Փաստ ինֆո

Ազգային ժողովի արձակման երկու տարբերակ կա՝ երբ վարչապետը հրաժարական է ներկայացնում, և երբ կառավարության ծրագիրը ԱԺ-ն չի հաստատում, հիմա իրենք փորձում են լրացուցիչ տարբերակ ներդնել, որպեսզի իրենց օրոք վարչապետը հրաժարական չտա և իրենց կազմակերպվեն ընտրություններ: Այս մասին «Փաստինֆո»-ի հետ զրույցում ասաց սահմանադրագետ Գոհար Մելոյանը՝ անդրադառնալով «Իմ քայլը» խմբակցության նախաձեռնած Սահմանադրության փոփոխությունների նախագծին, որով ԱԺ-ն կարող է գնալ ինքնալուծարման:

Սահմանադրագետը նկատում է, որ իշխող ուժը փորձում է սահմանադրության առկա եղանակներից զատ, Ազգային ժողովի արձակման ևս մեկ տարբերակ ներմուծել.

«Սրա արդյունքում հնարավորություն կտան Ազգային ժողովին 3/5-րդ ձայներով արձակել օրենսդիր մարմինը, սակայն այս պարագայում, ըստ սահմանադրական կարգավորումների, այս փոփոխությունը ընդունվելու է Ազգային ժողովի պատգամավորների ձայների 2/3-ով՝ առաջին ընթերցմամբ, այնուհետև, քանի որ սահմանադրական փոփոխություն է լինելու, պետք է ուղարկվի Սահմանադրական դատարան, Սահմանադրության համապատասխանության վերաբերյալ դրական եզրակացություն ստանալու, դրական եզրակացության պարագայում կրկին 2/3-ով նոր պետք է ընդունվի տվյալ փոփոխությունը»,-ասաց Մելոյանը:

Փորձագետի համոզմամբ՝ սա իշխանություն պահպանելուն միտված իշխող ուժի հերթական ջանքն է.

«Իրենք կառավարման ողջ ընթացքում ապացուցել են, որ որևէ կերպ իրավական, սահմանադրական կարգավորումներով կաշկանդված չեն, իրենց ցանկալի վերջնարդյունքներին հասնելու համար բազմիցս կոպտորեն ոտնահարել են անգամ սահմանադրությամբ սահմանված հստակ կարգավորումները, և այս պահին իրենք փորձում են զարտուղի ճանապարհ գտնել այն միակ ճանապարհից, համաձայն որի՝ վարչապետը պետք է հրաժարական տար»,-ասաց Մելոյանը:

Սահմանադրագետը վստահեցնում է, որ իշխանության նպատակը իրենց օրոք ընտրություններ կազմակերպելն է, իսկ դրա պատճառն այն է, որ բոլոր հնարավոր և անհնարին օրենսդրական և անօրեն միջոցներից օգտվելու են, որպեսզի պահպանեն իշխանությունը։

«Իշխող ուժին, իրենց ղեկավարի գլխավորությամբ, իրավական հարթության մեջ չեմ դիտարկում, որովհետև արդեն ակնհայտորեն հանցակազմերի ենք ականատես եղել, օրինակ՝ վարչապետի կողմից մի քանի անգամ սահմանադրական կարգ է տապալվել, ինչը քրեական օրենսգրքով նախատեսված հանցավոր արարք է: Իրենք առնվազն պետք է իրավապահ մարմինների առաջ կարգավիճակ ստացած լինեին, և մի շարք ակնհայտ հանցակազմերի համատեքստում պատասխանատվության ենթարկվեին, այն դեպքում, երբ իրենք փորձում են իրենց աթոռը պահել և ամբողջ ջանք ու եռանդը, երբ երկրում առկա են հազարավոր խնդիրներ, իրենց միակ օրակարգը ակնհայտ է, որ իրենց աթոռներին սոսնձված մնալն է»:

Փորձագետը նկատում է, քանի որ իշխանությունը հասկանում է՝ կա հանրային կոնսենսուս, որ իրենք չեն կարող առկա ճանապարհով շարունակել իշխող ուժ հանդիսանալ, փորձում են, որպես այլընտրանք առաջարկել արտահերթ ընտրությունները.

«Ընդ որում, ընդգծեմ, որ այսպիսի խոցելի պայմաններում ընտրական գործընթացի կազմակերպումը լրացուցիչ հարված է լինելու մեր պետականության հիմնաքարին, այն դեպքում, երբ առաջարկվում էր անցումային կառավարության ձևավորումը, երբ մեկ տարի անց իրավիճակը կայունացնելուց հետո նոր ընտրական գործընթաց կկազմակերպվեր: Իրենք հիմա գնում են եսասիրական ճանապարհով և փորձում են ընտրություններն իրենց օրոք կազմակերպել, որպեսզի հնարավորություն ունենան օրինական ճանապարհները շրջանցել և կրկին իրենց իշխանությունը վերականգնեն»,-ասաց Գոհար Մելոյանը՝ հավելելով, որ եթե արդար անցկացվեն, Իմ քայլը չի ստանալու հանրության անհրաժեշտ քվեն, կարող է չհաղթահարեն օրենսդիր մարմին անցնելու շեմը.

«Այսքանը իրենք քաջ գիտակցում են, և դիմելու են որոշակի ապօրինությունների՝ իրենց ցանկալի վերջնարդյունքում ունենալու համար»,-մեզ հետ զրույցում ասաց Գոհար Մելոյանը:

Աղբյուր` Փաստինֆո