Փաստ ինֆո

Սա Առողջապահության նախարարության այն եզակի ծրագրերից է, որն ինձ դուր եկավ և գրագետ իրականացման արդյունքում այն բավական խոստումնալից և դրական կարող է լինել ոլորտի համար: «Փաստինֆո»-ի հետ զրույցում նման կարծիք հայտնեց «Կոնսիլիում» ՀԿ նախագահ Գևորգ Գրիգորյանը անդրադառնալով Առողջապահության նախարարության այն նախագծին, որով առաջարկվում մի քանի մարզերում գտնվող արյան փոխներարկման կենտրոնները միացնել Յոլյանի անվան արյունաբանական կենտրոնին:

Գևորգ Գրիգորյանի խոսքով սա իրական օպտիմալացում է ըստ մարզերի նույն հաստիքացուցակով, նույն կառավարման համակարգով, ընդ որում կենտրոնները շարունակելու են գործել պարզապես նոր իրավական ձևաչափով. «Դրանք ոչ թե լինելու են առանձին հիվանդանոցներ, այլ լինելու են Յոլյանի անվան արյունաբանական կենտրոնի մասնաճյուղերը: Լինելու է կենտրոնացված ղեկավարում և ունենալու ենք միացյալ տվյալների բազա, թե որ կենտրոնում ինչքան արյուն կա: Անհրաժեշտության պարագայում դրանք համալրվելու են, այս կենտրոնից այն կենտրոն տրանսպորն ապահովվելու է»,-ասաց Գևորգ Գրիգորյանը` հավելելով, որ արյան փոխներարկման ծառայությունը ստանդարտիզացիա է պահանջում թե' հաստիքացուցակի, թե' գիտելիքի առումով, իսկ մենք պատերազմող երկիր ենք և մեզ մոտ արյան պաշարը պետք է լինի անթերի, ինչպես նաև լուրջ ստանդարտներին համապատասխանեցված:

Ինչ վերաբերում է հնարավոր գործազրկությանը, ապա Գևորգ Գրիգորյանն ասաց, որ ըստ նախագծի հիմնավորման կան կենտրոններ, որտեղ հաստիքները շատ են, կենտրոններ էլ կան, որտեղ հակառակը քիչ են և եթե կենտրոնների հաստիքացուցակն այնպես կազմվի, որ ոսկե միջինը լինի, ապա այդ դեպքում ոչ թե կլինի կադրերի կրճատում, այլ վերաբաշխում. «Մեկ կամ երկու մարդ կարող է աշխատանքը կորցնել, այն էլ, կարծում եմ, եթե նախարարությունը նման ռեֆորմի է գնում, ուրեմն կհոգա իրենց աշխատանքի խնդիրը, որովհետև բուժաշխատողին հարկադիր պարապուրդի մատնել չի կարելի»,-ասաց Գևորգ Գրիգորյանը:

Վերջինս նկատեց Առողջապահության խնդիրը ոչ թե ոլորտը զարգացնելուն ուղղված մտքերի պակասն է, այլ նրանց աշխատաոճը և մեթոդաբանությունը. «Եթե ծրագիրը գրագետ իրականացվի, ապա խոստումնալից ու դրական կարող է լինել ոլորտի համար: Նշվում է, որ 840 փաթեթ արյուն խոտանի է ենթարկվել այն պատճառով, որ ուղղակիորեն դրա կարիքը չի եղել: Եթե կարիքը չի եղել, ապա պետք է տեղեկացնել, որ տվյալ կենտրոնում արյուն կա և կազմակերպել դրա տեղափոխումն այն կենտրոն, որտեղ կարիք կա: Եթե լիներ կենտրոնացված համակարգ և Յոլյանի անվան արյունաբանական կենտրոնում տիրապետեին այդ փաթեթների մասին տեղեկատվությանը, ապա կկարողանային համակարգել և անհրաժեշտության դեպքում մատակարարել տարբեր կենտրոններ»,-հավելեց Գևորգ Գրիգորյանը:

Աղբյուր` Փաստինֆո