Փաստ ինֆո

Ադրբեջանի Պաշտպանության նախարարությունը Սոթքի ոսկու հանքից կադրեր է հրապարակել։ Տեսանյութում երևում է՝ հանքի շինության վրա ադրբեջանական դրոշ է դրված։ 

«Փաստինֆո»-ի հետ զրույցում Սոթքի համայնքապետ Հակոբ Ավետյանը նշեց, որ այն տարածքը, որն անցել է թշնամուն, այժմ նրանց վերահսկողության տակ է և նրանց դրոշն էլ դրված է։ Համայնքապետը նշեց, որ հանքն այժմ մասնակի է աշխատում. «Հանքն ամբողջությամբ չի աշխատում։ Մեր տարածքում որ մասը մնացել է, այդտեղ փոքր չափով աշխատանքներ են անում։ Աշխատողներն աշխատանքի գնում են, բայց թե կոնկրետ ինչ են անում, չեմ կարող ասել»,-ասաց Հակոբ Ավետյանը։

Հարցին՝ թշնամու վերահսկողության ներքո գտնվող տարածքում մնացե՞լ է տեխնիկա, համայնքապետն ասաց.«Մյուս կողմում տեխնիկաներ կան, բայց քանի որ դրանք ռուսական տեխնիկաներ են, խնդիր չի առաջանա»։

Անդրադառնալով հարցին՝ հանքի քա՞նի աշխատակից չի գնում աշխատանքի և կորցրել է աշխատանքը, Հակոբ Ավետյանը նկատեց՝ այժմ անորոշ վիճակ է, և տնօրինությունն էլ չգիտի՝ ինչ պետք է լինի. «Դեռ բանակցությունների փուլում է։ Հստակ չգիտեմ՝ այնտեղ հիմա ինչ է արվում։ Կան տարբերակներ. Հնարավոր է՝ ինչ-որ պայմանավորվածություններ լինեն և հանքն ամբողջությամբ աշխատի։ Այդ տարբերակն էլ է քննարկվում։ Ես էլ այդքան հավանական չեմ համարում դա, բայց անհավանական բան չկա»,-ասաց Հակոբ Ավետյանը։

Ինչ վերաբերում է գյուղացիների մտահոգություններին, որ դժվար կլինի զբաղվել գյուղատնտեսական աշխատանքով, քանի որ արդբեջանական կողմի մշտադիտարկման տակ են լինելու, Հակոբ Ավետյանը նշեց, որ գյուղացիների անհանգստությունները տեղին են. «Եթե կարողացան այսքան առաջ գալ, հիմա մարդիկ չգիտեն՝ այս սահմանի վրա խաղաղ վիճակը կպահպանվի, թե՞ խախտումներ կլինեն թշնամու կողմից։ Գյուղացիները եթե աշխատում են, մի կրակոցն էլ կարող է խուճապ առաջացնել և մարդիկ վախենան տարածքին մոտենան։ Այս պահին քանի որ ձմեռ է, ոչ մի դաշտի գործ չի արվում, անասուններն էլ դուրս չեն գնում։ Այդ խնդիրն արդեն գարնանը կառաջանա»,-հավելեց համայնքապետը։

Աղբյուր` Փաստինֆո