Փաստ ինֆո

«Կարծում եմ երկրորդ նախագահ Ռոբերտ Քոչարյանի վերջին հարցազրույցից հետո ՀՀ-ում վարչապետ աշխատող անձը հրաժարվել է արտահերթ ընտրությունների գնալու գաղափարից: Արտահերթ ընտրություններով նա փորձում էր բլեֆ անել՝ թե գնում է արտահերթ ընտրությունների, ցանկանում է պատասխանատվություն վերցնել իր վրա, բայց այ ընդդիմությունը համաձայնություն չի տալիս արտահերթ ընտրությունների գաղափարին: Նա նախապես շատ լավ իմանալով է սա անում՝ ընդդիմությունը ոչ թե դեմ է արտահերթ ընտրությունների գաղափարին, այլ չի ցանկանում մասնակցել իր կազմակերպած շոուներին: Եվ ահա, երբ երկրորդ նախագահը վերջերս հայտարարեց, որ կմասնակցի արտահերթ ընտրություններին, կարծում եմ, Փաշինյանը հետ է կանգնել իր այդ նախաձեռնությունից»,- «Փաստինֆո»-ի հետ զրույցում ասում է Շիրակի պետական համալսարանի դասախոս Արթուր Համբարձումյանը, խոսելով Նիկոլ Փաշինյանի առաջիկա ծրագրերի մասին:

Վերջինս կարծում է, որ Փաշինյանի պլաններում հիմա առաջնային տեղ է զբաղեցնում՝ անել ամեն ինչ, մինչև 2023 թվականն իշխանության մնալու համար. «Որպեսզի արտահերթ ընտրություններ անցկացվեն, նա նախ պետք է հրաժարական ներկայացնի: Ես վստահ եմ, որ Փաշինյանն այդ քայլին չի գնա, որովհետև նա շատ վախեր ունի: Նախ և առաջ նա չի վստահում իր թիմին և չի բացառում, որ հրաժարական ներկայացնելուց հետո իր իսկ թիմի անդամները կարող են իրեն այլևս ձայն չտալ: Չի բացառվում նաև, որ իր հրաժարականից հետո, խորհրդարանական երկու ուժերից կարող են այլընտրանքային թեկնածուներ առաջադրվել, ինչը կբարդացնի կամ, գրեթե, անհնարին կդարձնի իր վերարտադրվելու շանսերը: Ամեն դեպքում, կարծում եմ նա Ազգային Ժողով կբերի տխրահռչակ ինքնալուծարման ծրագիրը, քաջ գիտենալով, որ այն մերժվելու է: Սա նրա համար է, որպեսզի նա ցույց տա, թե՝ տեսեք, ես ուզում եմ արտահերթ ընտրություններ լինեն, բայց, քանի – որ ինքնալուծարման ծրագիրը չի հավաքում բավարար չափով ձայներ, հետևաբար, արտահերթ ընտրությունների գնալու գաղափարը կյանքի չի կոչվում»:

Արթուր Համբարձումյանը նկատում է՝ անհրաժեշտ է փաստել, որ Փաշինյանը Հայաստանի Հանրապետությունում, արդեն վաղուց, իշխանություն չունի. «Նախ, ի շնորհիվ իրեն, Հայաստանն արդեն պետություն չէ, իսկ ինքն, այդ գոյություն չունեցող պետությունում իշխանություն չունեցող անձ է: Հետևաբար, այս իրավիճակը երկար ձգվել չի կարող: Այսինքն, այն, որ Փաշինյանը հիմա էլ մինչև 2023 թվականն իշխանության մնալու հույսեր է փայփայում, դա անհնարն վարկած է: Ես վստահ եմ՝ նա շուտով, ուղղակիորեն, դուրս է շպրտվելու: Կլինի դա ընտրությունների, փողոցային ակցիաների, թե այլ ճնշումների միջոցով, միևնույն է, դա լինելու է»: Անդրադառնալով երեկ Փաշինյանի՝ Արտաշատ քաղաք կատարած այցի թեմային, Արթուր Համբարձումյանը նկատում է՝ արտաշատյան ճամփորդությունը մի քանի թիրախներ ուներ.

