Փաստ ինֆո

«Ասում եք՝ ադրբեջանական կողմը կրկի՞ն շրջափակել է Կապանի օդանավակայանը… Իսկ ի՞նչ նոր բան կա այստեղ, մի քանի շաբաթ առաջ նույնպես շրջափակել էին…Սա վերջին ամիսների մեր ամենօրյա դառը իրականությունն է: Մեկ ամիս է բղավում ենք՝ մենք պետականություն ենք կորցնում, սթափվեք, խելքի եկեք: Հրատապ փոփոխությունների խիստ կարիք կա, այլապես կարող է ուշ լինել, չափազանց ուշ, երբ մենք արդեն չենք ունենա ո´չ երկիր, ո´չ պետություն,- «Փաստինֆո»-ի հետ զրույցում ասել է քաղաքական վերլուծաբան Թևան Պողոսյանը, անդրադառնալով վերջին օրերին Հայաստանի հարավային սահմաններին և Արցախում տեղի ունեցող խիստ վտանգավոր զարգացումներին։

«Այս մարդը (նկատի ունի Նիկոլ Փաշինյանին, հեղ.) պետք է հրաժարական ներկայացնի, թողնի գնա, որպեսզի գա մի այնպիսի մեկը, ով կարող է ստեղծված իրավիճակում պահել գոնե մեր պարտականությունը: Եթե նա գաղտնի պայմանավորվածություն ունի՝ կյանքի կոչել թշնամու բոլոր քմահաճույքները, որոնք մեր երկիրն արդեն իսկ կործանման են հասցրել, ապա մենք, համատեղ ուժերով պետք է կարողանաք այնպես անել, որ այդ պայմանավորվածությունները կյանքի չկոչվեն: Իսկ, եթե նա վախենում է հրաժարական ներկայացնել, որովհետև չգիտի, թե ի՞նչ կարող է պատահել իր հետ դրանից հետո, ուրեմն, մեզ վախկոտ ղեկավար պետք չէ: Արցախում մի հին, պապական խոսք կա՝ «Քաք կերած մարդու անա ի՞նչ օզիս», այսինքն՝ ծեծ կերած մարդուց ի՞նչ կարող ես սպասել: Հիմա սա ծեծ կերած մարդ է՝ Ալիևից ծեծվել է, սրանից ի՞նչ կարող ենք այլևս սպասել…Նույնիսկ Ալիևն է հասկացել՝ այս մարդն իր համար ուղղակի անգին գտածո է, ուրեմն, հանուն Հայաստանի լինելիության, կարո՞ղ է այդ նույն մարդը գիտակցել, որ ինքը պետք է գնա, որպեսզի մենք կարողանանք պահել մեր պետականությունը»,- ասում է Թևան Պողոսյանը:

Անդրադառնալով քիչ առաջ հայտնի դարձած ցավալի իրողությանը, ըստ որի, անգամ նվաստացուցիչ կապիտուլյացիայի ստորագրումից շաբաթներ անց, այսօր մենք ունենք 171 նոր գերի և 11 սպանված զինծառայող, քաղաքական վերլուծաբանը նկատում է՝ սա պետական ինստիտուտների գործունեության ցավալի անգործության հետևանք է, որի շարունակելիության դեպքում, դրա ողբերգական հետևանքները շուտով տեսանելի կդառնան բոլորին: Ինչքան երկար շարունակվի այս իրավիճակն, այնքան շատ են լինելու հայկական կողմի կորուստները, ամեն օր նոր՝ մարդկային կամ տարածքային կորուստների մասին ենք լսելու, նկատում է զրուցակիցը:

Խոսելով այսօր Պաշտպանության նախարարության բակում՝ անհետ կորած և գերեվարված զինծառայողների ընտանիքի անդամների կողմից իրականացված ակցիայի մասին, որը տեղի է ունեցել խիստ լարված մթնոլորտում, Թևան Պողոսյանը նկատում է՝ տեղի ունեցածը նույնպես՝ պետական ապարատի ամենաթողության արդյունք է. «Ադրբեջանական կողմը տեղեկություններ է տարածում, որ իր կողմից գերեվարվել են հարյուրից ավելի հայ զինծառայողներ: Հերիք չէ, ոչ Պաշտպանության նախարարությունը երկար ժամանակ չի արձագանքում այս տեղեկությանը, պարզապես լուռ է, հետո էլ մի անհասկանալի բովանդակությամբ հայտարարություն է անում, որտեղ ասվում է, թե իրենք գերեվարված՝ հարյուրից ավել զինծառայողների մասին իմանում են ինտերնետից, մի բան էլ վերջում ավելացնում են, որ լուրի իսկությունը ճշտելու համար դիմել են Պաշտպանության բանակին: Հասկանո՞ւմ եք սա ինչ է…Ի պատասխան այս ամենին, այսօր Արցախի նախագահը հանդես եկավ հայտարարությամբ և, ի թիվս շատ այլ հարցերի, հայտարարեց հետևյալը՝ ոչ ոքի համար գաղտնիք չէ, թե ում է ենթարկվում Արցախի Պաշտպանության բանակը…Այս ամենը տոտալ ամենաթողության արդյունք է, որը մեր երկրի համար ողբերգությամբ է ավարտվելու, ուրիշ տարբերակ չկա, եթե այս վայրէջքը հրատապ կերպով չկանգնեցվի»,- ասում է Թևան Պողսյանը:

Խոսելով այսօր տարածված այն տեղեկության մասին, թե ադրբեջանական կողմին են հանձնվում նաև Կապանի ուղղությամբ Զանգիլանի տարածքները, Թևան Պողոսյանը պատասխանում է. «Իսկ ո՞ւր է Հայաստանի Հանրապետության Արտաքին գործերի նախարարը, ինչո՞ւ նա արագ կերպով միջոցներ չի իրականացնում, ինչո՞ւ նա արդեն Մոսկվայում չէ՝ թույլ չտալու համար հերթական՝ անհեթեթ պայմաններում տեղի ունեցող տարածքային կորուստը: Այնպես որ, եկեք այստեղ դադարեցնենք մեր զրույցը, որովհետև ցանկացած այլ ցավոտ հարց, որը դուք կբարձրացնենք՝ ակնկալելով իմ պատասխանը, այն նույնն է լինելու՝ պետք է արագ և հրատապ կերպով հասնենք պարտված իշխանության հեռացմանը և նոր առաջնորդի հետ փորձենք ոտքի կանգնեցնել տապալված պետական համակարգը: Հակառակ դեպքում, դուք կարող եք զանգահարել ինձ և հարցնել՝ իսկ ինչպե՞ս մենք կորցրեցինք Սյունիքը, և ես ոչ մի պատասխան չեմ ունենա, ձեզ տալու համար»,- եզրափակում է զրույցը քաղաքական վերլուծաբան Թևան Պողոսյանը:
Հեղինակ՝ Նվարդ Մանվելյան

Աղբյուր` Փաստինֆո