Փաստ ինֆո

Երևանի ընդհանուր իրավասության դատարանը՝ դատավոր Վաչե Մարգարյանի նախագահությամբ, հեռացել է խորհրդակցական սենյակ՝ «Պատիվ ունեմ» դաշինքի պատգամավորի թեկնածու Ռուբեն Խլղաթյանի նկատմամբ կալանավորումը որպես խափանման միջոց ընտրելու մասին միջնորդության վերաբերյալ որոշում կայացելու։ Դատարանը համատեղ կարգով քննել է նաև Ռուբեն Խլղաթյանին ձերբակալելու որոշման դեմ փաստաբանների բողոքը: Այս մասին «Փաստինֆո»-ի հետ զրույցում հայտնեց փաստաբան Գայանե Պապոյանը:

Ինչպես արդեն տեղեկացրել ենք՝ Ռուբեն Խլղաթյանը ձերբակալվել է հունիսի 10-ին՝ ՀՀ քրեական օրենսգրքի 34-154.2-րդ հոդվածի երկրորդ մասի հատկանիշներով՝ ընտրակաշառք բաժանելու փորձի կասկածանքով։ Նրան ձերբակալելու որոշման դեմ բողոք է ներկայացվել, որն ի սկզբանե մակագրվել էր Արմավիրի մարզի ընդհանուր իրավասության դատարանի դատավոր Արթուր Ադամյանին, սակայն վերջինս ինքնաբացարկ է հայտնել՝ բավարարելով քննիչի միջնորդությունը, իսկ դատավոր Վահե Ջիվանյանը բարձրացրել է ընդդատության հարցը՝ բողոքը փոխանցելով Երևանի ընդհանուր իրավասության դատարանին, սակայն մինչ ձերբակալման իրավաչափության հարցը կքննարկվեր, վարույթ իրականացնող մարմինը շտապել է մեղադրանք առաջադրել Խլղաթյանին և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացնել դատարան: Նկատենք՝ թեև ձերբակալման իրավաչափության հարցը ենթակա է անհապաղ քննության, բողոքը քննության առարկա է դարձվել միայն երեկ երեկոյան՝ արդեն կալանավորման միջնորդության հետ համատեղ, իսկ դատական նիստը տևել է մինչև ուշ գիշեր:

Փաստաբան Գայանե Պապոյանը «Փաստինֆո»--ի հետ զրույցում հայտնեց, որ Ռուբեն Խլղաթյանին մեղադրանք է առաջադրվել ՀՀ քրեական օրենսգրքի 34-154,2-րդ հոդվածի 4-րդ մասի 1-ին և 2-րդ կետերով՝ մի խումբ անձանց կողմից ընտրակաշառք տալու փորձի հատկանիշներով, որն իրականացվել է երկու կամ ավելի անձի նկատմամբ: Փաստաբանի խոսքով՝ Ռուբեն Խլղաթյանն առաջադրված մեղադրանքը չի ընդունում, որևէ առնչություն չունի առաջադրված մեղադրանքի հետ: Ինչ վերաբերում է Խլղաթյանի մասնակցությամբ քննչական գործողություններին, փաստաբանը հայտնեց, որ նրա մասնակցությամբ առերես հարցաքննություն չի եղել, Խլղաթյանի դեմ չկա որևէ ցուցմունք: Մասնավորապես, վարույթ իրականացնող մարմինը ներկայացրել է մի քանի ցուցմունքներ, որոնցից որևէ մեկով նույնիսկ անուղղակի որևէ մատնանշում չկար, որը կարող էր հիմնավորել Խլղաթյանի առնչությունը՝ իրեն առաջադրված մեղադրանքին, որևէ փաստական հանգամանք չէր ներկայացվել:

Անդրադառնալով ձերբակալման իրավաչափության հարցի քննության ձգձգմանը՝ Պապոյանը նշեց, որ կարծում է՝ դա ի սկզբանե հատուկ էր արված, որովհետև պրակտիկայում չէր եղել նման դեպք, որ ձերբակալման իրավաչափության վերաբերյալ բողոքը քննարկվեր այդքան ուշ, առավել ևս, չէր եղել, որ ձերբակալման իրավաչափության վերաբերյալ բողոքն ընդդատությամբ ուղարկվեր: Ըստ պաշտպանի՝ նպատակը եղել է այնքան ձգձգելը, մինչև վարույթն իրականացնող մարմինը կալանավորման միջնորդություն կներկայացներ՝ ձերբակալման իրավաչափության հարցի հետ համատեղ քննարկման համար:

