Փաստ ինֆո

Ես չէի պատկերացնում, որ 2018 թվականի հեղափոխությունը կարող էր այսպիսի հետևանքներ ունենալ: Այս մասին ՀՀ երրորդ նախագահ Սերժ Սարգսյանն ասաց « Իշխանություն» ֆիլմի ռեժիսոր և սցենարիստ Մհեր Մկրտչյանի հետ զրույցի ժամանակ։

ՀՀ երրորդ նախագահը նկատեց, որ նա հասկանում էր` այս շարժումը հակաաղարաբաղյան շարժում է, հասկանում էր նաև, որ մարդկանց տարիներով փորձում էին համոզել ու Հայաստանը չի զարգանում:

«Բայց, որ այսպիսի աղետ կարող էր լինել, ես չէի պատկերացնում: Ես հասկանում էի, որ եթե բանակցային գործընթացում գլխավոր բանակցողները փոխվեն, Ղարաբաղի խնդրի լուծումը գնալու է այլ ուղղությամբ: Ես այդպես էի կարծում», - ասաց Սարգսյանը:

Սարգսյանն անդրադառնալով 2018 թվականի հեղափոխության շարժմանն  ասաց, որ եթե որոշում կայացվեր ուժ կիրառելու, դա տեղի կունենար: Սակայն, սկզբնական շրջանում նման որոշում չի եղել:

«Մենք կարծում էինք, որ պետք է կիրառել նուրբ մոտեցում, որպեսզի հետո այդ շարժումը մարեր, նամանավանդ, որ նման փորձ մենք արդեն ունեինք: Օրինակ ` Էլեկտրիկ Երևանը, ՊՊԾ գնդի գրավումը: Ցանկացած պահի կարելի էր ուժ կիրառելով խնդիրը լուծել, բայց եթե մենք փորձեինք ուժ կիրառել ապրիլի 20-ից հետո, դա լուրջ հետևանքներ կունենար: Այնտեղ շատ կանայք և երեխաներ կային:

Եթե ես իմանայի, որ այսպես է լինելու, ես ցանկացած միջոց կկիրառեի, որպեսզի դա տեղի չունենա: Այն ժամանակ, ես հեռացա որ մարդիկ իրենց երազած երկիրը կառուցեն: Ես չէի կարող պատկերացնել նման խայտառակություն»,- նշեց ՀՀ երրորդ նախագահը:

Սարգսյանը նաև նշեց, որ այն ինչ տեղի է ունեցել 2018 թվականին Հայաստանում, տեղի է ունեցել դրսի մեծ ուժերի  աջակությամբ:

«Աջակցում էին այն ուժերը, որոնց պատկերացումները Հայաստանի զարգացման մասին չեն համընկնում մեր պատկերացումների հետ: Հիմա մեր դաշնակիցները և գործընկերները երեք տարբերակ ունեն սատարելու, կամ չսատարելու: Առաջինը, դա շնորհավորանքն է, որևէ այլ երկրում իշխանության եկած անձին, կամ քաղաքական ուժին: Երկրորդ տարբերակը` այդ երկրի արտաքին գերատեսչությունները հայտարարություն են անում, և երրորդը, երբ որ այդ երկրները ուղղորդում են կոնկրետ երկրում իրենց ազդեցության տակ գտնվող ուժերին կամ անձանց:

Ապրիլի 17-ից հետո, մենք ստացանք բազմաթիվ շնորհավորանքներ ` Ռուսաստանից, ԵԱՏՄ-ից և այլն: Նրանց շնորհավորանքները մի քիչ զգուշավոր հայտարարություններ էին: Մենք տեսանք որոշակի խնդիրներ, կապված իրենց կողմից ուղղորդվող ուժերի վարքագծերի հետ: Մի գուցե պատճառն այն էր, որ բոլորը տեսան մեր համառությունը Ղարաբաղի հարցի շուրջ»,- շեշտեց ՀՀ երրորդ նախագահը:

Սարգսյանն ասաց, որ մի գուցե նաև պատճառներից մեկը այն էր, որ մենք որոշեցինք անդամակցել ԵԱՏՄ-ին, դա արեցինք կամավոր, հաշվի առնելով մեր երկրի շահերը: «Այնուհետև մենք ԵՄ-ի հետ ստորագրեցինք համափարփակ համագործակցության պայմանագիր: Դա ողջունվել էր ԵԱՏՄ երկրների կողմից, բայց մի գուցե նստվածք կար»-, շեշտեց Սարգսյանը:

Աղբյուր` Փաստինֆո