Փաստ ինֆո

ՀՀ տարածքային կառավարման և ենթակառուցվածքների նախարարությունը շրջանառության մեջ է դրել նախագիծ, որով առաջարկվում է արտակարգ և ռազմական դրության ժամանակ երկարաձգել լիազորությունների ժամկետը լրացած ավագանիների լիազորությունը մինչև նորընտիր ավագանու ձևավորումը, իսկ համայնքապետերի լիազորությունների դադարեցման դեպքում ժամկետը չի երկարաձգվի, կնշանակվեն ժամանակավոր պաշտոնակատարներ։

Համայնքների ֆինանսիստների միության նախագահ, ՏԻՄ փորձագետ Վահան Մովսիսյանը «Փաստինֆո»-ի հետ զրույցի ժամանակ ասաց, որ, ըստ էության, նախագծով որևէ նոր բան չի առաջարկվում, և կառավարությունը ոչ թե գնացել է նոր ճանապարհով, այլ օրենքում արդեն գոյություն ունեցող դրույթը տարածել է նաև արտակարգ իրավիճակների վրա․ «Արտակարգ իրավիճակների ժամանակ չես կարող արագ ընտրություններ նշանակել, ինչը ենթադրում է՝պետք է արտառոց լուծում մտածել։ Լուծումներից մեկը պետք է լինի կա՛մ այն, որ տեղակալն աշխատի, կա՛մ ինչ-որ մեկին նշանակեն, բայց, քանի որ մեր օրենքում արդեն առկա է տեղակալի չաշխատելու և մարդ նշանակելու ինստիտուտը, դա տարածվում է նաև արտակարգ իրավիճակների վրա»,-նշեց Վահան Մովսիսյանը՝ նկատելով, որ ոչ ոք առանձնապես երջանիկ չէ, երբ պետական կառավարման մարմինն է մարդ նշանակում, սակայն դրույթն ամրագրված է օրենքով, որի համաձայն՝ գյուղական բնակավայրեր ընդգրկող համայնքներում ղեկավարի պաշտոնակատար է նշանակում մարզպետը, իսկ քաղաքային բնակավայրեր ընդգրկող համայնքներում՝ վարչապետը։

Ոլորտի փորձագետները բազմիցս բարձրաձայնել են այն հարցը, որ եթե համայնքն ունի ղեկավարի տեղակալ, ապա ինչու՞ նա չի շարունակում ղեկավարել։ Մասնագետները նաև առաջարկել են ժամանակավոր պաշտոնակատար նշանակելու դեպքում օրենքում ամրագրել, որ այդ նա իր թեկնածությունը չի կարող դնել ո՛չ ավագանու, ո՛չ համայնքի ղեկավարի ընտրություններում, որպեսզի տպավորություն չառաջանա, որ գործող պետական կառավարման մարմինն ազդում է տեղական ինքնակառավարման մարմնի վրա․ «Իհարկե հիմա դա էական չէ, քանի որ համայնքի ղեկավարի ուղղակի ընտրություն չենք ունենալու։ Հաջորդ ընտրություններով ընտրվելու է ավագանի, որի կազմից էլ համայնքի ղեկավար է ընտրվելու։ Եթե ավագանի է, ապա լինելու է միայն քաղաքական կուսակցությունների կողմից առաջադրված ցանկերով, ինչը ենթադրում է՝ լինելու են քաղաքական ընտրություններ։ Այդ նոր նշանակած ժամանակավոր պաշտոնակատարը լավագույն դեպքում կարող է առաջադրվել ինչ-որ կուսակցության ցանկում, ուրիշ ոչ մի բան»,-նշեց փորձագետը։

Անդրադառնալով այն կարծիքներին, որ իշխանությունները, քրեական գործեր հարուցելով, չկարողացան ազատվել անցանկալի համայնքապետերից, ինչի համար էլ այս փոփոխությունն են անում, Վահան Մովսիսյանը նկատեց՝ դա ռեալ չէ, քանի որ այդ քաղաքապետերը, միևնույն է, նոյեմբերին ավարտում են իրենց լիազորությունները․ «Դրա տակ ուրիշ ենթատեքստ կարող է լինել։ Նոր նշանակվածները կարող են հնարավորություն ունենալ՝ ծանոթանալու հին ղեկավարի կատարած աշխատանքներին և հանցագործության մասին հաղորդում ներկայացնեն։ Ոչ ոք չի ասում, որ ժամանակավոր պաշտոնակատարն իրավունք չունի ուսումնասիրել նախկինում կատարվածները և քրեական տարր տեսնելու դեպքում չահազանգի»,-ասաց Վահան Մովսիսյանը։

Դիտարկմանը, որ հիմնականում քրեական գործերով անցնում են Սյունիքի մարզի որոշ համայնքների ղեկավարներ, փորձագետը նկատեց՝ իշխանությունների հիմնական կռիվը Գորիսի հետ է, բայց քաղաքապետի ժամկետը դեռ չի լրանում․ «Հաջորդ ամենախոշոր քաղաքը Կապանն է, որի քաղաքապետի ժամկետը նույնպես դեռ չի լրանում։ Մեղրիի, Տաթևի, Տեղի համայնքապետերի ժամկետն է լրանում։ Այսինքն` քաղաքական հետաքրքրությունը Գորիսը, Սիսիանը և Կապանն են։ Այս պարագայում Գորիսի ու Կապանի քաղաքապետերին չեն կարող կպնել, Սիսիանինն էլ կփոխեն, քանի որ ժամկետը լրանում է»,-նշեց փորձագետը։

Աղբյուր` Փաստինֆո