Փաստ ինֆո

ԵՊՀ ուսանողները պահանջում են ուսման վարձերի մասնակի փոխհատուցում:  Այսօր ուսխորհրդի նախաձեռնությամբ ուսանողները ԵՊՀ գլխավոր մասնաշենքից  քայլերթ են իրականացրել դեպի կառավարության շենք՝ խնդրանք-պահանջագրով, որը ստորագրել է ավելի քան 5000 ուսանող: 

Ուսանողների կարծիքով, համավարակով պայմանավորված հեռավար կրթությունը բարձր որակով չի ընթացել, ինչի հետևանքով տուժել են միայն ուսանողներն ու հիմա ստիպված են վճարել չստացած կրթության դիմաց:
Բացի այդ, ուսանողները նշում են , որ այս ընթացքում , նրանց ծնողները ևս մատնվել են հարկադիր պարապուրդի , ինչը նույնպես բարդացնում է ուսման վարձի վճարումը:

«Կարծում եմ՝ Կառավարությունը պետք է իր հոգածության տակ գտնվող կրթության ոլորտը ուշադրության կենտրոնում պահի և ուսանողներին ընդառաջի, որ ֆինանսական խնդիրների պատճառով կրթությունից չզրկվի: Կրթությունը մեր ապագան է, և դրա վրա կատարված ցանկացած ներդրում արդարացված է»,-այս մասին լրագրողների հետ զրույցում ասաց ԵՊՀ ՈՒԽ նախագահ Դավիթ Ափոյանը:

Ըստ նրա, միայն ԵՊՀ-ից 500-ից ավելի ուսանող կանգնած է ԲՈՒՀ-ից դուրս մնալու շեմին, որոնք դեռ նախորդ տարվա ուսման վարձը չեն վճարել : Իսկ առաջին կուրսեցիների համար ուսման վարձավճարը թանկացել է 70.000-ից 160.000 դրամի չափով:
«Ճիշտ է՝ Կառավարության աջակցության ծրագիր է եղել, սակայն այն կազմվել է ոչ թե սոցիալական, այլ կրթական բաղադրիչով, ինչի հետևանքով էլ, ինչպես նշեցինք,  ուսանողները չեն վճարել  նախորդ տարվա ուսման վարձը»,-նշեց ԵՊՀ ՈՒԽ նախագահը: 

Աղբյուր` Փաստինֆո