունների պայքար է, և ոչ մի տեղ ժողովրդավարական արժեքները չեն հաղթում, հրամանատարն ավելի քան վստահ է․

«Մենք ուզում ենք խաբված լինել, ուզում ենք մտածել, թե աշխարհը քաղաքակիրթ է, 21-րդ դարում ժողովրդավարության համար մեզ ավելի շատ հաց են տալու։ Այդ դեպքում ինչպե՞ս է ստացվել, որ ոչ քաղաքակիրթ, բռնապետ, ագրեսոր Ադրբեջանը հաղթել է մեզ, ավելին՝ ժողովրդավարական արժեքներ քարոզող Անգլիան այսօր ևս կանգնած է նրա կողքին։ Ժողովրդավարությունը խաբկանք է, չկա նման բան»։

Պատերազմի բովով անցած հրամանատարը զարմանում է, թե ինչպես կարելի է խոսել մեկի հետ խաղաղություն հաստատելու մասին, ով ամեն օր իր գործողություններով հասկացնում է, որ խաղաղություն չի ուզում, հակառակը՝ ուզում է քեզ վերացնել։

Աղբյուր` Փաստինֆո