«Նախապես ասեմ, որ նրա այս ճամփորդությունները շարունակական են լինելու: Հետո նա գնալու է Աշտարակ, Թալին, Գյումրի և այսպես շարունակ… Սրանով նա փորձում է պատրանքներ ստեղծել, թե տեսեք՝ ես կարողանում եմ փողոց դուրս գալ, և կան մարդիկ, ովքեր սեղմում են իմ ձեռքը: Թեև, իր այցից անմիջապես հետո պարզ դարձավ այն մարդկանց ինքնությունը, ովքեր, իբր, հանդիպման էին եկել հողատուի հետ: Մենք տեսանք, թե իրականում ովքեր էին դրանք: Իսկ ես ուզում եմ հարց տալ Փաշինյանին՝ տղա ջան, եթե դու կարողանում ես շփվել մարդկանց հետ, փորձիր առանց տասնյակների հասնող անվտանգության աշխատակիցների շրջել քո քաղաքում տես կստացվի՞…Մի բան էլ՝ակնհայտ է, որ Փաշինյանն օր- օրի ավելացնում է իր անվտանգության աշխատակիցների թիվը, հասցնելով այն անպատշաճ մաքսիմումի, բայց ողջ պարադոքսը նրանում է, որ ավելացնելով անվտանգության աշխատակիցների թիվը, նա չի ապահովում իր անվտանգությունը, սա այլևս փաստ է: Չի բացառվում նաև, որ արտաշատյան այցով նա փորձում էր քաղաքական զոնդաժի միջոցով իր համար պարզել՝ արդյո՞ք ինքը կարող է զուտ ֆիզիկապես մարդամեջ դուրս գալ իր իսկ ղեկավարած երկրում, թե՞ ոչ: Ակնհայտ է նաև, որ սրանով նա փորձ արեց հաղթահարել նաև պատերազմից հետո իր մեջ խորը նստվածք թողած՝ մարդկանց հետ շփվելու հոգեբանական բարդույթը: Չմոռանանք, որ կապիտուլյացիայի ակտի ստորագրումից հետո, նա շատ երկար ժամանակ բունկերներից, ուղղակի, դուրս չէր գալիս: Փաստորեն նա փորձում է կամաց – կամաց մարդամեջ դուրս գալ, սակայն, սա ևս սխալ ընտրված մի ճանապարհ է, որ նրան, հերթական անգամ, միանշանակ, ձախողման է տանում»,- ասում է Շիրակի Պետական համալսարանի դասախոս Արթուր Համբարձումյանը, ով նաև՝ Նիկոլ Փաշինյանի նախկին վաղեմի ընկերներից և համախոհներից է եղել:

Ամփոփելով զրույցը, վերջինս նկատում է՝ ՀՀ-ում վարչապետ աշխատող անձից ձերբազատվելու համար, պետք է հասկանալ մի բան՝ Նիկոլ Փաշինյանին ոչ թե պետք է զրկել իշխանությունից, որովհետև նա իշխանություն արդեն վաղուց չունի, այլ ուղղակի պետք է ազատվենք այդ չարիքից՝ բառի բուն իմաստով. «Նիկոլ Փաշինյանը պետական մասշտաբի սոսկալի հանցագործություններ է կատարել, ընդհուպ մինչև միջազգային մասշտաբի հանցագործություններ, պետական դավաճանություն: Երբ ուսումնասիրում ենք պատմությունը, տեսնում ենք, որ այսպիսի իրավիճակներում հայտնված երկրի տխրահռչակ ղեկավարները, գրեթե միշտ, նույն վերջաբանն են ունենում՝ կամ նրանք ինքնասպան են լինում, կամ նրանց սատկացնում են: Նմանօրինակ նախադեպերը շատ են: Ինչ վերաբերում է Նիկոլ Փաշինյանին՝ այլևս պարզ է՝ նա ինքնակամ իշխանությունը չի թողնելու, իսկ Սահմանադրական ճանապարհով նրան հեռացնելու հեռանկարները դեռևս մշուշոտ են: Հետևաբար, Նիկոլ Փաշինյանը կշարունակի մնալ իշխանության և հիմնահատակ քայքայել երկիրը, քանի դեռ նրան սատկացնելով դուրս չեն շպրտել այստեղից: Ի վերջո, համարյա ապացուցված է, որ Արարատ Միրզոյանը ԱԱԾ գործակալ է: Համարյա ապացուցված է, որ նա նաև թուրքական գործակալ է: Փաշինյանը չէր կարող չիմանալ այդ մասին, իսկ ես, գրեթե վստահ, ասում եմ՝ նա իմացել է: Հետևաբար, Ազգային Ժողովի նախագահ նշանակելով թուրքական գործակալի, Նիկոլ Փաշինյանը հաստատում է, որ ինքը նույնպես այդ նույն գործակալական ցանցի ներկայացուցիչ է, հակառակ դեպքում, նա երբեք չէր տա իր համաձայնությունն այդ նշանակման հարցում: Հետևաբար, երբ Փաշինյանը պատերազմի օրերին բղավում էր՝ թե «Հաղթելու ենք», կամ «Շուշին մերն է», այն պարագայում, երբ շատերն արդեն գիտեին, որ Շուշին ընկել է՝ նա այդ ժամանակ չէր խաբում, նա ճիշտ էր ասում, ուղղակի, այդ ամենը ինքը պետք է բղավեր ոչ թե հայերեն լեզվով, այլ թուրքերենով, այն լեզվով, որի գործակալական ցանցին այդքան հավատարմորեն ծառայում է»,- եզրափակելով զրույցն, ասում է Շիրակի Պետական համալսարանի դասախոս Արթուր Համբարձումյանը:

Հեղինակ՝ Նվարդ Մանվելյան

Աղբյուր` Փաստինֆո