Փաստ ինֆո

Ցանկացած դեպքում բանակցությունները միշտ ավելի լավ են, քան՝ պատերազմը: Սակայն բանակցություններից առաջ հայկական կողմը պետք է հստակ հայտարարի, որ անվերապահորեն պետք է լուծվի՝ Արցախի՝ Ադրբեջանի կողմից օկուպացրած տարածքների դեօկուպացիայի հարցը և Արցախի անկախության ներքո արցախահայերի ինքնորոշման հարցը:

«Փաստինֆո»-ի հետ զրույցում ասաց ԲՀԿ-ական նախկին պատգամավոր Արման Աբովյանը:

Ինչպես հայտնի է, Մինսկի խումբը վերսկսում է իր քննարկումները ԼՂ հակամարտության կարգավորման հարցում: Սպասվում է նաև համանախագահների այցը տարածաշրջան, այդ թվում՝ Լեռնային Ղարաբաղ։ Սակայն Ադրբեջանի նախագահն արդեն իսկ հայտարարում է, թե անգամ Լեռնային Ղարաբաղի ինքնավարության կարգավիճակի մասին խոսք լինել չի կարող եւ ինքը հարցը լուծել է ռազմական ճանապարհով։

Մեզ հետ զրույցում Արման Աբովյանը դրական գնահատեց Մինսկի խմբի աշխատանքների վերսկսումը՝ արձանագրելով, որ բանակցությունների ֆորմատն, իհարկե, կարևոր է, սակայն ավելի կարևոր է, թե ինչ փաստարկներով է հայկական կողմը գնում այդ բանակցություններին.

«Ադրբեջանն արդեն իր տեսակետն ասել է: Դա առաջին հերթին արցախյան 44-օրյա պատերազմի արդյունքի անվերապահ ընդունումն է Հայաստանի կողմից, բացի դա, Ալիևն արդեն հայտարարել է, որ Արցախում հայերի համար ինքնավարության մասին խոսք գնալ չի կարող, մինչդեռ մենք երբեք էլ չենք խոսել ինքնավարության մասին, մենք միշտ ասել ենք, որ Ադրբեջանը պարտավոր է ապահովել Արցախում բնակվող հայերի ինքնորոշման իրավունքի՝ առանց խոչընդոտ իրագործումը: Երբ մեր իշխանությունն ասում է, որ Հայաստանը հանդես է գալիս Արցախի ժողովրդի ինքնորոշման իրավունքի սկզբունքներից, ապա հայկական կողմը պետք է մաքիսիմալ բացի դա, որովհետև ինքնորոշումը բավականին ծավալուն հասկացություն է՝ ինքնավար մարզը Ադրբեջանի կազմում ևս կարող է դիտարկվել որպես ինքնորոշում: Հայկական կողմը բանակցություններից առաջ հստակ պետք է հայտարարի այն կարմիր գծերը, որոնք ինքը չի հատելու»,-ասաց Աբովյանը և ընդգծեց նաև, որ հակառակորդի կողմից հնչող ռազմական սպառնալիքների ներքո բանակցությունների ընթացքում խաղաղասիրությունից խոսելը ևս անթույլատրելի է, քանի, որ դա ավելի է մոտիկացնում արհավիրքը դեպի մեզ:

Նկատենք, որ վերջերս Ադրբեջանի ղեկավարը մի շարք հայտարարություններ է անում, որոնք հակասում են ԵԱՀԿ համանախագահ երկրների դիրքորոշմանը և կասկածի տակ է դնում Մինսկի խմբի մանդատը:

Արման Աբովյանը չբացառեց, որ Ադրբեջանը հնարավոր է հրաժարվի այլևս Մինսկի խմբի ֆորմատով բանակցություններից, բայցեւ ընդգծեց,որ այդ դեպքում պետք է առճակատման գնա Մինսկի խմբի համանախագահ պետությունների հետ, ինչի ռեսուրսն Ադրբեջանը չունի՝առանց Թուրքիայի աջակցության.

«Ադրբեջանը, լինելով հետպատերազմյան էյֆորիայի մեջ, մտքեր է արտահայտում, որոնք դժվար իրագործելի են: Մինսկի խմբի համանախագահ երկրները երեք գերպետություններ են, նրանց հետ առճակատվելու համար Ադրբեջանը չունի ո՛չ ռեսուրս, ո՛չ պոտենցիալ: Խնդիրն այն է, որ Ադրբեջանն ամեն կերպ փորձում է համոզել բոլորին, որ իր դիրքերը բանակցությունների ընթացքում հիմնվելու են հետևյալի վրա՝ թե Արցախի հարցն իբր լուծել են, և պետք է այդ իրողության հետ ողջ աշխարհը հաշվի նստի: Սա ոչ արդյունավետ է: Ադրբեջանն առայժմ չունի ինքնուրույն պոտենցիալ երեք պետության հետ առճակատման գնալու»,-ասաց Աբովյանը միևնույն ժամանակ ընդգծեց, որ աշխարհաքաղաքական շատ ուժեր, հատկապես՝ Թուրքիան, հնարավոր է դրդեն Ադրբեջանին, որ հրաժարվի Մինսկի խմբից.

«Նման հավանականություն կա, որ Ադրբեջանը Թուրքիայի աջակցությամբ հնարավոր է հրաժարվի Մինսկի խմբի ֆորմատով բանակցություններից կամ առաջարկի, որ որպես չորրորդ համանախագահ Թուրքիան ևս ընդգրկեն Մինսկի խմբի կազմում:

Պատերազմից հետո տարածաշրջանում նոր իրողություններ են ձևավորվել, որքան էլ Ադրբեջանը պատերազմից հետո փորձի իրեն ուժեղ ներկայացնել, իրենց դիրքերի մեջ են փոփոխություններ եղել»,-ասաց Արման Աբովյանը:

Աղբյուր` Փաստինֆո