Փաստ ինֆո

Արցախը պինդ է, կանգնուն է, բոլորը վճռական են՝ մինչև վերջ պաշտպանելու մեր հայրենիքի սահմանները։ Այս մասին ճեպազրույցների ընթացքում ասել է Դավիթ Բաբայանը։

Թեև   կան նաև լավ լուրեր, մասնավորապես՝ հակառակորդը մեծ կորուստներ է տվել մի շարք հատվածներում և նրա մեծածավալ հարձակման փորձը ձախողվել է, մեծ ստորաբաժանումներ են վերացվել, սակայն հակառակորդի կողմից շարունակվել է ահաբեկչական գործողությունները, ինչը ևս մեկ անգամ ապացուցեց այն, որ Ադրբեջանն ահաբեկչական երկիր է։ Բաբայանը հայտնեց, որ ամբողջ գիշեր հրթիռակոծում և ռմբակոծում էին Ստեփանակերտը, մի շարք բնակավայրեր, գյուղեր և քաղաքներ, կան տուժածներ, ավերածություններ, բայց որևէ ձևով ժողովուրդն իր վճռականությունը չի կորցրել։ Բաբայանի խոսքով՝ ակտիվանում է միջազգային ներգրավվածությունը և այն գործընթացները, որին ականատես ենք լինում, թույլ են տալիս կանխատեսելու, որ մոտ ապագայում կլինեն ավելի մեծ ճնշումներ՝ Թուրքիայի և Ադրբեջանի վրա։ Բաբայանը նշեց, որ այժմ համառ մարտերը շարունակվում են, կան տեղեր, որտեղ համեմատաբար հանգիստ է։

«Ինչպես տեսնում եք՝ Ստեփանակերտը կա և կլինի։ Մենք պետք է լցվենք համբերությամբ, հանկարծ որևէ խուճապային տրամադրություն չլինի։ Հակառակորդն այդ ուղղությամբ աշխատում է՝ տարածելով կեղծ տեղեկություններ, փորձելով ահաբեկել մեր բնակչությանը»,- ասաց Բաբայանը՝ նշելով, որ մեր ժողովրդի ոգին բարձր է և մարտունակ և այն, ինչ անում է այսօր Արցախը և մայր Հայաստանը պայքար է ողջ քաղաքակիրթ աշխարհի համար։ Այստեղ է վճռվում Փարիզի ճակատագիրը, Լոնդոնի, Մոսկվայի, Վաշինգտոնի, Թեհրանի, Պեկինի ճակատագիրը՝ մոտակա տարիների ընթացքում, քանի որ Թուրքիայի և Ադրբեջանի հանցավոր քաղաքականության նպատակը միայն Հայաստանը և Արցախը չեն։

«Եթե նրանք հասնեն իրենց նենգ և անմարդկային նպատակներին, ապա Բոսվորից մինչև Վոլգա կստեղծվի ահաբեկչական խալիֆայություն, ապա կսկսվի ներթափանցումն Արևմտյան Եվրոպա և ԱՄՆ»,- նշեց Բաբայանը՝ հավելելով, որ դա շատ լավ հասկանում են և, անկախ բարդ փոխհարաբերություններից մեծ տերությունների միջև, տեսնում ենք կոնսոլիդացված մոտեցում։ Բացի դա՝ ուժեղանում է նաև վճռականությունը՝ տարբեր երկրների անմիջական հարվածներ հասցնելու ահաբեկիչներին։

Աղբյուր` Փաստինֆո