Փաստ ինֆո

Փաշինյանի բազմաթիվ լայվեր և հարցազրույցներ ինքնախոստովանական ցուցմունքներ են, որոնք հստակ փաստում են նրա կատարած հանցագործությունների մասին։

Նախօրեին Հանրային հեռուստատեսությամբ նա ուղղակիորեն հայտարարեց, որ բանավոր համաձայնությամբ Ադրբեջանին են հանձնվում հայկական ինքնիշխան տարածքներ։ Այսինքն, Փաշինյանը կամայական կերպով կատարում է գործողություններ, որոնց իրավունքը ինքը չունի, նա, ըստ էության, Հայաստանի սահմանները վերաձևում է ի շահ Ադրբեջանի՝ այդպիսով մեր հանրապետության տարածքային ամբողջականությունը և սահմանների անվտանգությունը դարձնելով խոցելի։ Եվ դա անում է բանավոր տուրևառությամբ։ Գործընթացը կատարվում է գաղտնի, ծածուկ, հանրության, այդ թվում՝ նաև՝ տեղացի բնակչության բացարձակ անիրազեկության պայմաններում։

Որպես արդյունք՝ Նիկոլ Փաշինյանի անմիջական ղեկավարությամբ Ադրբեջանի վերահսկողության տակ են անցնում ՀՀ ինքնիշխան տարածքի այնպիսի կարևոր և անվտանգության գոտի համարվող ենթակառուցվածքներ, ինչպիսիք են մայրաքաղաքը Սյունիքի մարզի հետ կապող Գորիս - Կապան ավտոճանապարի մի մասը, ոսկու մեծ պաշար ունեցող Սոթքի հանքավայրի մեծ մասը, ռազմավարական նշանակության դիրքեր և բարձունքներ:

Իսկ ՀՀ կառավարության դեկտեմբերի նիստում Փաշինյանն ուղղակի հայտարարեց, որ «Սյունիքի մարզում ներկայումս տեղի են ունենում տեղորոշման աշխատանքներ, որոնք ունեն որոշակի նրբություններ և որոշակի բարդություններ, բայց մեր համոզմունքը այն է, որ այդ աշխատանքները պետք է տեղի ունենան...»։

Ընդ որում, ուշագրավն այն է, որ նա շատ պարզ ասում է՝ «Երկու բնակավայր ունենք, որոնց հետ կապված կարող են ծագել որոշակի հարցեր, մեկը՝ Սյունիքի մարզի Որոտան համայնքի մասին է, գյուղի, բնակավայրի մասին է, երկրորդը Շուռնուխ բնակավայրի մասին է, որտեղ կան որոշակի սահմանային հարցեր, որոնց շուրջ ամենօրյա աշխատանք է տեղի ունենում, և այդ հարցերը կարող են որոշակի ցավոտ իրավիճակների բերել, բայց ես նաև ուզում եմ հավաստիացնել, որ բոլոր այն պարագաներում, եթե մեր քաղաքացիների շահերի տեսանկյունից որոշակի հարցեր կառաջանան, կառավարությունը համարժեք փոխհատուցումներով հանդես կգա»։

Ի՞նչ ասել է՝ ցավոտ իրավիճակ, կամ՝ փոխհատուցում, մարդկանց տունուտեղը հանձնում ես թշնամուն և փոխհատուցու՞մ ես ուզում տալ։ Այսինքն, դու Արցախը թուրքին նվիրեցիր, իսկ հիմա անցել ես Հայաստանի՞ն։ Դեռ մի բան էլ՝ պարզվում է՝ «Թշնամին մեկ օր ժամանակ է տվել Շուռնուխ գյուղի բնակիչներին՝ գյուղի կեսն ազատելու համար»։

«Փաստինֆո»-ի հետ զրույցում Գորիսի քաղաքապետի տեղակալ Մենուա Հովսեփյանն ասել է, որ գյուղը կիսվելու է․ «12 տուն է անցնում իրենց, մոտ 40 բնակիչ պետք է լքի գյուղը, բայց խնդիրն այստեղ կայանում է նրանում, որ ինչպե՞ս կարող են 10 մետրի վրա հայերը և թուրքերն ապրեն։ ՀՀ-ում լուրջ անվտանգության խնդիր կա»։

