Փաստ ինֆո

«Հայրենիք ենք կորցնում, հայրենիքը վտանգված է: Նոյեմբերի հայտնի համաձայնագրից անմիջապես հետո ես բարձրաձայնել եմ այս մասին և ընդգծել, որ հաջորդիվ թիրախավորվելու է Սյունիքը: Հիմա ինչքան կկարողանան կտանեն՝ GPS-ով սահմաններ կգծեն, մի բան, որի նախադեպը մինչ այսօր աշխարհում չի եղել, չկա նման բան, որ GPS-ով սահմաններ գծեն , - ասում է քաղաքական վերլուծաբան Թևան Պողոսյանը՝ «Փաստինֆո»-ի հետ զրույցում վերլուծելով վերջին ամիսներին Հայաստանում և մասնավորապես Հայաստանի Հանրապետության հարավային սահմաններին տեղի ունեցող զարգացումներն ու հավելում,- ես Վրաստանի օրինակն էի բերել, որտեղ ամբողջական սահմանը դեռ սահմանազատված չէ: Ինչո՞ւ եմ Վրաստանի օրինակը բերում, որ ցույց տամ՝ անհրաժեշտ է երկարատև բանակցություն վարել, դելիմիտացիա անել, սահմանային տարանջատումները հստակորեն գծել և այն:

«Էլ չեմ ասում, որ հայտնի չէ, թե այսպես կոչված GPS համակարգով սահմանագծման ժամանակ ով ինչ քարտեզ է օգտագործում՝ Սովետական Ադրբեջանի տպագրած քարտեզը, թե օրինակ Սովետական Հայաստանի քարտեզը, գուցե Սովետական Սոցիալիստական Հանրապետության միջազգային քարտեզ է օգտագործվում…Ոչ ոք ոչինչ չգիտի: Չմոռանանք նաև՝ Ռուսաստանը հայտարարել է, որ չի ընդունում Սովետական Միության ժամանակ տեղի ունեցած սահմանազատումները, հատկապես Ղրիմի պարագայում: Հիմա էլ եռակողմ ստորագրող կողմերից մեկը հենց Ռուսաստանն է: Եվ որպես միջնորդ, երևի ճիշտ կլինի հենց իր մոտեցումն օգտագործենք բանակցային գործընթացում: Հետևաբար, մենք պետք է կարողանանք հասկանալ, որ այսօրվա մեր ունեցած բոլոր խնդիրներով, երբ մենք գտնվում ենք ծայրահեղ իրավիճակում, բանակցային գործընթացները պետք է շարունակվեն, գործի դնելով բանակցային հմտության բոլոր հնարավոր և անհնար տարբերակները», - նշեց Թ.Պողոսյանը։

Հարցին՝ ո՞վ է իրավասու այսօրինակ իրավիճակում հայկական կողմից նստել բանակցային սեղանի շուրջ և բանակցել թշնամու հետ` Թևան Պողոսյանը պատասխանում է՝ դա հաստատ այսօրվա իշխանությունը չի լինելու. «Նոր բանակցող է լինելու: Նոր Կառավարություն պետք է գա: Սրանք պետք է հեռանան և բացեն այդ հնարավորությունը: Պետք է գիտակցեն, որ իրենց հեռացումը հանուն պետական շահի է: Ես չեմ ցանկանա, որ սրան հասնելու համար նորից արյուն թափվի: Բավ է՝ 5000 զոհ տվեցինք, չի կարելի ոչ մի հայի արյուն թափել: Ես նույնիսկ առաջարկ եմ արել հանրության տարբեր շերտերի՝ հետևել ԵՊՀ-ի կամ Գիտությունների Ազգային Ակադեմիայի օրինակներին: Համախմբվեք և հիմնարկներով կոչ արեք, որ սա պետք է հեռանա, որ այլևս չեք ընդունում այս իշխանությունների ներկայությունը մեր երկրում, ինքներդ էլ սրանով օրինակ ծառայելով մնացածին, որ չասեն՝ նայեք թե փողոցում քանի հոգի կա, եթե սա է նրանց գիտակցման նշաձողը: Այս իշխանությունն ուներ նաև խոստում՝ եթե ժողովուրդը պահանջի, որ իրենք հեռանան, ապա կհեռանան, ահա, ժողովրդի պահանջը հստակ ձևավորված է, ինչո՞ւ չեք հեռանում»:

Հարցին՝ ինչպե՞ս կարող է Հայաստանը բանակցային գործընթացում այս չափով հենվել ռուսական կողմի վրա, ակնկալելով նրա օգնությունն, այն պարագայում, երբ Հայաստանում վերջին 2.5 տարիների ընթացքում այդ պետության հետ ունեցած հարաբերությունները հետևողականորեն վատթարացման են գնացել, քաղաքական վերլուծաբանը պատասխանում է՝ իսկ ինչո՞ւ միայն Ռուսատանի հետ են վատթարացել Հայաստանի Հանրապետության հարաբերությունները, ինչո՞ւ օրինակ այստեղ չհիշենք նաև մեր հարևան Իրանին, Եվրոպային կամ ԱՄՆ-ին: Պետք է ուղղակի հասկանալ՝ եթե դու բոլորի կողմից անընդունելի ես, պարզապես հեռացիր և բացիր ճանապարհը՝ փրկելու երկիրն այս անելանելի իրավիճակից, որում մենք հայտնվել ենք՝ սկսած տնտեսական, սոցիալական, ներքաղաքական, առողջապահական, կրթական, վերջացրած արտաքին հարաբերություններից, էլ չխոսենք բարոյահոգեբանական վիճակի մասին, ասում է Թևան Պողոսյանը՝ եզրափակելով զրույցը:

Հեղինակ՝ Նվարդ Մանվելյան

Աղբյուր` Փաստինֆո