Փաստ ինֆո

Նոյեմբերի 9-ից հետո ստեղծված իրավիճակը թույլ է տալիս եզրակացնել, որ Ադրբեջանի իր պարտավորվածությունները չի կատարում, դեռ ավելին՝ սադրանքներ է իրականացնում Հայաստանի սահմանին, այդ սադրանքները խարխլում են խաղաղության այն վիճակը, որի մասին մենք մտածել էինք: ԱԺ արտաքին հարաբերությունների մշտական հանձնաժողովի արտահերթ նիստում ասաց «Հայաստան» խմբակցության ղեկավար Սեյրան Օհանյանը և շեշտեց, որ այս պայմաններում հապճեպ սահմանազատման և սահմանագծման գնալը հարված տակ կդնի Արցախի ճակատագիրը.

« Սա անթույլատրելի է, մենք խաղաղությանը, սահմանագծմանը և սահմանազատմանը դեմ չենք, բայց դրա համար պայմաններ պետք է լինեն»,-ասաց Օհանյանը:

«Հայաստան» խմբակցության ղեկավարը նաև հայտնեց, որ պահանջում են Աժ նիստ հրավիրել, որին պետք է ներկա լինեն նաև կառավարության անդամները և ներկայացնեն սահմաններին տիրող իրավիճակը.

«Մեր պահանջի մեջ նաև նշված է, որ ամեն ինչ պետք է իրականացվի Հայաստանի ու միջազգային համապատասխան օրենսդրական ընթացակարգերի համաձայն: Ոչ ոք չի կարող բանավոր կամ գրավոր ներկայացնել այնպիսի համաձայնություններ, որը կխախտի մեր Սահմանադրությունը», - ասաց Ս. Օհանյանը։

Սեյրան Օհանյանը հիշեցրեց Նիկոլ Փաշինյանի՝ խորհրդարանում արված հայտարարությունը, թե 2016 թվականին էլ հայտնի էր, որ Արցախն Ադրբեջանի կազմից դուրս բերելու որևէ հնարավորություն չկա և արձագանքեց Նիկոլ Փաշինայնին.

«Այդ դեպքում ինչո՞ւ էիք 2018 թվականին պնդում, որ «Արցախը Հայաստան է և վերջ» ու մնացած բոլոր այն միջոցառումները, որ իրականացվել է Արցախի տարածքում։ Այս ամենը խոսում է նրա մասին, որ գրավոր ու բանավոր համաձայնությունների միջև կան տարբերություններ», - ասաց նա:

Սեյրան Օհանյանը նաև ընդգծեց՝ սահմանագծման և սահմանազատման հարցում գործողություններ չպետք է խախտեն Արցախի ինքնիշխությունը և Արցախի բնակիչների՝ իրենց պատմական տարածքում ապրելու իրավունքը:

ՊՆ նախկին նախարարը նաև շեշտեց, որ արագ տեմպերով քալեր պետք է իրականացվեն բանակի վերականգման, անվտանգության համակարգի ձևավորման և սահմաններին պաշտպանության իրականացման ուղղությամբ:

Աղբյուր` Փաստինֆո