Փաստ ինֆո

Ուզում են ձեզ մի զավեշտ պատմել, հենց այս պահին ընթանում է երկրորդ նախագահ Ռոբերտ Քոչարյանի մամուլի ասուլիսը: Այս մասին Ազգային Ժողովի նիստի ժամանակ ասաց «Իմ քայլը» խմբակցության պատգամավոր Վահագն Ալեքսանյանը:

Նա նշեց, որ չգիտի, թե որտեղ է ընթանում մամուլի ասուլիսը, և այդ մասին անգամ չգիտեն մի շարք լրատվամիջոցներ, որոնք Քոչարյանի կլանի նեղ ընտանեկան տիրույթում չեն տեղավորվում:

«Գիտեք թե ինչու՞ այդ լրատվամիջողները ասուլիսի վայրի մասին տեղյակ չեն: Քանի որ այն խրոնիկ վախը, որը ունի իրեն միակ տղամարդ հռչակած անձնավորությունը ազատ խոսքից, ենթադրում եմ, անհարմար հարցերից, որ եթե մի լրագրող իրեն հարցնի, թե ի վերջո Պողոս Պողոսյանը ինչպե՞ս սպանվեց, այդ վախը նրան թույլ չի տալիս կանգնել և լսել այն հարցերը որոնք տալիս են անկախ լրատվամիջոցները: Մի երկու օր առաջ էլ, մի հանդիպման ժամանակ ասել է, որ երկիրը մեխանիզմի նման պետք է աշխատի: Եվ սա ասել է մի մարդ, ում նախագահության օրոք Հայաստանում ժամացույցի պես աշխատած միակ մեխանիզմը քաղաքական սպանությունների մեխանիզմն էր, ժողովրդի ունեզրկման մեխանիզմն էր»,- շեշտեց Ալեքսանյանը՝ հավելելով, որ այլ մեխանիզմ Քոչարյանի պաշտոնավարման օրոք չի աշխատել:

«Ասում է, որ այս ընտրություններում հնարավոր են ընտրակեղծիքներ: Սա ասում է մի մարդ, ում նախագահության օրոք, Տավուշի բնակիչները կարող են պատմել, քանի քվեատուփ է դատարկվել գետը, քանի ընտրատուփ է փոխվել: Այս մարդը փորձում է մեզ նմանեցնել իրեն և մեզ վերագրել ընտրակեղծիքներ, սրանով իսկ փորձելով ալիբի ստեղծել հետագա հետընտրական իր պատկերացրած պրոցեսների համար: Ուզում եմ որպեսզի հստակ լինի գնահատականը, արձանագրել, որ ընտրակեղծիքների մեջ մեզ մեղադրելը չունի ոչ մի հիմք, բացի այն խրոնիկ վախից, որն իր մեջ ձևավորվել է, գալիք ջախջախիչ պարտությունից»,- եզրափակեց Ալեքսանյանը:

Աղբյուր` Փաստինֆո