Փաստ ինֆո

Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, բավարարեց Հանրային ծառայությունները կարգավորող հանձնաժողովի անդամ Մուշեղ Կոշեցյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։ Այս մասին «Փաստինֆո»-ի հետ զրույցում ասաց պաշտպան Գեղամ Հակոբյանը՝ նշելով, որ կալանավորման որոշումն ակնհայտ ապօրինի է և դատարանի որոշման դեմ վերաքննիչ բողոք կներկայացնի։

«Այլ բան չէինք էլ սպասում այս դատարանից և դատավորից»,- նշեց պաշտպանը՝ հավելելով, որ ակնհայտ ապօրինության հետ գործ ունենք, խայտառակ իրականության մեջ ենք։

Նրա փոխանցմամբ՝ դատարանը միևնույն ժամանակ բավարարել է Մուշեղ Կոշեցյանին ձերբակալելու որոշման դեմ պաշտպանի բողոքը՝ ճանաչելով այն ոչ իրավաչափ։

Նշենք, որ ՀՔԾ-ն Կոշեցյանին օգոստոսի 6-ի առավոտյան հրավիրել էր հարցաքննության՝ կասկածյալի կարգավիճակով, ժամը 09։00-ին, նա ներկայացել է և 09։11-ին՝ ձերբակալվել։ Մուշեղ Կոշեցյանին ձերբակալելու որոշման դեմ բողոք է ներկայացվել դատարան, որը մակագրվել է Երևանի ընդհանուր իրավասության դատարանի դատավոր Մնացական Մարտիրոսյանին։ Հակոբյանի փոխանցմամբ՝ երեկ՝ օգոստոսի 7-ին, ժամը 14։00-ին դատական նիստ էր նշանակված, սակայն նիստից 1-2 րոպե առաջ դատարան մուտքագրվեց կալանավորման միջնորդությունը։

«Հավանաբար, իմանալով ով է դատավորը, ինչ դիրքորոշում ունի առհասարակ, շատ հապճեպ կերպով նախ մեղադրանք առաջադրվեց, ապա՝ կալանավորման միջնորդություն ներկայացվեց, որ զուգահեռ քննություն կատարվեր»,- ասաց պաշտպանը՝ տեղեկացնելով, որ դատական նիստը շարունակվել է երեկ՝ ժամը 18։00-ից մինչև 20։00-ի սահմանները, ինչից հետո դատարանը հեռացել էր խորհրդակցական սենյակ։

Պաշտպանը պատահական չի համարում, որ ձերբակալման որոշման դեմ բողոքը և կալանավորման միջնորդությունը մակագրվել է դատավոր Մնացական Մարտիրոսյանին, ինչի մասին բարձրաձայն դատավորին էլ է ասել։
«Արատավոր, ցավալի պրակտիկա է ստեղծվում մեր իրականության մեջ։ Հաշվարկել են, որ «Կենտրոն» նստավայրի հերթապահության օրերը լիներ։ Կենտրոն դատարանում կան մի քանի դատավորներ, որոնք անխտիր կայացնում են նախաքննական մարմիններին ցանկալի որոշումներ»,- նշեց պաշտպանը։Նրա խոսքով՝ առաջադրված մեղադրանքն ակնհայտ ապօրինի է և ոչ միայն ձերբակալման, այնպես էլ՝ կալանավորման որևէ հիմք գոյություն չունի։

«9 տարի առաջ կոլեգիալ մարմնի կազմով, ընդամենը անձի ձայնի՝ ազատ քվեարկության համար էր այս մեղադրանքը, որևէ այլ հանգամանք չկա, այսինքն՝ չկա որ անձը շահագրգռված է եղել, իմացել է՝ ինչի համար, մեկը խնդրել է, պարտադրել է, չկա նման բան»,- ասաց Հակոբյանը՝ հավելելով, որ մեղադրանքն առաջադրվել է ՀՀ ՔՕ 308-րդ հոդվածի 2-րդ մասով, այսինքն՝ պաշտոնեական լիազորությունների չարաշահելու մեղադրանք, այդ մեղադրանքի դեպքում պարտադիր հատկանիշ է հանդիսանում շահագրգռվածություն, այսինքն՝ խմբային շահը, անձնական շահագրգռվածությունը, որևէ սուբյեկտիվ կողմ գոյություն չունի։

Նրա խոսքով՝ հիմնավոր կասկածը հիմնավորելու առումով մեջբերում են կատարում մի քանի վկաների, սակայն որևէ վկա չկա, որը հիմնավոր կասկածի առումով արժեքավոր ցուցմունք տա, առավել ևս՝ Մուշեղ Կոշեցյանի առումով։

«Ընդամենը ունենք փաստ, որ Մուշեղ Կոշեցյանը հանդիսացել է տվյալ հանձնաժողովի անդամ, մասնակցել է հարցի քննարկմանը և ընդամենը կողմ է քվեարկել։ Մեղադրանքը միայն դրան է վերաբերում»,- ասաց պաշտպանը՝ ընդգծելով, որ մեղադրանքն ակնհայտ ապօրինի է։

Ինչ վերաբերում է կալանավորման հիմքերի բացակայությանը, այդ թվում՝ ձերբակալությունը բացառող հանգամանքներին, ապա պաշտպանը հայտնեց, որ կալանավորման միջնորդության մեջ որպես կալանավորման հիմք ներկայացվել է, որ Կոշեցյանը կարող է թաքնվել, խուսափել քննությունից՝ հաշվի առնելով պատժի խստությունը և իր դեմ ցուցմունք տվող անձանց նկատմամբ ազդեցություն գործադրել, մինչդեռ, նրա դեմ ցուցմունք տված անձ գոյություն չունի։

Ավելի վաղ տեղեկացրել ենք, որ քրեական գործով ՀՀ հանրային ծառայությունները կարգավորող հանձնաժողովի նախկին նախագահ Ռոբերտ Նազարյանին և ՀՀ հանրային ծառայությունները կարգավորող հանձնաժողովի նախկին անդամներ Շիրազ Կիրակոսյանին և Մուշեղ Կոշեցյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով՝ պաշտոնեական լիազորությունները չարաշահելու համար, որն առաջացրել է ծանր հետևանքներ։ գործով ձերբակալվել է նաև հանձնաժողովի նախագահի նախկին տեղակալ Նիկոլայ Գրիգորյանը:

Ըստ ՀՔԾ հաղորդագրության՝ քրեական գործի նախաքննության ընթացքում բավարար ապացույցներ են ձեռք բերվել, որ Ռոբերտ Նազարյանի և հանձնաժողովի վերը նշված անդամների գործողությունների պատճառով «Ձորագետ Հիդրո» ՍՊ ընկերության հիդրոէլեկտրակայանից արտադրված և առաքված էլեկտրական էներգիայի վաճառքի համար 2012-2019 թվականների ընթացքում սահմանվելիք սակագների փոխարեն նույն ժամանակահատվածների համար սահմանվել են կրկնակին գերազանցող սակագներ, որի հետևանքով «Ձորագետ Հիդրո» ՍՊ ընկերության կողմից ՀՀ-ում էլեկտրաէներգիա սպառող ֆիզիկական և իրավաբանական անձանցից հավելյալ ստացվել է առանձնապես խոշոր չափերի՝ 7,052,065,099 ՀՀ դրամ գումար:

Հեղինակ՝ Իզաբել Սահակյան

Աղբյուր` Փաստինֆո