Փաստ ինֆո

Վարչապետ Նիկոլ Փաշինյանն այսօր իր ֆեյսբուքյան պաշտոնական էջով հայտնեց կայացրած հերթական որոշումների մասին, ըստ այդմ՝ գեներալ-լեյտենանտ Օնիկ Գասպարյանը նշանակվեց ԶՈՒ գլխավոր շտաբի պետ, գնդապետ, 29-ամյա Արգիշտի Քյարամյանը՝ ԱԱԾ տնօրեն, գնդապետ Վահե Ղազարյանը՝ ոստիկանության պետ: Որոշումներն ուժի մեջ կմտնեն հանրապետության նախագահի կողմից ստորագրվելուց հետո:

Իշխանության երկու տարիների ընթացքում մասնավորապես ուժային կառույցների՝ ԱԱԾ տնօրենի և ՀՀ ոստիկանապետի պաշտոններում վարչապետի կողմից արդեն երկրորդ անգամ կատարվող փոփոխությունները քաղտեխնոլոգ Կարեն Քոչարյանը պայմանավորում է նախևառաջ վստահության գործոնով, բայց և կարծիք հայտնում, որ խնդիրը համակարգային է և կապված չէ կոնկրետ անձերի հետ:

«Կարծում եմ՝ ուժայինների ղեկավարների փոփոխությունները ինչ-որ չափով կորոնավիրուսի, ինչ-որ չափով էլ քաղաքական ակտիվության ֆոնին է արվել, փորձում է իր համար ավելի վստահելի անձանց նշանակել: Բայց եթե խնդիրը տեղեկատվություն չտալու մեջ է, ինչպես մի քանի օր առաջ ինքն էր ասում իր ճեպազրույցի ժամանակ և դրա համար խնդրում էր, որ նկարներ ուղարկեն իրեն քաղաքացիները, չեմ կարծում, որ ԱԱԾ տնօրենի և ոստիկանապետի մեղավորությամբ է: Խնդիրն այստեղ այլ է՝ համակարգն աշխատո՞ւմ է, թե՞ ոչ, որովհետև, եթե համակարգը չի աշխատում, նոր ԱԱԾ տնօրենն ու ոստիկանապետն էլ չեն տալու տեղեկատվություն վարչապետին, որովհետև իրենց տեղեկատվություն չեն տալու համակարգից:

Չեն տալու ոչ թե որովհետև սրանք էլ են անվստահելի կամ նրանք են անվստահելի, այլ չեն տալու, որովհետև համակարգը չի տալու դա: Տեսնում ենք օրինակ՝ ոստիկանները ինչ խեղճացած են շատ դեպքերում, թեև մի հատ շոու արեցին, քաղաքացուն գետնին պառկեցրեցին, բայց հասկանում ենք, որ այն պահից, երբ ասել են՝ ոստիկանը մերն է, այլևս այդ բարդույթից չեն կարողանում դուրս գալ: Ոստիկանական համակարգն այդ պահից սկսած չի աշխատում: Իսկ ինչո՞ւ պետք է ոստիկանը աշխատի, ինչո՞ւ է աշխատում ամբողջ աշխարհում: Էնտուզիազմով չես կարող ոչ մի ուժային կառույց աշխատացնել: Հատկապես մեր նման փոքր երկրներում ոստիկանը մտածում է՝ ինչու վատամարդ լինեմ, եթե ստանում եմ 100-120 հազար դրամ աշխատավարձ: Լենա Նազարյանն է ասել, որ նվիրյալներ չկան: Եթե հեղափոխական թիմում նվիրյալներ չկան, ինչո՞ւ պետք է լինեն ոստիկանության կամ այլ համակարգերում: Այդ հարցը որ իրենց տան, պատասխանը կստանան»:

Կարեն Քոչարյանը կարծում է, որ պաշտոնափոխությունների շքերթը շարունակական կլինի, և դա պայմանավորված չէ միայն երկրում համաճարակային իրավիճակի վատթարացմամբ. «Կարծում եմ, որ շարունակական կլինի ընդհանարապես շատ բան: Պատահական չէր, որ մամուլում հայտնվեց Զարուհի Բաթոյանի, Տիգրան Ավինյանի, Արսեն Թորոսյանի հրաժարականի մասին տեղեկությունը: Ինչ կապ ունի՝ ինչ դրություն է: Արտակարգ դրության ժամանակ առավել ևս պետք է կարողանան հարցեր լուծել:

Եթե չեն կարողանում, պետք է փոխեն, բա ինչ պետք է անեն: Բա ինչ՝ թողնեն արտակարգ դրության պայմաններում ավելի՞ խորանա այս ամեն ինչը: Իհարկե, կարծում եմ, որ վարչապետը առաջինը պետք է Արսեն Թորոսյանին հաներ, ինքը բոլորին հանում է, Թորոսյանին պահում»:

Աղբյուր` Փաստինֆո