Փաստ ինֆո

Արագածոտնի մարզի Նիգավան գյուղում երկար տարիներ է առաջնային խնդիրը մնում է ճանապարհների անբարեկեցիկ վիճակը և խմելու ջրի բացակայությունը։ «Փաստինֆո»-ի նկարահանող խումբն օրերս Նիգավան գյուղում էր և փորձել է պարզել, թե ինչ խնդիրներ ունեն գյուղի բնակիչները։

Գյուղում բնակիչների մեծ մասը նախկինում արտագնա աշխատանքի էր մեկնում Ռուսաստան, սակայն կորոնավիրուսի համաճարակի պատճառով բոլորը գյուղում են մնացել. «Ճանապարհները փակ են ու բոլորը մնացել են անգործ և ապրելու ոչ մի հնարավորություն չունեն։ Գյուղում հիմնականում անասնապահությամբ ենք զբաղվում, բայց հիմա դրանից էլ օգուտ չկա։ Մի լիտր կաթը 100-ից 120 դրամով ենք վաճառում։ Կես լիտր ջուրը 150 դրամով են ծախում, իսկ մեկ լիտր անարատ կաթը՝ 100 դրամով»,-ասաց գյուղացիներից մեկը։

Նիգավանի բնակիչները նշում են՝ մինչև կարանտինը մարդիկ շաբաթը մեկ անգամ գազելով Երևան էին գնում և իրենց ապրանքը վաճառում, իսկ հիմա մարդիկ մնացել են նպաստների ու թոշակների հույսին. «Գյուղում երկու խանութ ունենք, գնում ենք խանութպաններին խնդրում, որ պարտքով մթերք տան։ Հացի խնդիր կա, մարդ կա օրեկան 400-450 դրամ չի կարող տալ հացի համար։ Գյուղի բնակիչների 95 տոկոսը խանութից պարտքով է մթերք վերցնում»,-նշեցին բնակիչները։

Նիգավան գյուղի առաջնային խնդիրները ճանապարհների անմխիթար վիճակն է և խմելու ջրի բացակայությունը։ Մարդիկ դժգոհում են՝ արդեն երկար տարիներ է մեքենաներով Ապարան են գնում ու այնտեղից ջուր բերում. «Ամեն օր ավտոյով գնում եմ Ապարան՝ կանեստրով ջուր բերելու։ Երևի մի քսան տարի ջուր չենք ունեցել։ Մեքենաներն էլ ճանապարհների պատճառով ջարդվում են։ Մենք էլ ենք մարդ, մենք էլ ենք ուզում ապրել, մեր երեխաներն էլ են ուզում ապրել, ասֆալտի վրա քայլել։ Գոնե մեկ անգամ թող պարոն Փաշինյանը գա մեր գյուղ, մենք ընտրությունների ժամանակ նրա թիկունքին կանգնած ենք եղել»,-նշեցին նիգավանցիները։

Մանրամասները՝ տեսանյութում։

Աղբյուր` Փաստինֆո