Փաստ ինֆո

Նախընտրական մրցավազքի ավարտին մենք տեսնում ենք, որ հիմնական պայքարը ծավալվում է մի կողմից Հայաստանի վարչապետ պաշտոնակատարի՝ «Քաղաքացիական պայմանագիր» կուսակցության, մյուս կողմից՝ «Հայաստան» և «Պատիվ ունեմ» ընդդիմության դաշինքների ներկայացուցիչների միջև: Այս մասին հայտարարել է քաղաքագետ և վերլուծաբան Նիկոլայ Սպիրիդոնովը «Ինտեր Ակցիա» ընկերության կողմից կատարված սոցհարցման արդյունքները վերլուծելով:

Նրա փոխանցմամբ՝ Հայաստանում ընդդիմությունը վերջին շաբաթների ընթացքում շատ ակտիվ է աշխատում: «Ընդդիմությունը ուժեղացնում է իր ընտրական աջակցությունը և իրականացնում է շատ ակտիվ քարոզարշավ: Միևնույն ժամանակ, իշխանությունները չեն հետևում նոր զարգացումներին, մնում են անցյալում և հիմնականում հետապնդում են անցյալի ուրվականներին: Բայց միշտ չէ, որ հնարավոր է պայքարել անցյալի ուրվականների դեմ»,- ընդգծեց Սպիրիդոնովը:

Քաղաքագետի խոսքով՝ չնայած նախընտրական արշավը կարճ էր, բայց շատ հագեցած էր: Նա հավելեց, որ ինչպես նախորդ, այնպես էլ ընթացիկ հարցումների ժամանակ քաղաքացիները հաստատել են իրենց դժգոհությունը սոցիալական և ներկայիս անվտանգության իրավիճակից:

«Դժբախտաբար, աշնանային սրացումից հետո մայիսին տեղի ունեցավ ևս մեկ սրացում, և իշխանությունները ցույց չտվեցին քաղաքացիների անվտանգության մակարդակի բարձրացման հասկանալի ուղիներ, ինչպես նաև նրանց բարեկեցությունը բարելավելու ուղիներ: Հետևաբար, հայերն այս ընտրությունները ընկալում են որպես որոշակի փոփոխությունների շանս: Այս առումով ենթադրություն կա, որ մասնակցության ցուցանիշը կարող է բավականին բարձր լինել, ընտրողները մոտիվացված են տեղամասեր գնալ: Բացի այդ, բարձր մասնակցությունը նվազեցնում է կեղծիքների հավանականությունը: Կեղծիքների մեծ մասը իրականացվում է ցածր մասնակցության դեպքում», - բացատրեց Սպիրիդոնովը:

Քաղաքագետը նշեց, որ վերջին շրջանում ընդդիմության վարկանիշն աճել է: «Կարծում եմ՝ աճը տեղի է ունենում այն բանի շնորհիվ, որ շատ չկողմնորոշված քաղաքացիներ նախապատվությունը տալիս են ընդդիմությանը, որը ակտիվ քարոզչություն է իրականացնում: Ընդհանրապես, հայերը գոհ չեն իրենց ֆինանսական վիճակից և անվտանգության խնդիրներից: Ինձ թվում է, որ նրանք մտածում են ապագայի մասին, որը ցանկանում են տեսնել ավելի լավ և անվտանգ: Քաղաքացիները կասկածներ ունեն, որ ներկայիս իշխանությունները կկարողանան լուծել այդ խնդիրները»,- շեշտեց նա:

Սպիրիդոնովն ասաց, որ դժվար թե որևէ քաղաքական ուժ 50% -ից ավելի քվե հավաքելու շանսեր ունենա, բայց այդպիսի մեծամասնություն կարող է ձեռք բերել միավորված ընդդիմությունը:

«Ընտրություններից հետո մեծամասնություն կարող է ձևավորվել, բայց դժվար թե դա կարողանա անել մեկ քաղաքական ուժը: Ընտրողները պետք է հասկանան, որ այս ընտրությունները ճակատագրական են լինելու: Ընտրությունների արդյունքում կա՛մ Հայաստանը կմնա անցյալում, կա՛մ որոշ փոփոխություններ տեղի կունենան: Բայց յուրաքանչյուր ընտրող պետք է հասկանա, որ եթե ինքը չի գալիս ընտրություններին, ապա առանց նրա կարող է որոշվել երկրի ապագան: Հին հույն փիլիսոփա Արիստոտելը այն քաղաքացիներին, ովքեր չեն մասնակցում ընտրություններին, անվանում էր ապուշներ », - ասաց քաղաքագետը:

Սպիրիդոնովի խոսքով՝ չնայած այն բանին, որ չկողմնորոշված քաղաքացիների թիվը դեռ շատ մեծ է, այնուամենայնիվ դժվար թե որևէ կուսակցություն, որը, ըստ հարցումների, ձայների պակաս ունի, առաջ անցնի: Նրա կարծիքով, հիմնական պայքարը ծավալվելու է առաջատար քաղաքական ուժերի ներկայացուցիչների միջև:

Քաղաքագետը շեշտեց, որ երկրում լարվածություն կա, և, միգուցե, այս ամենը բախումների կհանգեցնի, մինչդեռ, նրա գնահատմամբ, ամբողջ աշխարհն այժմ նայում է Հայաստանին, և բոլոր հարցերը պետք է լուծվեն ժողովրդավարական ճանապարհով:

Ինչ վերաբերում է հարցման արդյունքների մասնատմանը, ըստ քաղաքագետի, ոչ բոլոր մարդիկ կարող են ընտրել կամ վստահել նույն թեկնածուին: «Ես հիմքեր չեմ տեսնում հարցումներին չվստահելու համար: Դրանք ճշգրտորեն արտացոլում են մարդկանց տրամադրությունը: Այնուամենայնիվ, պետք է հաշվի առնել, որ ընտրությունները անկանխատեսելի գործընթաց են: Ավելին, կլինի լռության մի օր, երբ քաղաքացիները կարող են վերանայել իրենց տեսակետը: Նույնիսկ քվեախցիկում մարդը կարող է վերանայել իր տեսակետը: Բայց, այնուամենայնիվ, մեծամասնությունը քվեարկում է այնպես, ինչպես նշել են հարցման մեջ»,-ասաց նա:

Ինչպես արդեն տեղեկացրել ենք՝ «Ինտեր Ակցիա» ընկերության կողմից իրականացված սոցիալական հարցումների համաձայն՝ ընտրություններում հաղթելու է ընդդիմությանը։

Խորհրդարանում ներկայացված լինելու հնարավորություն ունի 4 քաղաքական ուժ, իսկ ձայները կբաշխվեն հետեւյալ կերպ՝

«Քաղաքացիական պայմանագիր» 21.9 տոկոս

«Հայաստան» դաշինք 20.8 տոկոս

«Պատիվ ունեմ» դաշինք 12.2

ԲՀԿ 5.1 տոկոս

ԼՀԿ 3.1 տոկոս։

Աղբյուր` Փաստինֆո