Փաստ ինֆո

Կորոնավիրուսի դրական դեպքերի աճն անխուսափելի պրոցես է, քանի որ ի սկզբանե բաց էր թողնվել երկրի համաճարակի ընթացքը: «Փաստինֆո»-ի հետ զրույցում նման կարծիք արտահայտեց համաճարակաբանը:

Վերջինս նշում է՝ միայն դիմակ կրելով անհնար էր պայքարել վարակի դեմ, քանի որ մարդիկ դիմակ կրելով իրենց պաշտպանված են զգում և կարծում են՝ կարող են հանգիստ շփվել կորոնավիրուսով հիվանդի հետ առանց պատշաճ հեռավորության. «Դիմակ կրելու բացասական կողմն այն է, որ մարդը երբ դիմակ է կրում, իրեն հանգիստ է զգում և անտեսում է հեռավորությունը պահելու կանոնը, մինչդեռ հեռավորություն պահելն ամենաէական գործոնն է, որովհետև ոչ մի դիմակ հերմետիկ չի փակում, մենք կողքերից օդը շնչում ենք»,-նշեց համաճարակաբանը՝ ընդգծելով, որ իրական պաշտպանությունը լինելու է հնարավորինս փակ, չօդափոխվող տարածքներում անհրաժեշտ հեռավորությունը պահպանելով:

Համաճարակաբանը գտնում է՝ այս փուլում թեստավորում անելը և դրա վրա ռեսուրս ծախսելն այդքան էլ արդյունավետ չէ. «Ենթադրենք գրում են՝ այսօր հայտնաբերեցին 1000 կամ 2000 դեպք: Այդ 2000 դեպքի 90 տոկոսն անախտանիշ ձևով է ընթանում և որևէ խնդիր չի առաջացնում: Այդ թվերը մարդկանց ավելի է վախեցնում, ինչը պանիկա է առաջացնում: Եթե համարում ենք, որ կորոնավիրուսը պատերազմ է անտեսանելի թշնամու դեմ, ապա մենք այս պանիկայով չենք նպաստում դրա դեմ պայքարին»,-նշեց համաճարակաբանը:

Համաճարակաբանը կարծում է, որ ի վերջո բոլորս էլ հիվանդանալու ենք և լավանանք: Ընդ որում՝ բոլորովին պարտադիր չէ, որ բոլորը վարակվեն, քանի որ գործում է խաչաձև իմունիտետ հասկացությունը. «Այն մարդիկ, որոնք վերջին տարիներին կորոնավիրուսային ընտանիքի որևէ վիրուսով երբևէ վարակվել են, իրենք շատ ավելի թեթև են տանելու, նույնիսկ ասիմպտոմ ձևով: Կարող է որպես այդպիսին նույնիսկ վարակում չլինի իրենց մոտ: Այսինքն իմուն համակարգը շատ արագ պատասխանում է, մարդը չի էլ վարակվում: Նրան թեստավորելու դեպքում եւս հնարավոր է ոչ մի արդյունք ցույց չտա, այնինչ կարող է կորոնավիրուսով հիվանդի հետ շփված լինի, բայց նա պարզապես չի վարակվելու»,-եզրափակեց համաճարակաբանը:

Աղբյուր` Փաստինֆո