Փաստ ինֆո

Սա, ըստ երևույթին, մեր իշխանությունների կողմից հերթական գյուտն է: «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը՝ անդրադառնալով «Արտակարգ դրության իրավական ռեժիմի մասին» օրենքում այն փոփոխություններին, որոնցով նախատեսվում է միջամտություն իրականացնել անձնական տվյալների պաշտպանության, մասնավոր և ընտանեկան կյանքի անձեռնմխելիության, հաղորդակցության ազատության և գաղտնիության իրավունքներին:

Լարիսա Ալավերդյանը նկատեց՝ նախագծի հիմքում ընկած է կորոնավիրուսի դեմ ավելի արդյունավետ պայքարը, սակայն, ըստ նրա, կորոնավիրուսը նման մեթոդների նկատմամբ վերին աստիճանի անտարբեր է. «Պետությունների մեջ առաջինն ենք, որ ավելի քան տարօրինակ մեթոդ ենք առաջարկում: Եթե նոր իշխանություններն ուզում են հաստատեն իրենց քիմքին ոչ հաճելի մարդկանց հանդեպ տոտալ հսկողություն, թող այդպես էլ ասեն, որովհետև այստեղ այլ բան չկա: Հասկանալի է, որ ամբողջ մեր բնակչության վերաբերյալ ո'չ գործողությունն է հնարավոր իրականացնել, ո'չ էլ տեղեկատվությունը մշակել: Նշանակում է շարունակվելու է ընտրովի մոտեցումը: Տեխնիկապես հնարավոր չէ, որ այդպիսի օրենքը կիրառվի անխտիր բոլորի հանդեպ: Նշանակում է ընտրվելու է ինչ-որ խումբ և տոտալ վերահսկողություն է իրականացվելու այդ խմբի անձանց նկատմամբ: Վիրուսի առումով դա անհեթեթ մեթոդ է: Եթե անգամ դա օգնելու է ինչ-ինչ տոկոս հաստատել, ապա դա բացարձակապես ո'չ համաչափ, ո'չ էլ իրավաչափ է»,-ասաց Լարիսա Ալավերդյանը:

Վերջինս ամբողջովին դատապարտում է կառավարության այս նախաձեռնությունը: Ավելին կարծում է, որ ևս մեկ անգամ միջազգային կառույցներից կստանանք կոշտ դիտողություն, ինչպես եղավ այն դեպքում, երբ ԶԼՄ-ների հանդեպ էին սահմանափակումներ ընդունել օրենքի մեջ. «Եթե մեր իշխանություններն ուզում են առաջինը լինել ինչ-որ բանում, ապա ճիշտ չէ, որ իրենք ամենավատ բաների մեջ են ուզում առաջինը լինել: Ապշելու բան է, թող մասնագետներից հարցնեն արդյոք կարելի է այս մեթոդով արդյունավետ ձևով պայքարել կորոնավիրուսի դեմ: Սա դառնում է արդեն դաժան վերաբերմունք ժողովրդի նկատմամբ»,-ընդգծեց Լարիսա Ալավերդյանը:

Դիտարկմանը, որ տեղեկատվությունը հավաքագրելու է մասնավոր ընկերություն, Լարիսա Ալավերդյանը նկատեց Արդարադատության նախարարը պնդում է, որ այդ բոլոր տեղեկատվությունը ոչնչացվելու է, սակայն այն, որ այդ տեղեկատվությունը հայտնվելու է մասնավոր ընկերության ձեռքին, արդեն անթույլատրելի է.

«Շատ կներեք էլի, կարող է դա մանկապարտեզի մակարդակով են խոսում: Այդ ով է հետևելու որ մասն է ոչնչացվում, ինչպես է ոչնչացվում: Դա ինչ մի ազնիվ խոսքով հիմնավորումներ են»,-ասաց Լարիսա Ալավերդյանը` հավելելով, որ սա անձնական տվյալների և անձնական կյանքի անձեռմխելիության կոպիտ ոտնահարում է: Լարիսա Ալավերդյանի կարծիքով սա մոտեցում է և իշխանությունները գնում են մարդու իրավունքների և ազատության կոշ, անհամաչափ սահմանափակելու ուղղությամբ. «Փոխարենն ամբողջ իրենց ինտելեկտուալ միտքն ուղղեն նրան, որ կարողանան աշխատել և կանխել վիրուսը: Մենք որպես պետություն առաջնային դիրքերում ենք: Մեզ մոտ ավելի շատ են վարակվածները, քան տարածաշրջանի մյուս երկրներում»,-շեշտեց Լարիսա Ալավերդյանը:

Հեղինակ՝ Հասմիկ Կոշկարյան

Աղբյուր` Փաստինֆո