Փաստ ինֆո

Պատերազմի ընթացքում ԱԱԾ-ն վարչապետին ժամը մեկ պաշտպանական շրջաններից յուրաքանչյուրում տեղի ունեցող իրավիճակի վերաբերյալ կոնկրետ տվյալներ է զեկուցել: Այդ տվյալները եղել են օբյեկտիվ և արտահայտել են տվյալ պահին տեղի ունեցող իրադարձությունների լիարժեք պատկերը։  Պետք է հասկանալ՝ ինչո՞ւ վարչապետը իրավիճակից բխող որոշումներ չի կայացրել: «Արմնյուզ» հեռուստաընկերության եթերում հայտարարել է ԱԱԾ տնօրենի նախկին պաշտոնակատար Միքայել Համբարձումյանը՝ ուղիղ հարցադրումով փորձելով հասկանալ, թե՝ երբ տեսնում էինք, որ պարտվում ենք, որևէ շանս չունենք, որևէ մեկը մեզ չէր աջակցում, ո՞ւմ վրա էինք հույս դնում, ինչո՞ւ էինք օր-օրի խորացնում մեր կորուստները։ Չէ՞ որ  խուճապ էր սկսվել, ամեն օր մենք ունենում էինք բազմաթիվ զոհեր և տեխնիկական կորուստներ: 

«Ես չեմ հիշում, որ մենք ունեցած լինենք մի իրավիճակ, որ մեզ մոտ հաջողություններ լինեն։ Վարչապետը պետք է տա այս հարցերի պատասխանները: Եթե վարչապետը չի պատասխանում այդ հարցին, ուրեմն ընտրություններից հետո ձևավորվելիք օպերատիվ-քննչական խմբի ղեկավարը կասի՝ ո՞րն էր պատերազմը չդադարեցնելու պատճառը։

Եթե մենք խոսում ենք միտումնավորության, դիտավորության մասին, դա միանշանակ պետական դավաճանություն է։ Ես փաստեր չունեմ, չեմ կարող միանշանակ ասել, որ դա միտումնավորության արդյունք է եղել: Պատերազմում պարտվել ենք ապիկարության, անշնորքության, վատ կազմակերպվածության պատճառով»,- ասել է Միքայել Համբարձումյանը:

ԱԱԾ նախկին ղեկավարի խոսքով՝ պատերազմի ընթացքում վարչապետն ուղիղ կապի մեջ է եղել ԳՇ-ի հետ.

«Երբ պատերազմի արդյունքների վերաբերյալ տվյալներ է ստացվել, և՛ մենք, և՛ ԳՇ-ն զեկուցել ենք ուղիղ վարչապետին: Այնպես չէ, որ վարչապետը ԱԱԾ-ի միջոցով է միայն հարաբերվել ԳՇ-ի և Օնիկ Գասպարյյանի հետ, ինքն ունեցել է ուղիղ կապ, հաճախ այցելել է Գլխավոր շտաբ՝աշխատանքները կոորդինացրել և ղեկավարել»,-հայտարարեց  Համբարձումյանը:

Աղբյուր` Փաստինֆո