Փաստ ինֆո

Ես այդքան էլ չեմ վստահում Նիկոլ Փաշինյանի որոշմանը կամ խոստմանը։ Այս ընթացքում երկու անգամ էլ է ասել, որ արտահերթ ընտրություններ են լինելու։ Նրա խոսքը զրո արժեք ունի։ «Փաստինֆո»-ի հետ զրույցի ժամանակ այս մասին ասաց քաղաքագետ Հրանտ Մելիք-Շահնազարյանը։

Քաղաքագետը նկատեց՝ ՀՀ-ում ընտրություններ նշանակողը Նիկոլ Փաշինյանը չէ։ Կա հստակ ընթացակարգ, որով պետք է առաջնորդվել․ «Եթե ընտրություններ անցկացնելու որոշումը կար, պետք է երեկ հրաժարական ներկայացներ։ Նորմալ խորհրդարանական ընտրություններ անցկացնելու քաղաքական նախապայմանը Նիկոլ Փաշինյանի հրաժարականն է։ Եթե Նիկոլ Փաշինյանը մտածում է, որ ինքը կարող է ժամանակավոր պաշտոնակատար լինել և խորհրդարանական ընտրություններ անցկացնել, ապա ասեմ, որ դա իր օրակարգն է»,-ասաց քաղաքագետը՝ նշելով, որ ընդդիմությունը պետք է շարունակի պնդել իր պահանջները։

Հարցին՝ հնարավոր համարու՞մ է, որ վարչապետը պարզապես ընտրությունների օր է հայտարարել, որպեսզի ակցիաներ այլևս չլինեն, Հրանտ Մելիք-Շահնազարյանն ասաց, որ իր կարծիքով հիմնական խնդիրը հենց դա է․ «Նրա հայտարարության նպատակը քաղաքական օրակարգի շեղումն է։ Քննարկման դաշտ բերած հարցն այս պահին մեր երկրի համար մեկ խնդիրը չէ, որովհետև Հայաստանը կենսական նշանակության մարտահրավերների առջև է»,-նշեց Հրանտ Մելիք-Շահնազարյանը, ում կարծիքով արտահերթ ընտրությունների օրակարգ մտնելը Նիկոլ Փաշինյանի համար միակ շանսն է՝ մարդկանց շեղելու այն աղետալի կորուստներից, որ ունեցել ենք նրա պաշտոնավարմա ընթացքում։

Եթե այնուամենայնիվ ընտրություններն անցկացվեն, ապա քաղաքագետը գտնում է, որ դավաճանական թիմի կողմից իշխանության զավթում տեղի կունենա․ «Ակնհայտ է, որ ամեն ինչ անելու են, բոլոր վարչական ռեսուրսներն օգտագործելու են, բոլոր ապօրինություններին դիմելու են, որ զավթեն իշխանությունը»,-նշեց քաղաքագետը։

Վերջինս ընդգծեց՝ իշխանությունը զավթելու միջոցով Նիկոլ Փաշինյանը փորձելու է լեգիտիմացնել բոլոր այն կորուստները, որ ունեցել ենք Արցախում․ «Այսինքն ցույց է տալու, որ ժողովուրդը դեմ չէ նրան և նորից վստահության մանդատ է տալիս։ Դա լինելու է երկրորդ՝ ավելի հզոր հարվածը մեր պետությանը։ Ապօրինություններով իշխանության եկած թիմը երկիրը վերածելու է սովորական երրորդ կարգի պետության, բռնապետական համակարգով, հակաժողովրդական մոտեցումներով, ինչը պատերազմի նոր սպառնալիքներ է պարունակելու։ Եթե նրանց հաջողվի մեր պետության նկատմամբ իրականացնել երկրորդ դավաճանությունը, ապա պետության պահպանման հեռանկարները չնչին են լինելու»,-նշեց քաղաքագետը։

Հարցին՝ արդյոք Հայրենիքի փրկության շարժումը պետք է շարունակի պայքարը, Հրանտ Մելիք-Շահնազարյանը նշեց, որ նրանք պետք է ակտիվացնեն պայքարը և անեն ամեն ինչ, որ հանրային ճնշման ներքո Նիկոլ Փաշինյանը հեռացվի իշխանությունից։

Աղբյուր` Փաստինֆո