Փաստ ինֆո

ՀՀ վարչապետ Նիկոլ Փաշինյանի ԱԺ ելույթն ամբողջությամբ նախընտրական էր։ Նա սկսել է նախընտրական քարոզարշավը։ «Փաստինֆո»-ի հետ զրույցի ժամանակ նման կարծիք արտահայտեց քաղտեխնոլոգ Արմեն Բադալյանը՝ անդրադառնալով ԱԺ-ում Նիկոլ Փաշինյանի ելույթին։

Նրա դիտարկմամբ՝ 2018 թվականից սկսած Նիկոլ Փաշինյանը բոլոր խնդիրների մեջ մեղադրում է այլ մարդկանց, քանի որ անձի անսխալականության սինդրոմով է տառապում. «Այդկերպ նա ցանկանում է ազատվել արցախյան պատերազմից և դրա ծանր հետևանքներից։ Այդ հետևանքների խնդիրը դնում է մյուս մարդկանց վրա, մասնավորապես անուղղակի կերպով մեղադրում է ՀՀ երկրորդ նախագահին և խոսքն այնպես է դասավորում, որ իրեն չկարողանան մեղադրեն ու դատի տան։ Ասում է, որ երկրորդ նախագահը Թուրքիայի գործակալ է, որովհետև իր ժամանակ ԱԺ նախագահ, ՀՀ վարչապետ են սպանել, բայց նախադասության շարադասությունն այնպես է անում, որ խուսափի անմիջականորեն մեղադրելուց»,-ասաց Արմեն Բադալյանը։

Մեղադրելուց բացի, քաղտեխնոլոգի խոսքով, վարչապետը նաև ազգայնականության բեմականացում է ցույց տալիս՝ հայտարարելով, որ Թուրքիան և Ադրբեջանը թշնամիներ են. «Նախկինում Ադրբեջանի ղեկավարը շատ ինտելիգենտ, կուլտուրական մարդ էր, իսկ հիմա դարձավ թշնամի, ինչն, իհարկե, ընտրությունների հետ է կապված։ Նա հասկանում է, որ իր թիմը գլոբալիստական գաղափարներով չի կարող ձայներ ստանալ, դրա համար հրահանգ է տվել, որ ազգային դիտարկվեն, բայց դա իրեն չի օգնելու»,-նշեց քաղտեխնոլոգը։

Հարցին՝ ստացվում է, որ նրանք Թուրքիայի և Ադրբեջանի հետ կապված իրենց գաղափարախոսությունը փոխու՞մ են, Արմեն Բադալյանը նկատեց՝ ընտրություններով պայմանավորված ժամանակավորապես փոխում են, բայց անմիջականորեն՝ ոչ. «Ընդամենը երկու օր առաջ Ադրբեջանի նախագահն անցավ այն հայտնի այգիով, որտեղ հայկական ռազմական տեխնիկան էր, զոհված զինվորների մոմե արձաններ, իսկ Հայաստանի իշխանությունները դրա հետ կապված ոչ մի բան չասաց։ Մինչդեռ ԱԺ-ում նախընտրական ելույթ ունեցավ և Ադրբեջանին հայտարարեց թշնամի երկիր, ինչպես նաև նշեց, որ Հայաստանն ու Արցախն ապագա ունեն, և այդ ապագան կապում է իր հետ»,-նշեց Արմեն Բադալյանը։

Ինչ վերաբերում է Նիկոլ Փաշինյանի ելույթի ժամանակ «Իմ քայլ»-ի պատգամավորների հոտնկայս ծափահարություններին, քաղտեխնոլոգը հիշեց, որ երբ 2018թ.-ին այդ թիմն իշխանության եկավ, արժեքների հեղափոխությունից էին խոսում, այնինչ իրականությունը ցույց տվեց, որ իրենց մոտ անձի պաշտամունքն ավելի շատ է զարգացած, քան նախորդ նախագահների ղեկավարման շրջանում։

«Նման բուռն, հոտնկայս ծափահարությունը, հատկապես նման երիտասարդների կողմից, ցույց է տալիս, որ նրանց արժեքային համակարգն ամբողջովին խեղաթյուրվել է։ Նախկինում այդպես բուռն ու երկարատև ծափահարություններով չէին ողջունում ղեկավարներին, այդպես լինում էր 30-ական, 70-ական թվականներին, սակայն այն սերունդը, որն այսօր ծափահարում էր, այդ թվականների սերունդը չէ։ Նրանք անկախության սերունդ են, և այս քայլը ցույց տվեց, որ արժեքային համակարգով շատ ավելի հետադիմական են»,-նշեց Արմեն Բադալյանը։

Վերջինս ընդգծեց՝ եթե մյուս արտահերթ ընտրությունների մյուս մասնակիցները, ղեկավարները թույլ տան, որ հաղթի, ապա նա կհաղթի. «Այդ մասնակիցներից կախված է գրագետ ընտրարշավ անցկացնել։ Արդեն թող իրենք մտածեն՝ ինչպես անեն»։

Աղբյուր` Փաստինֆո