Փաստ ինֆո

ԱԺ Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովում Հեռուստատեսության և ռադիոյի հանձնաժողովի նախագահ Տիգրան Հակոբյանը ներկայացրեց հանձնաժողովի 2019 թվականի գործունեության մասին տարեկան հաղորդման զեկույցը, որից հետո ԱԺ «Իմ քայլը» խմբակցության անդամ Հովհաննես Հովհաննիսյանը հետաքրքրվեց, որ երբ է եթերը «մաքրվելու»:

«Մենք՝ որպես պատգամավոր, մտածում ենք, որ հեռուստատեսությունը, մամուլը, ռադիոն պետք է ազատ լինեն, բայց դա երբեմն որոշակի ամենաթողության է բերում: Կոպիտ ասած մենք ընկնում ենք երկու քարի արանքը, մի կողմից ուզում ենք կարգավորել ոլորտը, մյուս կողմից էլ այնքան չեն ուզում կարգավորել, որ դա հասնի ազատության սահմանափակման: Որպես սպառող միացնում ենք հեռուստացույցն ու տեսնում ենք անորակ սերիալներ, ոչ նորմատիվային բառապաշար և այլն»,-ասաց Հովհաննիսյանը:

Հեռուստատեսության և ռադիոյի հանձնաժողովի նախագահ Տիգրան Հակոբյանը «մաքրել» եթերը արտահայտությունը ծայրահեղ պոպուլիստական որակեց։

«Չկա այդպիսի հասկացություն, ի՞նչը մաքրել, ո՞նց մաքրել, ինչի՞ց մաքրել, ո՞րն է քարոզը, ինձ սահմանումներ տվեք։ Ամեն մեկը քարոզը այլ ձևով է հասկանում։ Մեկը սեռական փոքրամասնությունների իրավունքների պաշտպանությունը, քարոզը անբարոյականություն է համարում, մյուսը համարում է մարդու իրավունքների պաշտպանություն։ Ինչի՞ց ենք եթերը մաքրում 1-ից, 2-ից, հնդկական, թե՞ հայկական սերիալներից: «Մաքրել» հասկացություն չկա»,- ասաց Հակոբյանը:

Նա շեշտեց, որ կոմերցիոն հեռուստաընկերություններից հնարավոր չէ պահանջել այն որակը, որը Հանրային հեռուստաընկերությունում տեսնում ենք կամ ուզում ենք տեսնել:

«Ինչն ինձ համար ճաշակով չէ, մեկ ուրիշի համար կարող է ճաշակով լինել, և եթե Հայաստանում կան մարդիկ, որոնք սիրում են չարգելված մշակութային դրսևորումներ, օրինակ` այս կամ այն երգչի համերգներ, հեռուստաընկերությունները պարտավոր են բավարարել մարդկանց այդ պահանջմունքը»,-ասաց ՀՌՀ նախագահը:

Հովհաննես Հովհաննիսյանը պարզաբանեց, որ եթերը «մաքրել» ասելով նկատի ուներ օրինակ՝ «մկրատով բերանը ճղեմ» նախադասությունը, որը հնչել է սերիալում. «Դա դուք էլ եք նկատել ու հանձնաժողովը տուգանել էլ հեռուստաընկերությանը այդ արտահայտության համար։ Այսինքն դուք էլ եք այդ գործառույթն իրականացնում, կուզեք ասել կանոնակարգել թե մաքրել, բայց նմանատիպ երևույթների բացառման մասին է խոսքը»:

Հակոբյանն էլ պատասխանեց, որ կատարյալ եթեր պահանջել հնարավոր չէ:

Աղբյուր` Փաստինֆո