Փաստ ինֆո

Վարչապետ Նիկոլ Փաշինյանը ֆեյսբուքյան էջում տեղեկացրել է, որ դեկտեմբերի 24-ին ֆեյսբուքյան էջի ուղիղ եթերում պատասխանելու է լրատվամիջոցների և հասարակական կազմակերպությունների հարցերին:

Այսպիսի ֆորմատով Փաշինյանը երկրորդ անգամ է պատրաստվում պատասխանել նախապես ուղարկված հարցերին։

Վարչապետի այս գրառումը մեծ արձագանք է ստացել քաղաքացիների շրջանում, որոնք մեկնաբանություններում մի քանի կարևոր թեմաներ են բարձրաձայնել, քանի որ չունեն նրան անձամբ իրենց հարցերն ուղղելու հնարավորություն։ Մասնավորապես՝ նրանց հուզում է սահմանների անվտանգությունը պահող պայմանագրայինների աշխատավարձերը, սահմանների կահավորման հարցը, թանկացումները։

Ֆեյսբուքյան օգտատեր Նաիրուհի Մեսրոպյանն, օրինակ՝ հետաքրքրվել է, թե ինչո՞ւ Փաշինյանը ցածր աշխատավարձ ստացող ԶՈՒ աշխատակիցների ու սպաների հարցերին չի ցանկանում պատասխանել։

«Իսկ կլինի մի օր, որ ասեք կպատասխանեմ ՀՀ ԶՈՒ աշխատակիցների հարցերին։ Մի օր լսեք սպաներին, կամ առհասարակ հարցնեք՝ «Հարգելի սպաներ, 250.000 դրամ աշխատավարձով ո՞նց եք ապրում, այն էլ երբ կես-կես եք ստանում»,- գրել է օգտատերը։

Արմինե Սարգսյանին ևս հետաքրքրում է սահմանում ծառայություն իրականացնող պայմանագրային զինծառայողների աշխատավարձերը։ Մանսավորապես, օգտատերը հարցրել է, թե ինչո՞ւ են պատգամավորները պարգևավճար և մեքենաներ նվեր ստանում, իսկ պայմանագրային զինծառայողների աշխատավարձը 140.000 դրամ է։

«Պոստեր հացը ջուրը ձիով ու էշով են տանում։ Պոստերին ուշադրություն դարձրեք։ Պալատկայի տակ զինվոր չեն պահում։ Այդ գումարները տրամադրեք պոստերը ամրապնդելուն»։

Քաղաքացիներից մեկն էլ Փաշինյանին հիշեցրել է, որ 2018 թվականին հայտնում էր, թե հեծանվով է պատրաստվում աշխատանքի գալ ու կատակել՝ «Փաստորեն 200.000 դոլարանոց հեծանվի մասին էր խոսքը»։

Օգտատեր Եսթեր Մխիթարյանը Փաշինյանին դիմելով նշել է՝ ամեն ինչ տասը անգամ թանկացրել է, միայն նվազագույն թոշակն է ավելացել, այն էլ չնչին կոպեկներով:

«Ե՞րբ է թոշակառուն իր թոշակով արժանապատիվ ծերություն վայելելու: Ոչ թե էդ տարիքում աշխատի, որ մի կերպ իր գոյությունը պաշտպանի: Կասե՛ք պատերազմից հետո փող չկա: Իսկ պատգամավորի աշխատավարձը 400000-ից 800000 դարձնելու համար բյուջեում փող կա՞: Երբ երկրում 40% աղքատութուն կա»,- հիշեցրել է ֆեյսբուքյան օգտատերը։

Նշենք, որ այս ֆորմատով սա Փաշինյանի երկրորդ հանդիպումն է։ Առաջին անգամ մի շարք ՀԿ-ներ ու լրատվամիջոցներ նշել էին, թե Փաշինյանը չի պատասխանել մի շարք կարևոր հարցերի։ Այս անգամ էլ մի շարք օգտատերեր կասկածի տակ են դրել Փաշինյանի ասելիքի էությունը. Պետո Սեֆիլյանը նկատել է, թե «եկել է բլցնելու ժամանակը», մեկ ուրիշն էլ ավելացրել, թե «հեքիաթն է կանչում», Սեւակ Ոսկանյանին էլ հետաքրքրել է, թե «հիմա ինչ է ոորշել խաբել»։

Սակայն հարցերի մեծ մասը վերաբերում է Փաշինյանի հեռանալու ժամկետներին ու հետաքրքրվում են, թե երբ է պատրաստվում նա հրաժարական տալ։ Գրիգորյան Գասպարյանը նշել է, որ «Ժողովրդի վարչապետը հեռացել է ժողովրդից», Սոֆա Համբարձումյանին հետաքրքրել է, թե «արդյոք նրան հեշտ է ապրել մի երկրում, որտեղ իրեն ատում են», մեկ ուրիշը՝ Սամվել Յանը, «խնդրել է հեռանալ ու հանգիստ թողնել Հայաստանը»։

Աղբյուր` Փաստինֆո