Փաստ ինֆո

Փետրվարի 13-ին անչափահաս աղջիկները մտել էին Վանաձորում գործող սուպերմարկետներից մեկը և քաղցրավենիք գողացել։ Խանութի մենեջերը նկատելով նրանց, բռնի ուժով տարել և աղջիկներին փակել էր սուպերմարկետի պահեստում։ Տնօրենն ու մենեջերը որոշել էին աղջիկների ծնողներից կոպեկներ արժեցող քաղցրավենիքի դիմաց պահանջել 1000 դոլար՝ ոստիկանություն չհայտնելու և նրանց երեխաների մասին արատավորող տեղեկություններ չտարածելու համար: Անչափահասների մայրերը համաձայնվել էին ամսական 100.000 դրամ վճարելով՝ պարտքից դուրս գալ։ 30-ամյա մենեջերը պարբերաբար զանգում էր կանանց և փողը պահանջում։ Վերջիններս էլ այլ ելք չունենալով դիմել էին ոստիկանություն։ Համագործակցված աշխատանքներից հետո ոստիկանությունը խանութպանների մոտից հայտնաբերեց ոչ միայն գումարը, այլ նաև մոխրանման հետքերով կաթուցիչներ, գաղտնի փականով դանակ և ծխախոտի տուփ, որի մեջ մարիխուանայի նմանվող զանգվածով փաթեթ էր։ Այլ ուշագրավ մանրամաներ է հաղորդում ՀՀ ոստիկանությունը։

«Մարտի 4-ին ոստիկանության Բազումի բաժնում շորթման վերաբերյալ օպերատիվ տվյալներ էին ստացվել, որ քաղաքի սուպերմարկետներից մեկի 30-ամյա մենեջերը փետրվարի 13-ին բռնել էր խանութից քաղցրավենիք գողացած անչափահաս աղջիկների, բռնություն գործադրելով տարել սուպերմարկետի պահեստ և ապօրինի զրկելով ազատությունից՝ նրանց կամքին հակառակ պահել էր այնտեղ։  

Տղամարդը զանգել ու կանչել էր անչափահասների մայրերին։ Նրանցից պահանջել էր 1000 դոլար՝ ոստիկանություն չհայտնելու և նրանց երեխաների մասին արատավորող տեղեկություններ չտարածելու համար:

Կանայք հայտնել էին, որ սոցիալական ծանր վիճակում են, ապա համաձայնության էին եկել, որ յուրաքանչյուրը մենեջերին ամսական մաս-մաս կվճարի 100 000 դրամ: Օպերատիվ տեղեկություններ էին ստացվել նաև, որ 30-ամյա մենեջերը պարբերաբար զանգում էր կանանց և փողը պահանջում։

Բազումի բաժնի ծառայողները, համագործակցեցին ոստիկանության Լոռու մարզային ու փորձաքրեագիտական վարչությունների ծառայողների հետ։

Մարտի 4-ին Վանաձոր քաղաքի Տիգրան Մեծի պողոտայում կանանցից մեկը փորձագետների կողմից նախապես մշակված 60 հազար դրամը փոխանցել է սուպերմարկետի 29-ամյա տնօրենին:

Ձեռնարկված օպերատիվ-հետախուզական միջոցառման արդյունքում սուպերմարկետի տնօրենն ու նրա հայրը բերման են ենթարկվել ոստիկանության Բազումի բաժին: Վանաձորի Շինարարների փողոցում հայտնաբերվել և բերման է ենթարկվել նաև մենեջերը:

Տնօրենի անձնական խուզարկությամբ, ուլտրամանուշակագույն լույսի կիրառման արդյունքում, նրա ձեռքերի և հագուստի վրա հայտնաբերվել են քիմիական փոշու հետքեր:

Մենեջերի անձնական խուզարկությամբ հայտնաբերվել են մոխրանման հետքերով կաթուցիչներ, գաղտնի փականով դանակ և ծխախոտի տուփ, որի մեջ մարիխուանայի նմանվող զանգվածով փաթեթ էր։ «Մերսեդեսի» խուզարկությամբ հայտնաբերվել է «շորթում» գրառմամբ 60 հազար դրամը։

Հարուցված քրեական գործի նախաքննությունը շարունակվում է»,-ասված է հաղորդագրության մեջ։

Աղբյուր` Փաստինֆո