Փաստ ինֆո

Էլեկտրոնային լրատվամիջոցների, մեդիա տիրույթում մոնիտորինգի արդյունքում պարզորոշ է, որ քրեական լուրերի՝ սպանությունների, արյան, սեռական և այլ բռնությունների, պատիժների տարբեր դրսևորումների վերաբերյալ տեղեկատվական նյութերն ու հրապարակումներն ամենից ավելի կարդացվողներն ու ուշադրություն գրավողն են: Ցավալի է, բայց լավ լուրերը չէ, որ հասարակություններում պահանջարկված են, այլ վատը, մերժելին, դաժանը, սարսափելին: Մի խոսքով, ասֆալտին փռելու և պատերին ծեփելու թեմատիկան հենց այնպես չէ, որ հրապարակ է բերում երկրի վարչապետը:

Այս համատեքստում, պատահական չէ, որ Փաշինյանի և իշխանական մեծամասնության քարոզչության մեխը՝ հանրաքվեի միտինգային հարթակներից՝մարզերում ու համայնքներում ժողովրդի հետ հանդիպման ընթացքում շարունակում է մնալ նախկիններին ուղղված քննադատությունը, որ հագեցած է ինչպես որակումներով և վիրավորական էպիտետներով, այնպես էլ՝ անպատասխանատու հայտարարություններով:

Այսինքն, երկու տարի շարունակ ներկա իշխանությունը շարունակում է պաշտոնավարել նախկինների քննադատության հաշվին:

Հարց է ծագում՝ այս ընթացքում ժողովրդի կյանքի բարելավմանն ուղղված դրական, ներկայանալի, կարևոր բան մը չու՞նի արած ներկա իշխանությունը, որոնցով իր միտինգային կրքերը կարողանա բավարարել: Թե՞ ներկան և ապագան թողած, երկրի զարգացման խնդիրները թողած՝ էլի ու էլի շարունակում է մարդկանց պահել ,,իմ զենքը նախկիններն են,, տրամաբանության մեջ:

Ի դեպ, հետաքրքիր է նաև, որ նախկիններին դատափետելով երբ Փաշինյանը ներկայացնում է պետբյուջեի հաշվին իրականացվող կառավարության ծրագրերը վերջին երկու տարվա կտրվածքով, տեսնում ես, որ ՀՀ կառավարության 2017-22թթ հնգամյա ծրագրի շրջանակում են և՛ աղետի գոտու պետական ծրագիրը, և՛ սուբվենցիոն քաղաքականութունը՝ մրցակցային սկզբունքով լավագույն ծրագրերին սուբվենցիայի տրամադրման, տարիներ առաջ սկսված և շարունակվող միջազգային, դրամաշնորհային ծրագրերի համատեքստում: Բնականաբար, նաև նախկիններից փոխանցված ներդրումային ծրագրերին է վերաբերվում ասվածը, մանավանդ, որ թավշյա կառավարությունը կարծես որևէ խոշոր ներդրումային ծրագիր դեռ չի սկսել և ավարտել:

Այսինքն, ստացվում է, որ Փաշինյանի փրկօղակը կրկին նախկիններն են: Բայց այդ ձայնապնակն արդեն մաշվել է, երկու տարի ամեն օր ամեն ժամ լսելուց:
Շատերի կարծիքով՝ Փաշինյանի համար անկանխատեսելի հանրաքվեի՝ ,,ջրից չոր դուրս գալու,, տարբերակ է համաճարակի վերածված կորոնավիրուսը: Որը, եթե ոչ այսօր կամ վաղը, ապա առաջիկա օրերին Փաշինյանն ըստ ամենայնի, կօգտագործի:

Հեղինակ Մ.Մ.

Աղբյուր` Փաստինֆո