Եվ որքան էլ որ բնակիչները բոյկոտում են, իսկ գյուղի վարչական ղեկավարը կոչ է անում իր մարտական ընկերներին հավաքվել և ինքնապաշտպանության անցնել, քանզի բնակիչները չեն պատրաստվում լքել գյուղը, վարչապետի պաշտոնը զբաղեցնեղ անձը Հայաստանի սահմանները, բարձրադիր հատվածները բանավոր հիմքով նվիրում է թշնամուն։

Հայաստանը մի երկիր է, ուր պաշտպանության նախարարն այս հարցերից անտեղյակ է, ՀՀ ՊՆ-ից լրատվամիջոցներին ուղղորդում են ՏԿՆ, ՏԿՆ-ից՝ կառավարություն, իսկ կառավարությունում մեկ անուն գիտեն՝ պարտված, կապիտուլյացված, երկիրը թուրքին գրավոր ու բանավոր հանձնած և այդ հանձնումը շարունակող, բայցև՝ աթոռից կառչած Փաշինյան Նիկոլ։

Այն, ինչ անում է Փաշինյանը, բնականաբար, քրեական հանցագործություն է, բայց ըստ էության, իր հանցագործության մեջ նա ծավալվելու ցանկություն ունի, արդեն

իսկ խոսվում է, թե՝ առաջիկայում սպասվում են նույնատիպ գործընթացներ՝ Գեղարքունիքի և Տավուշի մարզերի սահմանամերձ գյուղերում և ու բնակավայրերում։
Հայաստանը մաս առ մաս Փաշինյանը նվիրաբերում է Ադրբեջանին։ Եվ դա արվում է ՀՀ իրավապահ համակարգի պատասխանատուների աչքի առաջ։

Մասնավորաբար, Նիկոլ Փաշինյանն այս հանցագործությունը կատարում է ՀՀ գլխավոր դատախազի աչքի առաջ և վերջինս, որ կարող է կանխել կատարվող հանցագործությունը՝ անհապաղ ձերբակալելով Փաշինյանին՝ ՀՀ քրեական օրենսգրքի 299-րդ հոդվածով նախատեսված արարքի հատկանիշներով, այն է՝ ՀՀ ինքնիշխանության, տարածքային ամբողջականության և արտաքին անվտագության դեմ իրագործվող հանցագործության փաստի առթիվ քրեական հետապնդում հարուցելու, նշված հանցավոր արարքները կանխելու և խափանելու ուղղությամբ, ոչինչ չի ձեռնարկում։

ՀՀ գլխավոր դատախազն, ըստ էության, ոչ միայն չի փորձում կանխել կատարվող հանցագործությունը, այլև՝ կամավոր ստանձնում է Նիկոլ Փաշինյանի պարզ հանցակցի դերը՝ ինքն էլ մասնակից դառնալով ահավոր հանցագործությանը։

Այսպիսով, հանրապետության գլխավոր դատախազը արդեն իսկ մեղադրվում է ՀՀ քրեական օրենսգրքի Հոդված 37-ի հատկանիշներով հանցագործություն կատարելու մեջ՝ «Հանցակցություն» է համարվում երկու կամ ավելի անձանց դիտավորյալ համատեղ մասնակցությունը դիտավորյալ հանցագործությանը:

Դիտավորյալ, թե՝ ստիպողաբար, արդեն էական չէ, փաստն այն է, որ գլխավոր դատախազը կամակատար է դառնում, գործիք հանցագործի ձեռքին, նրա հանցակիցը և ուրեմն, հանցանքի պատասխանատուն։

Այսպիսով, ՀՀ գլխավոր դատախազը ՀՀ ինքնիշխանության, տարածքային ամբողջականության և արտաքին անվտագության դեմ իրագործվող հանցագործության հանցակից-մասնակից է և ՀՀ վարչապետ Նիկոլ Փաշինյանի հետ ամբողջությամբ կիսում է կատարվող ահավոր հանցագործության ողջ պատասխանատվությունը։

Աղբյուր` Փաստինֆո