Նշենք, որ մինչև Ռուբեն Խլղաթյանին մեղադրանք կառաջադրվեր, դատախազությունը ԿԸՀ երկու միջնորդություն էր ներկայացրել՝ պատգամավորի թեկնածուի նկատմամբ քրեական հետապնդում իրականացնելու և նրան ազատությունից զրկելու վերաբերյալ համաձայնություն ստանալու մասին, ինչը ԿԸՀ-ի կողմից բավարարվել է: Փաստաբան Գայանե Պապոյանը հայտնեց, որ իրենք ևս ներկա են եղել ԿԸՀ նիստին, որը տևել է բավականին երկար՝ մոտ երկու ժամ: Նշենք, որ դատախազի կողմից ԿԸՀ ներկայացված միջնորդությամբ հղում է կատարվում ընտրական օրենսգրքի 90-րդ հոդվածի 5-րդ մասին, համաձայն որի՝ պատգամավորի թեկնածուի՝ մինչև պատգամավորի լիազորությունները ստանձնելն ընտրված պատգամավորի նկատմամբ քրեական հետապնդում կարող է հարուցվել միայն ԿԸՀ համաձայնությամբ, ինչից պարզ է դառնում, որ խոսքը վերաբերում է այն պատգամավգորի թեկնածուին, որն ընտրվել է, բայց դեռևս չի ստանձնել իր լիազորությունները: Նշված հարցը պաշտպանության կողմը բարձրացրել է նաև ԿԸՀ նիստի ընթացքում, որտեղ հանձնաժողովի անդամները ևս հայտնել են, որ խնդիր են տեսնում՝ դրույթի հակասական մեկնաբանության հետ կապված, սակայն, այդուհանդերձ, պրակտիկա են ձևավորել, որ դա վերաբերում է նաև այն թեկնածուներին, որոնք գտնվում են նախընտրական քարոզչության մեջ:

Փաստաբանի փոխանցմամբ՝ ԿԸՀ անդամների համար ևս վարույթի այս տեսակը նոր է և այն չի նախատեսում բողոքարկման ինստիտուտ, ստացվում է՝ եթե իրենք համաձայնություն չեն տալիս, վարույթն իրականացնող մարմինը որևէ գործողություն չի կարող կատարել: Այս համատեքստում ԿԸՀ-ն համաձայնություն է տվել՝ մեկնաբանելով, որ դատարան չէ և չի կարող որոշել՝ ներկայացված միջնորդությունների հիմքում ներկայացված փաստական տվյալները ճիշտ են, թե ոչ, այլ՝ ԿԸՀ-ն պարզապես չի առարկում, որ դատարանը քննի և որոշում կայացնի: Գայանե Պապոյանի խոսքով՝ ԿԸՀ անդամները ևս համաձայնեցին, որ այս պարագայում ձևական է դառնում ԿԸՀ դիմելը, համաձայնություն չտալու ինստիտուտն էլ առարկայազրկվում է և այդ առումով խնդիր կա: Այդուհանդերձ, ԿԸՀ-ն մեկնաբանել է, որ քրեական հետապնդում իրականացնելու և ազատությունից զրկելու համաձայնություն ստանալու միջնորդությունների վերաբերյալ որոշումների համար բողոքարկում նախատեսված չէ, ուստի, թեև օրենքը նախատեսում է, որ կարող են և համաձայնություն չտալ, ԿԸՀ-ն, վարույթն իրականացնող մարմնին փակուղի չմտցնելու համար, համաձայնություն է տվել՝ չառարկելով, որ դատարանը քննի:

Հիշեցնենք, որ9 մլն դրամի չափով առերևույթ ընտրակաշառք բաժանելու դեպքի առթիվ հարուցվել է քրեական գործ ՀՀ քրեական օրենսգրքի 34-154.2-րդ հոդվածի 2-րդ մասի հատկանշներով, որի շրջանակներում ձերբակալվել է Արմավիրի նախկին քաղաքապետ, «Պատիվ ունեմ» դաշինքի պատգամավորի թեկնածու Ռուբեն Խլղաթյանը և Գ. Պ.-ն։ Ըստ դատախազության տարածած պաշտոնական հաղորդագրության՝ ՀՀ ոստիկանության ծառայողների կողմից ձեռնարկված համատեղ միջոցառումների արդյունքում 2021թ. հունիսի 10-ին, ժամը 16։30-ին, Ջանֆիդա գյուղում գտնվող Գ. Պ.-ի տանը վերոնշյալ երկու անձինք բռնվել են 9.000.000 ՀՀ դրամ ընտրակաշառքի գումարի փոխանցման պահին։ Ընդ որում՝ ոստիկանության աշխատակիցներին տեսնելուն պես նրանք դուրս՝ դեպի տան բակ են նետել իրենց ձեռքում գտնվող՝ պոլիէթիլենային տոպրակով ընտրակաշառքի առարկա հանդիսացող գումարը, որ հայտնաբերվել և վերցվել է դեպքի վայրի զննությամբ։

Հեղինակ՝ Իզաբել Սահակյան

Աղբյուր` Փաստինֆո