Փաստ ինֆո

«Շուշիի ոչ մի քաղաքապետ չէր լինելու ադրբեջանցի, փախստականների հարցը քննարկվել է, բայց դա դեռ հարց է՝ ադրբեջանցիները գալո՞ւ էին այդտեղ թե ոչ»,- այս մասին խորհրդարանական ճեպազրույցների ժամանակ հայտնեց ԼՀԿ ղեկավար Էդմոն Մարուքյանը։

Ընդդիմադիր պատգամավորը նշեց, որ նույն իրավիճակում մենք ենք հայտնվել՝ Հադրութի պարագայում։ Մոտավորապես 15 հազար մարդ է ապրել Հադրութում և հարակից շրջաններում։ Հարցրեց՝ հայկական կողմը պահանջե՞լ է Հադրութ վերադառնան մեր փախստականները։

«Մենք ուսումնասիրում ենք ստորագրված փաստաթուղթը, մենք ուսումնասիրում ենք նաև օրենսդրությունը՝ սահմանադրության համատեքստում, որի համաձայն փաստաթուղթը համարվում է քաղաքական կամ ռազմական բնույթ կրող փաստաթուղթ, որը չի վավերացվել խորհրդարանում, այն նաև առաջացնում է խնդիրներ՝ տարածքային ամբողջականության հետ կապված»,- ասաց Մարուքյանը։

Պատգամավորն ասաց, որ իշխանությանը հնարավորություն չեն տալու որևէ օրենք կիրառի իրենց նկատմամբ, որը կխանգարի ընդդիմադիրների սկսած պրոցեսներին, քանի որ շատ կարճ ժամկետներ են սահմանվել ստորագրված փաստաթղթով։

«Այս պրոցեսներն արագ են ընթանում, վերջնաժամկետները արագ են սահմանված։ Երեկ Մարտակերտի շրջանի 7 գյուղից ասել են դուրս եկեք, հնարավոր էր արդյոք բանակցել, ձայն բարձրացնել, այդ գյուղերի հետ հարցը կարգավորել, բայց ԱԳ նախարար չունենք, ունենք վարչապետ, որը երկիրը հասցրել է սրան։ Երկիրը չի ստաբիլանալու, քանի դեռ պարտության սիմվոլ վարչապետը մնալու է»։

Մարուքյանը տեղեկացրեց, որ առաջարկել են փաստահավաք հանձնաժողով ստեղծել, որը կուսումնասիրի պատերազմից առաջ, ընթացքում և հետո տեղի ունեցած դեպքերը։
«Ռազմական դրության հայտարարման միակ հիմքը եղել է մոբիլիզացիայի ապահովումը, որը կազմակերպվել է խայտառակ ձևով։ Բազմաթիվ մարդիկ այդպես էլ չեն կանչվել։ Լավ, էն ժամանակ՝ Վազգենի ժամանակ մարշուտկաներով մարդկանց փողոցից տանում էին, ինչի՞ հիմա չեն տանում։ Այնքան սուտ կա ժողովրդին մատուցած»։

Անդրադառնալով փաստաթղթի 6-րդ և 9-րդ կետերին՝ Մարուքյանը վստահեցրեց, որ Հայաստանով ճանապարհ տրամադրել՝ նշանակում է Հայաստանի տարածքային ամբողջականության դեմ քայլ անել։ Հնարավոր է ժամանակը գա և դրա հետ կապված քրեաիրավական գնահատական տրվի։

«Եթե մի կետում ասում է, որ ապաշրջափակում է տեղի ունենում, սահմանները բոլորի նկատմամբ բացում ենք՝ այդ միջանցքը ինչի՞ ենք տալիս։ Երեք տարի մեր վրա ժամկետ է դրված դրանք կառուցելու համար։ Հազար ու մի հարց կա՝ այդ ճանապարհը ո՞վ է սարքում, ո՞վ Է հսկում, իրար հետ ենք օգտագործո՞ւմ , թե միայն՝ մենք։ Այս փաստաթղթի արդյունքում Ադրբեջանը պատրաստվում է մեզ դատի տալ։ Այս իշխանության արարքի պատճառով մենք ենք պատասխան տալու»,- ասաց պատգամավորը։

Աղբյուր` Փաստինֆո