Փաստ ինֆո

Ադրբեջանցիների տեղաշարժերը կանխատեսել էին՝ պայմանավորված եղանակային պայմանների բարելավմամբ։ «Փաստինֆո»-ի հետ զրույցում նման կարծիք է հայտնել տեղեկատվական անվտանգության փորձագետ, «Ռազմինֆո» մասնագիտացված կայքի համակարգող Կարեն Վրթանեսյանը։

«Նախ սա կապված է եղանակային պայմանների հետ. բարձր գոտում ձյունը հալվում է, հեշտ են տեղաշարժերը և ադրբեջանցիները փորձում են առաջ գալ՝ այդ թվում ՀՀ տարածքի հաշվին»,- նշել է Կարեն Վրթանեսյանը՝ ընդգծելով, որ ադրբեջանական կողմը դիրքերն առաջ տալուց բացի, ինչ որ պահի նաև առաջացել է ՀՀ տարածքում։

Ըստ նրա՝ այս թեման մի օր հասունանալու էր։

«Սա հետևանք է այն բանի, որ ՀՀ իշխանությունները պատերազմից հետո կարճ ժամանակամիջոցում մատը մատին չեն խփել ԶՈՒ մարտունակությունը վերականգնելու համար»,- արձանագրել է փորձագետն ու նկատել, որ մինչև օրս ոչինչ չի արվել կորցրած ռազմական ենթակառուցվածքները վերականգնելու, մատակարարման ճանապարհները, դիրքերի ամրաշինական աշխատանքները կատարելու համար ։
«Բնական է, որ ադրբեջանական կողմն այդ ամեն ինչը տեսնում է, որովհետև դա իր աչքի առաջ է և բնական է, որ դրանից օգտվելու էին, օգտվելու են այնքան ժամանակ՝ մինչև Հայաստանում նորմալ իշխանություն չլինի, որը իսկապես կզբաղվի, կաշխատի անվտանգության հարցերի վրա»։

Կ.Վրթանեսյանի կարծիքով՝ Հայաստանն ի վիճակի չէ իր՝ ներառյալ Արցախի անվտանգությունն ապահովել և պարզ է, որ այս իրավիճակում ադրբեջանցիներն ամեն հնարավորություն օգտագործելու են առաջ գալու համար. «Ամեն հնարավորություն օգտագործելու են, որ բարենպաստ դիրքեր զբաղեցնեն, այդ թվում նաև մեր հաշվին ու մենք պետք է հասկանանք, որ եթե մենք ուզում ենք պետություն լինենք, պետք է այս հարցերը լուծենք»։

ՊՆ-ն հայտարարել էր, թե ամրաշինական և ինժեներական մեծ ծավալի աշխատանք պետք է սկսեն, երբ եղանակային պայմանները բարելավվեն՝ Վրթանեսյանը նկատեց, որ ոչ մի ծավալի աշխատանք չի արվել։
«Նորմալ աշխատանք ոչ մի տեղ չի իրականացվել, խնդիրը դա է։ Աշխատանքները այն ծավալով չեն արվել, որը պետք է արվեր։ Մինչև հիմա շատ տեղերում զինվորականները վրաններում են, ճանապարհներ չկան, մատակարարում չկա, այդ մարդկանց նորմալ սնունդ չի հասցվում և այլն։ Այդ ամեն ինչը ադրբեջանցիներն ամեն օր տեսնում են, իրենք դիմացը կանգնած են։ Ինչպես է լինում, որ 50-100 մետր հեռավորության վրա ադրբեջանցիները մոդուլային դոմիկ են տեղադրել, իսկ հայկական կողմը չի արել։ 100 մետր այս կողմ ձյուն կա, 100 մետր այն կողմ ձյուն չկա՞»։

Վրթանեսյանը նշեց, որ ՊՆ-ն պետք է նախ և առաջ կատարի իր ուղիղ ֆունկցիան՝ պաշտպանի երկիրը։ Փորձագետի համոզմամբ մենք անընդհատ, ամեն օր, ամեն ժամ մտահոգվելու առիթ ունենք՝ իշխանությունները ի վիճակի չեն ուղիղ պարտականությունները կատարել, այն է՝ ապահովել ՀՀ տարածքային անձեռնմխելիությունը, քաղաքացիների անվտանգությունը։

Աղբյուր` Փաստինֆո