Փաստ ինֆո

Սահմանազատման և սահմանագծման գործընթացը հայ-ադրբեջանական սահմանին անվտանգային որևէ խնդիր չի լուծի։ Այդ գաղափարը ներմուծվել է որպես կեղծ օրակարգ։ «Փաստինֆո»-ի հետ զրույցում ասաց անվտանգային հարցերով փորձագետ Արմեն Մանվելյանը։

Նշենք, որ ԱԽ քարտուղար Արմեն Գրիգորյանը հայտարարել էր, թե Հայաստանը պատրաստ է սահմանազատման և սահմանագծման, միևնույն ժամանակ նշել, որ սպասում են ադրբեջանական կողմի արձագանքին։

«Պատկերացնենք՝ սահմանագծված ու սահմանազատված ինչ-որ տարածք ունենք, նրանց թվում է, թե Ադրբեջանի կողմից այդ սահմանը երբեք չի՞ խախտվի։ Այսինքն՝ ադրբեջանցիները երբեք չե՞ն կրակի սահմանի մյուս կողմում գտնվող հայկական գյուղերի ու բնակավայրերի վրա։ Դա կեղծ օրակարգ ստեղծելու միտում ունի, քանի որ այդ գործընթացը ոչնչով չի նպաստում սահմանների անվտանգության խնդրին»,-նշեց փորձագետը։

Վերջինս նկատեց՝ երբ իշխանությունները խոսում են այդ մասին, հույս ունեն, որ սահմանագծումից և սահմանազատումից հետո հնարավոր է՝ ադրբեջանական զորքերը դուրս գան հայկական տարածքից, սակայն փորձագետը գտնում է, որ ադրբեջանցիները կամավոր ձևով հայկական տարածքից դուրս չեն գա։

Արմեն Մանվելյանը նշում է, որ ադրբեջանական զորքերը հայկական տարածք են մտել՝ որոշակի խնդիրներ լուծելու նպատակով, և այդ խնդիրը սահմանագծումն ու սահմանազատումը չէ.

«Իրենց խնդիրը Զանգեզուրի միջանցքի բացման գործընթացն է, որն Ադրբեջանի համար ռազմավարական նշանակություն ունի։ Եթե հայկական կողմը սահմանազատում ու սահմանագծում է անում այն քարտեզներով, որը մեզ Ադրբեջանն է դեմ տալիս, նշանակում է՝ հայկական կողմը համաձայն է զիջել Տավուշի և Արարատի անկլավները։ Ստացվում է՝ Հայաստանի սահմանների բացման և ապաշրջափակման մասին հայտարարություններ անողները Հայաստանը ներքին շրջափակման են տանում։ Քանի որ այդ դեպքում կփակվի Հայաստանից դեպի Վայոց ձոր, դեպի Սյունիք ճանապարհը, իսկ Տավուշի անկլավների զիջման դեպքում՝ Հայաստանից դեպի Վրաստան ճանապարհը»,-նշեց Արմեն Մանվելյանը։

Հարցին՝ արդյոք հայկական կողմն իր համար ընդունելի քարտեզ չունի՞, փորձագետը նշեց, որ հայկական ֆեյսբուքյան տիրույթում ժամանակ առ ժամանակ շրջանառության մեջ են լինում 20-ական, 30-ականների քարտեզներ, որտեղ Հայաստանի տարածքը մոտ 1000-1500 քմ ավելի մեծ էր, բայց դրանք հարցի լուծումներ չեն։ Արմեն Մանվելյանի կարծիքով՝ նույնիսկ եթե մեզ համար ընդունելի քարտեզներով գծենք սահմանը, դա անվտանգության ոչ մի խնդիր չի լուծի և չի մեղմի ադրբեջանական ագրեսիան։

«Հակառակը Ադրբեջանը ցանկացած սահմանագծված և սահմանազատված սահմանի վրայով հանգիստ կարող է անցնել ցանկացած պահի, կրակ բացել հայկական գյուղերի ուղղությամբ և այդ շրջանների մարդկանց կյանքը թունավորել, որ նրանք թողնեն ու հեռանան։ Խնդիրն այդ սահմանների մեջ չէ։ Խնդիրը պետության ղեկավարության կարողության մեջ է, որ կարողանան երկիրը պաշտպանել։ Նրանք փաստորեն ընդունում են ինչ-որ հարցեր լուծելու իրենց անկարողությունը և ասում՝ եկեք սահմանազատում ու սահմանագծում անենք և դա, իբր, թե ինչ-որ հարց է լուծում»,-հավելեց փորձագետը։

Աղբյուր` Փաստինֆո