Փաստ ինֆո

ՊՊԾ գնդի գրավման հետևանքով զոհված ավագ ենթասպա Գագիկ Մկրտչյանի վիրահատության ընթացքում չեն նկատվել ոսկրային վնասվածքներ։ Այս մասին «Սասնա Ծռեր»1 գործով դատական նիստին ասաց դատակոչված վկա, վիրաբույժ Հովհաննես Հովհաննիսյանը՝ նշելով, որ գուցե եղել են նաև կողոսկրային վնասվածքներ, որն ինքը չի նկատել՝ որովայնի օրգանների վիրահատության ընթացքում։

Նրա փոխանցմամբ՝ առաջին վիրահատության ժամանակ վնասված էին լյարդը, ստամոքսը և հաստ աղիքը, իսկ երկրորդ անգամ վիրահատվել է պերիտոնիտի կասկածանքով։

Վիրաբույժը նշեց, որ հրազենային վիրավորման դեպքում երևում է վիրավորման խողովակը, բայց հստակ չի կարող ասել, թե այդ ընթացքում ինչ մանրաթելային վնասվածքներ են ստացվել։

«Դուք կարող եք տեսնել մուտքային և ելքային խողովակ, բայց իր անցած ճանապարհին ջերմությամբ կարող է մի շարք փոփոխություններ առաջացնել»,- ասաց բժիշկը։

Նա նաև հայտնեց, որ Գագիկ Մկրտչյանին առաջին անգամ տեսել է վիրահատության ժամանակ։ Իրեն զանգել և կանչել են հիվանդանոց՝ նշելով, որ հրազենային վիրավորում ստացած հիվանդ է տեղափոխվել։ Ինչ վերաբերում է քննչական գործողություններին մասնակցելուն, ապա վիրաբույժը նշեց, որ առաջին անգամ դատարանում է հարցաքննվում։

Բժիշկ- անեսթեզիոլոգ Վահե Կոստանյանը վստահեցրեց, որ վիրահատության ժամանակ Մկրտչյանի թոքերը նորմալ աշխատել են։

«Ո՛չ հեղուկ եմ լսել, ոչ էլ՝ ծակած օդ եմ լսել՝ ապարատով լսելու ընթացքում»,- ասաց վկան՝ նշելով, որ տեսականորեն չի երևացել կողոսկրերի վնասվածքը, սակայն ձախ կողմից եղել է դուրս եկած ճարպ։

Բացի այդ՝ նա նաև նշեց, որ չի հիշում, թե որովայնի շրջանում արնահոսություն եղել է, թե ոչ, բայց ձեռքի բինտերը արյամբ թաթախված են եղել։
Նրա խոսքով՝ հրազենային վիրավորումներից հետո սպասելի է, որ չորրորդ կամ հինգերորդ օրն առաջանան թարախային պրոցեսներ, իսկ Գագիկ Մկրտչյանի մոտ կատաստրոֆիկ վիճակ չի եղել պերետանիտը։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։ ՊՊԾ գունդը զավթելու եւ նշված այլ արարքները կատարելու մեջ, ընդհանուր առմամբ մեղադրվում է 32 անձ:

Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։ Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Հեղինակ՝ Իզաբել Սահակյան

Աղբյուր` Փաստինֆո