Փաստ ինֆո

Երևանի նախկին քաղաքապետ Տարոն Մարգարյանն առաջադրված մեղադրանքի շուրջ ցուցմունք չի տվել, հայտնել է, որ իրեն մեղավոր չի ճանաչում, որովհետև իր պաշտոնավարման ընթացքում որևէ հանցավոր արարք թույլ չի տվել։ Այս մասին «Փաստինֆո»-ի հետ զրույցում ասաց պաշտպան Բենիկ Գալստյանը։

Ինչպես արդեն տեղեկացրել ենք՝ ՀՀ ՔԿ-ն նախօրեին հաղորդագրություն է տարածել Երեւանի նախկին քաղաքապետ Տարոն Մարգարյանին մեղադրանք առաջադրելու մասին։ Ըստ նախաքննական մարմնի՝ Մարգարյանը նախաձեռնել է Երևան քաղաքի որոշ դպրոցների զբաղեցրած հողամասերի սահմանները վերճշտելու գործընթաց և հանձնարարել քաղաքապետարանի համապատասխան պաշտոնյաներին և աշխատակիցներին՝ թողարկել դպրոցների հողատարածքների նոր հատակագիծ՝ նպատակ ունենալով այդ դպրոցների կողմից զբաղեցրած հողատարածքներից իր և իր մերձավորների համար առանձնացնել և ձեռք բերել հողատարածքներ։ Մարգարյանի նկատմամբ որպես խափանման միջոց է կիրառվել ստորագրությունը՝ չհեռանալու մասին։

Փաստաբանը մեզ հետ զրույցում նշեց, որ առաջադրված մեղադրանքն անհասկանալի է և անորոշ, ինչի կապակցությամբ միջնորդություն է ներկայացրել քննիչին՝ հստակեցնելու մի շարք հանգամանքներ, ինչպես նաև՝ պարզաբանելու մեղադրանքի էությունը, սակայն մինչ օրս միջնորդության պատասխանը չի ստացել։ Բացի դա՝ արդեն հարցաքննության ընթացքում պաշտպանը միջնորդել է տրամադրել այն փաստաթղթերը, որոնց հիման վրա կազմված է մեղադրանքը ։

«Պարոն Մարգարյանն՝ իր պաշտոնի բերմամբ շփվել է միլիոնավոր փաստաթղթերի հետ՝ առանց չափազանցնելու և, բնականաբար, չի կարող հիշել օրինակ՝ 5-6 տարի առաջ ինչ- որ տարածքում ինչ -որ փաստաթուղթ տեսել է, թե ոչ»,- նշեց Գալստյանը՝ հավելելով, որ այդ միջնորդության վերաբերյալ ևս որևէ պատասխան չի ստացել։

Փաստաբանի փոխանցմամբ՝ Մարգարյանի մասնակցությամբ նախկինում քննչական գործողություններ չեն եղել, մասնավորապես, Մարգարյանը հարցաքննության է հրավիրվել մեկ անգամ՝ նոյեմբեր-դեկտեմբեր ամիսներին, սակայն այդ ընթացքում նա կորոնավիրուսով հիվանդ լինելու հանգամանքով պայմանավորված ինքնամեկուսացած է եղել և տնային պայմաններում բուժում ստացել, քննչական մարմին համապատասխան բժշկական փաստաթղթեր են ներկայացվել։ Արդեն փետրվար ամսին Մարգարյանը կորոնավիրուսից ապաքինվելուց հետո ցանկություն է հայտնել վերականգնման փուլում ստուգումներ անցնել ՌԴ-ում և փետրվարի 7-ին մեկնել է ՌԴ՝ բուժզննություն անցնելու համար, այցը պետք է տևեր մոտ 10 օր։

«Արդեն փետրվարի 7-ին, երբ պարոն Մարգարյանը մեկնել է ՀՀ-ից, փետրվարի 8-ին քննիչը որոշում է կայացրել՝ պարոն Մարգարյանին որպես մեղադրյալ ներգրավելու մասին։ Փետրվարի 11-ին, երբ տեղեկացել ենք այդ մասին, քննիչին հայտնել ենք, որ Տարոն Մարգարյանը տեղյակ է, որ իրեն որպես մեղադրյալ եք ներգրավել, այժմ նա գտնվում է ՌԴ Մոսկվա քաղաքում՝ բուժզննության համար, սակայն, իմանալով, որ իրեն մեղադրյալ եք ներգրավել, պարտավորվում է հնարավորինս շուտ վերադառնալ ՀՀ և նշել ենք, որ կվերադառնա ՀՀ՝ մոտակա չվերթով՝ փետրվարի 13-ին»,- նշեց նա՝ հավելելով, որ ուշ երեկոյան Մարգարյանը վերադարձել է ՀՀ և փաստաթղթային գործընթացներ անցնելուց հետո փետրվարի 14-ին՝ ժամը 00։40-ին ներկայացել են վարույթն իրականացնող մարմին, որտեղ կազմվել է համապատասխան արձանագրություն և Մարգարյանին առաջադրվել մեղադրանք։ Բացի դա՝ պարզվել է, որ փետրվարի 11-ին Տարոն Մարգարյանի նկատմամբ հետախուզում հայտարարելու մասին որոշում է կայացվել, ընդ որում, այն օրը, երբ Մարգարյանը պարտավորվել է, որ ՀՀ կվերադառնա փետրվարի 13-ին։ «Այսինքն՝ քննիչը գիտեր Մարգարյանի գտնվելու վայրը, Մարգարյանի հետ ուներ պայմանավորվածություն, որ փետրվարի 13-ին ինքը վերադառնալու է, բայց փետրվարի 11-ին որոշել է հետախուզում հայտարարել Տարոն Մարգարյանի նկատմամբ»,- նշեց Գալստյանը։

