Փաստ ինֆո

Հայաստանում տեղի է ունեցել պատմական մասշտաբի աղետ, մեր հազարավոր հերոսների արյան գնով ձեռք բերված հաղթանակը ուղղակի նվիրվեց թշնամուն: Այս մասին «Պատերազմի քննիչ հանձնաժողովի անհրաժեշտությունը. հետպատերազմյան ապաքինում» թեմայով քննարկման ժամանակ հայտարարեց «Հայաստան» խմբակցության պատգամավոր Արթուր Ղազինյանը:

Պատգամավորը նշեց, որ 2020 թվականի նոյեմբերից հետո 6-7 հաղորդում է ներկայացվել՝ պետական դավաճանության հանցակազմով, նաև իշխանության լիազորությունների վերազանցման, տարածքային ամբողջականության դեմ ուղղված գործողությունների հիմքով, մինչդեռ որևէ քրեական գործ, ըստ էության, չի հարուցվել.

«Դատախազությունը հրաժարվեց քրեական գործեր հարուցելուց, դրանք ձևական հիմքով, «Քրեական դատավարության օրենսգրքի» կանոնակարգումների, ընթացակարգային կոպտագույն խախտումներով ուղարկեցին և կցեցին ինչ-որ մի քրեական գործի, որը, երևի մեկ երրորդով էր առնչվում այն դրվագների հետ, որոնք ներկայացված էին նշված հաղորդումներու»,-ասաց Արթուր Ղազինյանը և հավելեց, որ մինչ օրս որևէ առնաջընթաց չկա այս գործերի քննման ընթացքում:

Պատգամավորը հիշեցրեց , որ դեռևս հուլիսին իշխանությունը հայտարարել էր 44-օրյա պատերազմի հանգամանքները քննող հանձնաժողով ստեղծելու մասին,որը, Խազինայնի խոսքով՝ չունի խորքային հետաքննություն իրականացնելու լծակներ.

«Քննիչ հանձնաժողովների ստեղծումը հանդիսանում է ընդդիմության զինանոցում եղած գործիք, որով կարողանում է հակազդել իշխանության լծակներին, բայց այս անգամ իշխանությունն առաջ ընկավ: Լավագույն ցանկության պարագայում անգամ չեմ պատկերացնում, թե իշխանության այն կազմը, որը ներկայացված է հանձնաժողովում, ինչպե՞ս պետք է քննի որևէ լուրջ բան։ Ինչևէ, հանձնաժողովը կա և այն պետք է իրականացնի 44-օրյա պատերազմի հանգամանքների քննությունը, բայց արդեն 4-րդ ամիսն է մոտենում, և այդ ուղղությամբ որևէ գործողություն չի արվում»,- ասաց Ղազինյանը:

Պատգամավորը նկատեց, որ իշխանությունը տարբեր ճանապարհներով փորձում է չեզոքացնել ընդդիմության դերակատարումը հանձնաժողովում.

«Հիմա քննարկում են «արտախորհրդարանական հաճախորդների ակումբից» քննիչ հանձնաժողովը համալրելու և ընդդիմության ձեռքից ներկայացվածության մեկ քառորդ վերցնելու տարբերակը։Մեկ քառորդի պարագայում մենք կարող էինք պահանջել և ստանալ ցանկացած փաստաթուղթ, ցանկացած պաշտոնատար անձի ներկայությունն ապահովել, կաշկանդված չէինք հարցերի քանակով և խորությամբ, ըստ էության, հարցաքննությունը տեղի կունենար ընդդիմության 4 ներկայացուցիչների կողմից։ Եվ «հաճախորդների ակումբից» այս հանձնաժողովը համալրելու փորձերը խոսում են այն մասին, որ իշխանությունները չունեն վստահություն և համոզմունք, որ այս կազմով, որով պետք է լիներ հանձնաժողովը, կհաջողվի կոծկել, քողարկել, թաքցնել կամ առհասարակ փակել պատերազմում իրենց գործած հանցանքների էջը»,- ասաց «Հայաստան» խմբակցության պատգամավորը։

Ղազինյանը միևնույն ժամանակ նշեց, որ, առանց օրենսդրական փոփոխության իշխանությունը չի կարող արտախորհրդարանական ուժերին ներգրավել քննիչ հանձնաժողովի աշխատանքներում, ուստի առաջիկա քառօրյա նիստերին կներկայացնեն նոր նախագիծ, որով էլ կնախատեսեն արտախորհրդարանական ուժերի ներկայացվածությունը հանձնաժողովում:

Արթուր Ղազինյանը ընդգծեց, որ ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանն իրավունք չունի ղեկավարել քննիչ հանձնաժողովը.

«Նա պետք է հրավիրվի հանձնաժողով, նրան պետք է տրվեն հարցեր և նա պետք է խելոք պատասխանի հարցերին, ապա հանձնաժողովը պետք է եզրակացություն տա»,-ասաց պատգամավորը:

Աղբյուր` Փաստինֆո