Փաստ ինֆո

Նիկոլ Փաշինյանը «Սասնա ծռեր 1» գործով չի հարցաքննվի։ Երևանի ընդհանուր իրավասության դատարանում՝ դատավոր Մեսրոպ Մակյանի նախագահությամբ, այսօր կայացած «Սասնա Ծռեր 1» գործով դատական նիստին քննարկվել է Նիկոլ Փաշինյանին որպես վկա հարցաքննելու հարցը։

Նման միջնորդությամբ հանդես է եկել ամբաստանյալ Արմեն Բիլյանի պաշտպան Զարուհի Փոստանջյանը՝ միջնորդելով վերսկսել դատաքննությունն ու հարցաքննել Նիկոլ Փաշինյանին։

Նշենք, որ գործն արդեն գտնվում է պաշտպանական ճառերի փուլում և այսօր նախատեսվում էր, որ փաստաբանը պետք է հանդես գար պաշտպանական ճառով։ Փոստանջյանը պնդել է, որ Փաշինյանը տեղեկություններ ունի՝ ոստիկան Գագիկ Մկրտչյանի զոհվելու հանգամանքների մասին, ապա նաեւ կասկածներ հայտնել՝ կապված Փաշինյանի՝ ՊՊԾ գունդ մտնելու վերաբերյալ՝ կարեւորելով այդ երկու հանգամանքների պարզաբանումը։ Գագիկ Մկրտչյանի այրին էլ հետաքրքրվեց՝ որտեղից են վերցրել տեղեկությունները, որ Նիկոլ Փաշինյանն այցելել է իր ամուսնուն, քանի որ առավոտյան ժամն ութից մինչև գիշերը՝ ժամը մեկն անց կես հիվանդանոցում է եղել և չի տեսել, ընդ որում՝ կինը պատմեց, որ նստած է եղել հիվանդասենյակի դռան մոտ։

Գործով դատաքննությունը վերսկսելու և Փաշինյանին հարցաքննելու միջնորդության դեմ առարկություններ ներկայացրեց նաև գործով մեղադրող կողմը՝ նշելով, որ պաշտպանի կողմից բերված փաստարկները որևէ կերպ չեն կարող ազդեցություն ունենալ ամբաստանյալներին մեղսագրված հանցավոր արարքների հիմնավորման կամ հերքման տեսանկյունից։ Դատախազը նշեց, որ, եթե առաջնորդվենք միջնորդությամբ կառուցված տրամաբանությամբ, ապա պետք է հարցաքննվեն ՀՀ բոլոր այն քաղաքացիներին, որոնք ցանկացել են իմանալ, թե ինչ հանգամանքներում է եղել դեպքը, ինչը ողջամիտ չէ։

Նախագահող դատավոր Մեսրոպ Մակյանը մերժեց միջնորդությունը՝ նշելով, որ ՀՀ քրեական դատավարության օրենսգրքի համաձայն՝ դատական վիճաբանությունների ընթացքում կողմերն իրավունք չունեն հիմնվեն այնպիսի ապացույցների վրա, որոնք չեն ուսումնասիրվել դատաքննության ժամանակ, իսկ հետևությունները հիմնավորելու համար նոր ապացույցների անհրաժեշտության դեպքում կողմը միջնորդություն է ներկայացնում՝ դատաքննությունը վերսկսելու մասին։ Դատարանն արձանագրել է, որ ներկայացված դատողությունները ենթադրական բնույթի են, որևէ փոխկապակցված աղերս չունեն՝ որևէ ապացույցի հետ, դատաքննության ընթացքում նման տվյալներ ձեռք չեն բերվել։ Բացի դա, դատաքննության ընթացքում որևէ տեղեկություն ձեռք չի բերվել նաև, որ Գագիկ Մկրտչյանի մահվան հանգամանքների մասին Նիկոլ Փաշինյանը որևէ տեղեկություն ունի կամ ողջամտորեն կարող է ունենալ, հանրահավաքում արտահայտած տեղեկությունը կամ ենթադրյալ կարծիքը դատարանը չի կարող ընդունել հիմք, որ Նիկոլ Փաշինյանը կամ հավաքված հազարավոր մարդիկ տեղեկություններ ունեն Գագիկ Մկրտչյանի մահվան վերաբերյալ։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։ ՊՊԾ գունդը զավթելու եւ նշված այլ արարքները կատարելու մեջ, ընդհանուր առմամբ մեղադրվում է 32 անձ:

Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։

«Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։

Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Հեղինակ՝ Իզաբել Սահակյան

Աղբյուր` Փաստինֆո