Փաստ ինֆո

«Արսեն Թորոսյանի հայտարարությունը պարզ վկայությունն է այն բանի, որ ՀՀ կառավարությունը եւ հատկապես առողջապահության նախարարն իրենց պարտականությունները ուղղակի ձախողել են եւ երկիրը կանգնեցրել են խայտառակ կատաստրոֆայի առաջ: Սա աղետ է, եթե արդեն առողջապահության նախարարը, այսինքն , կորոնավիրուսի դեմ թիվ մեկ պայքարողներից մեկը խոսում է այն մասին, որ կարող է մենք ընտրողական մոտեցում ունենանք՝ով ապրի, ով չապրի, վկայում է, որ ուղղակի տապալել են եւ երկիրն ու ժողովրդին աղետի առաջ են կանգնեցրել: Այլ մեկնաբանություն չկա»,-«Փաստինֆո»-ի հետ զրույցում ասաց քաղաքական գործիչ, նախկին պատգամավոր Միհրան Հակոբյանը

Հիշեցնենք, որ այսօր առողջապահության նախարար Արսեն Թորոսյանը հայտարարել է, թե հնարավոր է կորոնավիրուսով հիվանդների բուժման խորը սորտավորման անցում լինի։ Հանրային խորհրդի անդամների հարցերին պատասխանելով Թորոսյանը հայտարարել է. ««Խորը սորտավորում պատերազմի ժամանակ է նաև արվում, երբ այն պացիենտներին են հիմնականում վերցնում բուժման, որոնք որ շանս ունեն փրկվելու և հակառակը։ Չի բացառվում, որ նույնիսկ այս տեմպի պահպանման ժամանակ մենք մոտ օրերը դրան գնանք, բայց մենք ամեն ինչ անում ենք, որ դրան չգնանք, նոր մահճակալներ ենք ներառում և այլն»։

Միհրան Հակոբյանը համոզված է՝ բացի քաղաքական պատասխանատվությունից, դրվելու է նաեւ իրավական պատասխանատվության հարցը, որովհետեւ խոսքը երկրի վարչապետի ու առողջապահության նախարարի մասին է, որոնք ծաղրել են կորոնավիրուսն ու նրա դեմ պայքարի կոչերը, մարդկանց ապակողմնորոշել են , ինչի հետեւանքով այսօրվա դրությամբ 74 մահ կա: «Այդ մահերի համար պատասխանատվություն անխուսափելիորեն լինելու է, վաղը չի լինի, մյուս օրը կլինի, բայց այդ ամենը անհետեւանք անցնել չի կարող, մենք գործ ունենք մարդկային կյանքերի հետ։ Մենք 74 հայրենակից ենք կորցրել՝ երկրի իշխանությունների՝ ի դեմս վարչապետի, առողջապահության նախարարի, պարետի հանցավոր անգործության, հանցավոր անփութության եւ խայտառակ գործելակերպի հետեւանքով»,-շեշտեց Միհրան Հակոբյանը:

Նկատենք, երբ ամբողջ աշխարհը ԱՀԿ-ի կոչով կորոնավիրուսի տարածումը կանխելուն էր լծված, Հայաստանը պատրաստվում էր Սահմանադրական հանրաքվեին, իսկ իշխանությունը՝ ի դեմս վարչապետ Փաշինյանի, քարոզարշավ էր իրականացնում այն պարագայում, երբ երկրում արդեն կորոնավիրուսի վարակի հաստատված դեպքեր կային: Վարչապետ Փաշինյանը հեգնում էր կորոնավիրուսը՝ հայտարարելով, թե «կորոնավիրուսն ո՞ւմ շունն ա», առաջարկում էր «պինցետով հանել, օղու մեջ վարակազերծել», իսկ առողջապահության նախարար Արսեն Թորոսյանը ոչ միայն դիմակ կրելու անհրաժեշտություն չէր տեսնում, երբ երկրում բժշկական դիմակների դեֆիցիտ կար, այլեւ հայտարարում էր, որ «կորոնավիրուսը վտանգավոր վարակ չէ», հետեւաբար հատուկ միջոցառումների անհրաժեշտություն չկա:

Միհրան Հակոբյանն ասում է՝ Արսեն Թորոսյանը Նիկոլ Փաշինյանի իշխանության եւ վարչապետ լինելու հետեւանք է եւ այսօր օրհասական է վերջինիս հեռացման հարցը:

«Հայաստանի Հանրապետությունը Նիկոլ Փաշինյան վարչապետով ուղղակի կանգնած է աղետի առաջ, օր առաջ, ժամ առաջ ՆԻկոլ Փաշինյանը պետք է լքի վարչապետի պաշտոնը, եթե իշխող քաղաքական ուժը՝ «Իմ քայլը» դաշինքը չկարողացավ իր մեջ ուժ գտնել եւ հանուն մեր ժողովրդի, հանուն մեր պետության ապագա ունենալու շանսի չազատվեց Նիկոլ Փաշինյան վարչապետից, ապա ես ՀՀ տեսանելի ապագան շատ վատ գույներով եմ տեսնում: Փաշինյանի հրաժարականը ժամ առ ժամ հասունացող խնդիր է, նա ուղղակի պետք է հեռանա, չհեռանա՝ հեռացնելու ենք, լավ կլինի, որ Նիկոլ Փաշինյանն ինքը եւս հասկանա պահի լրջությունը, իր մեջ ընդունի, որ ձախողվել է, տապալվել է, մարդկանց կյանքները չի կարողացել փրկել, ավելին, իր կառավարության անգործության հետեւանքով մատերի արանքով է նայվել այս համաճարակին, դրա տնտեսական ու առողջապահական հետեւանքներին, ինչի արդյունքում մենք այսօր ունենք 74 մահ եւ ունենք սովի շեմին կանգնած ժողովուրդ»:

Միհրան Հակոբյանը չի բացառում , որ Հայաստանում ստեղծված անհանգստացնող իրավիճակից կարող է օգտվել նաեւ հակառակորդը: «Երբ երկրի առողջապահական, սոցիալական ու տնտեսական համակարգերը, այսինքն, զինված ուժերի եւ Լեռնային Ղարաբաղի պաշտպանության թիկունքը կազմաքանդվում է, կազմալուծվում է եւ հանցավոր անգործության ու անփութության հետեւանքով հասցվում է աղետալի վիճակի, Հայաստանի թշնամիները , բնականաբար, կարող են օգտվել այդ առիթից եւ ստանալ այն, ինչ վերջին 20-25 տարիներին երազել են, բայց չեն կարողացել ստանալ: Նրանք քնած չեն եւ հիմա այս ապաշնորհ իշխանությունն է հայտնվել ՀՀ իշխանության ղեկին, ինչը ուղղակի նվեր է նաեւ ՀՀ թշնամիներին»,-եզրափակեց Միհրան Հակոբյանը:

Աղբյուր` Փաստինֆո