Փաստ ինֆո

Ոստիկանի նկատմամբ բռնություն գործադրելու մեջ մեղադրվող Հարություն Խազիկյանի պաշտպանը միջնորդություն է ներկայացրել՝ առաջադրված մեղադրանքը վերաորակելու մասին: Այս մասին «Փաստինֆո»-ի հետ զրույցում ասաց փաստաբան Էրիկ Ալեքսանյանը:

«Փաստինֆո»-ն ավելի վաղ տեղեկացրել է մարտի 26-ին Բագրատունյաց փողոցում տեղի ունեցած միջադեպի մասին:

Ըստ նախաքննական մարմնի՝ 26.03.2020թ. ժամը 13:00-ի սահմաններում, իր ծառայողական պարտականությունները կատարելու ընթացքում, հայտարարված արտակարգ դրության ժամանակահատվածում քաղաքացիների տեղաշարժման թերթիկն ստուգելու նպատակով, ՀՀ ոստիկանության ՊՊԾ գնդի 5-րդ վաշտի ոստիկան Հակոբ Կարապետյանը Բագրատունյաց պողոտայում մոտեցել է քաղաքացուն, պահանջել անձնագիրը և վերոհիշյալ թերթիկը։ Վերջինս մոտեցել է նշված հատվածում կայանված «Տոյոտա Քեմրի» մակնիշի ավտոմեքենային, բացելով ավտոմեքենայի դուռը՝ նստել է վարորդի նստատեղին, ինչի ընթացքում ոստիկանը, իբր, տեսել է գոտկատեղին ամրացված ատրճանակը ու պահանջել է նաև այն կրելու թույլտվության փաստաթուղթը։ Քննչական մարմնի վարկածով՝ քաղաքացին չի ենթարկվել իշխանության ներկայացուցիչ հանդիսացող ոստիկանության աշխատակցի օրինական պահանջներին, ավտոմեքենան գործարկել է ու վարել, իսկ ոստիկանն էլ փորձելով կանգնեցնել ավտոմեքենան, բռնվել է վարորդի կիսաբաց դռնից, սակայն վերջինս շարունակել է ավտոմեքենան վարել, որի արդյունքում ոստիկանն ընկել է գետնին՝ ստանալով մարմնական վնասվածք:

Խազիկյանին մեղադրանք է առաջադրվել ՀՀ քրեական օրենսգրքի 316-րդ հոդվածի 2-րդ մասի հատկանիշներով՝ իշխանության ներկայացուցչի նկատմամբ բռնություն գործադրելու համար, որը կապված է նրանց կողմից իրենց ծառայողական պարտականությունները կատարելու հետ: Քննիչը միջնորդություն էր ներկայացրել դատարան՝ նրա նկատմամբ կալանավորումը որպես խափանման միջոց ընտրելու մասին, ինչը բավարարվել էր, բայց նաեւ գրավի կիրառումը թույլատրելի համարվել։ Խազիկյանն ազատ է արձակվել 5 մլն դրամ գրավի դիմաց:

Պաշտպանական կողմը գտնում է, որ առաջադրված մեղադրանքն իրավաչափ չէ և, որ «հիմնավոր կասկածից վեր» ապացուցողական չափանիշի տիրույթում ձեռք բերված փաստական տվյալները չեն ապահովում ապացույցների այնպիսի բավարար համակցություն, որը թույլ կտար հիմնավորված համարել, որ Հարություն Խազիկյանը ոստիկանության աշխատակցի նկատմամբ իր ծառայողական պարտականությունները կատարելու հետ կապված բռնություն է գործադրել։ Միայն տուժողի ցուցմունքը թույլ չի տալիս պարզել Խազիկյանի կողմից իշխանության ներկայացուցչի նկատմամբ իր կողմից ծառայողական պարտականությունները կատարելու հետ կապված բռնություն գործադրելու հանգամանքը անհրաժեշտ խորությամբ և լրիվությամբ:

Փաստաբան Էրիկ Ալեքսանյանի խոսքով՝ Խազիկյանն իրեն առաջադրված մեղադրանքը չի ընդունում և ինչպես ցուցմունքում, այնպես էլ՝ առերեսումների ժամանակ պնդել է իր դիրքորոշումը:

Փաստաբանի ներկայացմամբ՝ իրականում դեպքի օրն իր պաշտպանյալը գնացել է խանութ՝ երեխայի համար գնումներ կատարելու և մինչ գործով տուժող ոստիկանի մոտենալն արդեն իսկ նրան են մոտեցել այլ ոստիկաններ և ստուգել տեղաշարժման թերթիկը:

Ինչ վերաբերում է բուն դեպքին, ապա անհրաժեշտ փաստաթղթերը ներկայացնելու ոստիկանի պահանջից հետո Խազիկյանը մոտեցել է մեքենային, կիսով չափ թեքվել՝ մեքենայից թերթիկը վերցնելու համար եւ այդ ժամանակ, ըստ պաշտպանական կողմի, ոստիկանը բռնել է մեքենայի ղեկը, իսկ մյուս ձեռքով քաղաքացու պարանոցից, քաշքշել և պահանջել չգործարկել մեքենան, մինչդեռ՝ Խազիկյանը մեքենան գործարկելու ցանկություն չի էլ ունեցել:

Բացի այդ՝ փաստաբանն անտրամաբանական համարեց այն հանգամանքը, որ ոստիկանության աշխատակիցը, ով պնդում էր, թե տեսել է Խազիկյանի մոտ ատրճանակ և սառը զենք, ոչ մի միջոցառում չի ձեռնարկել վերջինիս բերման ենթարկելու համար, այսինքն՝ դժվար է պատկերացնել, թե ինչու ոստիկանության ծառայողը տեսնելով, որ մեղադրյալ Հարություն Խազիկյանը ենթադրյալ հանցանք է կատարում, անմիջապես չի ձեռնարկել համապատասխան միջոցներ այն կանխելու ուղղությամբ: Փաստաբանը նշեց, որ կորոնավիրուսի համավարակով պայմանավորված երկրում արտակարգ դրություն է հայտարարված, ինչով պայմանավորված էլ ուժեղացված է հսկողությունը, հետևաբար՝ անտրամաբանական է, որ այդ պայմաններում իր պաշտպանյալը կկրեր զենք, այն էլ՝ հագուստի վրայից:

Հեղինակ՝ Իզաբել Սահակյան

Աղբյուր` Փաստինֆո