Փաստաբանը նկատեց՝ քրեական գործը հարուցվել է դեռևս 2018թ օգոստոս ամսից, այս ընթացքում Մարգարյանը պարբերաբար մեկնել է ՀՀ-ից և միշտ վերադարձել, մշտական բնակության վայրը ՀՀ-ն է։

Հարցին, թե արդյո՞ք կան տեղեկություններ՝ Մարգարյանի դեմ ցուցմունք կա, թե ոչ, Գալստյանը պատասխանեց, որ ամենայն պատասխանատվությամբ կարող է ասել, որ նման ցուցմունք չկա ։

«Այն գործառույթները, որոնց մեջ մեղադրում են մի շարք անձանց, այդ թվում՝ Տարոն Մարգարյանին, նա թե՛ օրենքի ուժով, թե՛ փաստացի չէր կարող իրականացնել կամ չէր կարող հսկողություն իրականացնել՝ այդ գործընթացներում։ Ինչ-որ աճուրդի մասին է խոսքը գնում, մինչդեռ՝ աճուրդն ունի հատուկ, օրենքով սահմանված կարգ։ Աճուրդն անցկացվում է աճուրդային հանձնաժողովի կողմից, որտեղ պարոն Մարգարյանը որևէ անելիք և ասելիք չունի՝ թե՛ օրենքի ուժով, թե՛ փաստացի»,- նշեց Բենիկ Գալստյանը։

Ճշգրտող հարցին՝ արդյոք պաշտպանը հերքում է, որ վաճառքը եղել է շուկայականից էականորեն ցածր գնով, Գալստյանը նշեց, որ չի հերքում, այլ՝ հաղորդագրության մեջ առկա ձևակերպումներն իրականությանը չեն համապատասխանում, որովհետև աճուրդի վաճառքի իրականացումն արդեն իսկ գնի որոշում է, բացի դա, թեկուզ քննիչն այլ մոտեցման կողմնակից է, պետք է առնվազն ինչ-որ փաստաթուղթ ունենան, որ գույքի իրական արժեքն այսքան է, բայց վաճառվել է այնքան, մինչդեռ՝ քրեական գործով ապրանքագիտական եզրակացություն առկա չէ։

«Գոնե քննչական մարմինը բերեր ասեր, որ նմանատիպ գույքեր եղել են 100 հատ, որոնցից 99-ի վաճառքն աճուրդով եղել է, ենթադրենք 100 դրամով, իսկ այս մեկ գույքի վաճառքն աճուրդով եղել է 100-ից 30 դրամով պակաս։ Չկա նման տվյալ։ Այսինքն՝ մեղադրանքի որոշման մեջ «շուկայականից էականորեն ցածր գնով» նշումը, չգիտեմ, քննիչի վառ երևակայության արդյունքն է, թե ինչ է, բայց չունի փաստական հիմք»,- նշեց Գալստյանը՝ ընդգծելով, որ նմանատիպ շատ այլ ձևակերպումներ չունեն և երբեք չեն կարող ունենալ որևէ փաստական հիմք, «գործը ջուր» է և այն Մարգարյանի հետ որևէ կապ չունի։

Ըստ փաստաբանի՝ եթե գործը Մարգարյանի հետ գոնե մի փոքր կապ ունենար, մեղադրանք կառաջադրեին ավելի վաղ, ոչ թե՝ երեք տարի կսպասեին և որևէ բան գործով, ըստ էության, չի արվել։ Իսկ թե ինչու է վարույթն իրականացնող մարմինը մեղադրանք առաջադրում միայն երեք տարի անց՝ փաստաբանը նշեց, որ միայն ենթադրություններ կարող է անել, որոնք որոշակի փաստական հիմք ունեն։

«Ինձ մոտ տպավորություն է ստեղծվում, որ իրենք ուզում էին, որ պարոն Մարգարյանն ուղղակի ՌԴ-ից չվերադառնա։ Այսինքն՝ փետրվարի 8-ին մեղադրյալ էին ներգրավել, իրեն այստեղից տեղեկացրել էին, որ որպես մեղադրյալ են ներգրավել՝ ՀՀ ՔՕ 308-րդ հոդվածի 2-րդ մասով, պարոն Մարգարյանն էլ վախենա և չվերադառնա ՀՀ։ Իրենք էլ մի հատ հայտարարություն կանեին, որ Տարոն Մարգարյանին որպես մեղադրյալ են ներգրավել, նրա նկատմամբ հետախուզում են հայտարարել և լրատվական «բումը» կապահովեին, բայց պարոն Մարգարյանը չվախեցավ, որովհետև պարոն Մարգարյանը՝ որպես կանոն չի վախենում, 2018թ իր սովորական կյանքով ապրում է ՀՀ-ում՝ ընտանիքի հետ, վերադարձավ ՀՀ, որը շատ անսպասելի էր քննչական մարմինների համար։ Հիմա էլ ինչ-որ գործողություն պետք է անեին լրատվական «բումն» ապահովելու համար, մամուլի հաղորդագրություն տարածեցին»,- նշեց նա՝ հավելելով, որ մինչ ՔԿ հաղորդագրությունը հակված չէին հրապարակայնացնել սա, որովհետև այս հանգամանքն ինքնին վատ է անդրադառնում նաև Երևան համայնքի հեղինակության վրա և բազմաթիվ մարդիկ կան, ում իրավունքների վրա սա ազդելու է, այդ անձինք օրինական կարգով տիրապետում և տնօրինում են այդ գույքին, այդ մարդիկ կապ չունեն ոչ Տարոն Մարգարյանի հետ, ոչ որևէ պաշտոնատար անձի հետ։

Հեղինակ՝ Իզաբել Սահակյան

Աղբյուր` Փաստինֆո