Փաստ ինֆո

Կորոնավիրուսի համաճարակով պայմանավորված երկրում արտակարգ դրությունը երկարացնելու հարցը իրավական և քաղաքական հանրության շուրջ վեճ է առաջացրել։ Մասնավորապես՝ «Արտակարգ դրության իրավական ռեժիմի մասին» օրենքի 5-րդ հոդվածի 1-ի մասի համաձայն ՝ ՀՀ ամբողջ տարածքում հայտարարվող արտակարգ դրությունը չի կարող գերազանցել 30 օրը, իսկ առանձին տարածքներում՝ 60 օրը:

Օրենսդրական հենց այս նորմը շահարկումների առիթ է դարձել: Սահմանադրական իրավունքի մասնագետ Գոհար Մելոյանը «Փաստինֆո»-ի հետ զրույցում ասաց, որ «Արտակարգ դրության իրավական ռեժիմի մասին» օրենքի 5-րդ հոդվածը հստակ կարգավորում ունի արտակարգ դրության ժամկետի վերաբերյալ: Նրա խոսքով՝ հոդվածի 1-ին մասի համաձայն ՀՀ ամբողջ տարածքում արտակարգ դրության ժամկետը չի կարող գերազանցել 30 օրը, իսկ առանձին տարածքներում՝ 60 օրը, սակայն նույն հոդվածի 2-րդ մասի համաձայն՝ այդ ժամկետների ավարտից հետո, թեև արտակարգ դրությունը դադարում է, բայց սահմանում է բացառություն, ինչը «Նորմատիվ իրավական ակտերի մասին» օրենքով մեկնաբանման կանոն է:

«Տվյալ հոդվածը չի կարելի միայն առաջին մասով մեկնաբանել: Այն ունի երկրորդ մաս, որն ասում է՝ մինչև նշված ժամկետների ավարտը չեն վերացել այն հանգամանքները, որոնց հիման վրա արտակարգ դրություն է հայտարարվել, արտակարգ դրության ժամկետը կարող է երկարաձգվել Կառավարության որոշմամբ՝ արտակարգ դրություն հայտարարելու համար սահմանված կարգով և հոդվածի ժամկետները չգերազանցող ժամկետով, այսինքն՝ ամբողջ ՀՀ տարածքում 30 օրով և առանձին տարածքներում՝ 60 օրով»,- նշեց Մելոյանը:

Նրա խոսքով՝ արտակարգ դրությունը երկարաձգել հնարավոր է և չի կարելի կոնտեքստից կտրված մեկնաբանել, կոնկրետ արտակարգ դրության ժամկետին կա նվիրված հոդված, որը բաղկացած է երկու մասից:

Մելոյանը նշեց, որ, եթե խնդիր առաջանար Ատոմակայանի հետ կամ նմանատիպ այլ իրավիճակ ստեղծվեր, ակնհայտ է, որ նմանաբնույթ արտակարգ իրավիճակները կոնկրետ ժամկետով չեն կարող սահմանափակված լինել և բնական է, որ օրենսդիրը պետք է նման կարգավորում սահմաներ: Նրա խոսքով՝ «Արտակարգ իրավիճակներում բնակչության մասին» օրենքում ներկայացված են կոնկրետ արտակարգ իրավիճակները, ինչպիսին համաճարակն է, որն այս դեպքում հիմք է դարձել արտակարգ դրության հայտարարման համար:

«Նույնիսկ տրամաբանության կանոնների կոնտեքստում օրենսդիրը չէր կարող ընդամենը կաղապարված 30 օր ժամկետ սահմանել՝ երկրում արտակարգ դրություն հայտարարելու համար և կաղապարեր գործադրին: Դրանից ելնելով էլ արդեն իսկ սահմանված է 2-րդ մասը, որպեսզի գործադիրն ավելի ճկուն, իրավիճակին ավելի հարմար գործելու հնարավորություն ընձեռի»,- նշեց Մելոյանը:

Հարցին, թե ինչը կարող է շահարկումների առիթ դառնալ, Մելոյանը պատասխանեց, որ հնարավոր է որոշ իրավաբաններ միայն 1-ին մասն են որպես հիմք ընդունում և մեկնաբանում, սակայն օրենսդրության տրամաբանությունից բխում է, որ իրավական նորմերն ունենում են ընդհանուր կանոններ և հատուկ կանոններ, որոնք մի շարք բացառություններ են սահմանում: Ինչ վերաբերում է ԱԺ ԼՀԿ խմբակցության ղեկավար Էդմոն Մարուքյանի հայտարարությանը, սահմանադրագետը նշեց, որ տեղյակ է նրա հայտարարության մասին, բայց չի կարող մեկնաբանել, թե արդյո՞ք կա քաղաքական միտում, թե ոչ: Ավելի վաղ տեղեկացրել ենք, որ Էդմոն Մարուքյանը ֆեյսբուքյան գրառում էր կատարել՝ հղում կատարելով «Արտակարգ դրության իրավական ռեժիմի մասին» օրենքի 5-րդ հոդվածի 1-ին մասին և նշել, որ ամբողջ Հանրապետության տարածքում նույն ռեժիմի երկարաձգումն օրենքով այլևս անհնար է:

Հեղինակ՝ Իզաբել Սահակյան

Աղբյուր` Փաստինֆո