Փաստ ինֆո

Ռուբեն Մելիքյանը և Արսեն Նիկողոսյանը մեր երկրի իրավական համայնքի լավագույն ներկայացուցիչներից են, ովքեր իրենց ներդրումն ունեն մի քանի սերունդների կրթական գործընթացում: Այս մասին ֆեյսբուքյան իր էջում գրում է սահմանադրագետ Գոհար Մելոյանը:

Բացի այդ, նրանք պրոֆեսիոնալներ են, ում համար բնականոն երևույթ է մասնագիտական էթիկայի պահպանումն անձնական շփումներում՝ անկախ քաղաքական հայացքներից, տարաբնույթ խնդիրների շուրջ ձևավորված մասնագիտական դիրքորոշումներից:

Հանրային խորհրդի նախագահը գործող իշխանության հավաքական կերպարն է, ում գործողություններից և արտահայտած դիրքորոշումներից ակնհայտ է, որ վերջինս սխալ տեղում է և պատկերացում չունի այն մարմնի խնդիրների և գործառույթների մասին, որը նախագահում է, ինչպես, օրինակ, հանրության բարձրացրած հիմնահարցերի վերաբերյալ վերլուծություններ և եզրակացություններ տալը, հասարակության տարբեր շերտերի հետաքրքրությունների և շահերի միջև առկա հակասությունների բացահայտումը, սոցիալական գործընկերների միջև սոցիալական երկխոսությանն աջակցումը և այլն:

Հակառակ պարագայում իշխող ուժը որևէ կերպ կարտահայտեր իր անհամաձայնությունը դրսևորվող անթույլատրելի վարքագծի վերաբեյալ:
Հատվում են սահմաններ, որոնք անդառնալի են՝ մանկահասակ երեխայի լուսանկարի հրապարակում, կանանց վիրավորանք, անհանդուրժողական կոչեր և այլն:

Հնարավոր է՝ ձեր արշինով եք չափում, բայց պատկերացրեք, որ գոյություն ունի զուգահեռ իրականություն, որտեղ մարդիկ կարող են լինել ընտանիքի անդամներ, ընկերներ, բարեկամներ, քավոր-սանիկ և միմյանց հետ չքննարկել ու չկիսվել մասնագիտական տիրույթում գտնվող հարցերով, անգամ պահպանել նորմալ հարաբերություններ՝ անկախ տարբերվող հայացքներից տարաբնույթ հարցերի վերաբերյալ:

Աղբյուր` Փաստինֆո