Փաստ ինֆո

«Վստրեչի Ապերի»՝ Արամ Վարդանյանի պաշտպանները պատրաստվում են հանցագործության մասին հաղորդում ներկայացնել։ Այս մասին «Փաստինֆո»-ի հետ զրույցում ասաց Արամ Վարդանյանի պաշտպան Լուսինե Սահակյանը։

«Մամուլի հրապարակումները, որոնք առիթ են քրեական գործ հարուցելու համար, ոչինչ չփոխեցին։ Համենայն դեպս՝ նման հաղորդագրություն չտարածվեց, որ հարուցվել է։ Լրացուցիչ անգամ դիմելու ենք Գլխավոր դատախազին, որպեսզի հարուցվի քրեական գործ»,- ասաց Սահակյանը։

Նշենք, որ մարտի լույս 5-ի գիշերը ոստիկանական մեծ ուժեր՝ դիմակավորված եւ զինված, ներխուժել են Արամ Վարդանյանին ու նրա հարազատներին պատկանող տներ եւ, ինչպես երեւում են հրապարակված կադրերից, կիրառել անհարկի ուժ։ Նշված գործողությունների հետեւանքով տուժել է մանկահասակ թոռնուհին՝ 5 տարեկան։ Արձանագրվել են նաեւ հափշտակության դեպքեր։

Փաստաբանի խոսքով՝ քննչական գործողություն կատարելու համար Արամ Վարդանյանին հայտնաբերելու ցանկություն էլ չկա, որովհետև օրեր շարունակ պաշտպանները հարցրել են, թե արդյո՞ք կա անհրաժեշտություն, որ Արամ Վարդանյանը ներկայանա վարույթն իրականացնող մարմին՝ հարցաքննության, սակայն որևէ մեկը ծանուցագիր չի ուղարկել, նույնիսկ՝ պաշտպանների միջոցով Վարդանյանը չի հրավիրվել վարույթն իրականացնող մարմին։

Անդրադառնալով Արամ Վարդանյանին առաջադրված մեղադրանքին՝ պաշտպանը նշեց, որ Վարդանյանը մեղադրվում է երեք կողոպուտ, ավազակային հարձակում և սպանության փորձ կազմակերպելու մեջ և դատարանը գտել է, որ երեք մեղադրանքներով էլ հիմնավոր կասկածն առկա չէ՝ ուսումնասիրելով ապացույցները։ «Ես Ձեզ վստահեցնում եմ, որ գոնե մեկ ապացույց գոյություն չուներ»,- ասաց Սահակյանը՝ հավելելով, որ հիմնավոր կասկածի առկայությունը պարտադիր է։

Նրա խոսքով՝ դատարանը գտել է, որ, թեև նրա առնչությունը՝ նշված հանցագործություններին հիմնավոր չէ, բայց նա պետք է կալանավորվի։

Լուսինե Սահակյանը նշեց, որ իր պրակտիկայում տեսել է շատ ապօրինի որոշումներ, բայց նման որոշում առաջին անգամ է տեսնում։
Ինչպես արդեն հայտնել ենք՝ մարտի 9-ին Արամ Վարդանյանին որպես մեղադրյալ ներգրավվելու մասին որոշում է կայացվել և նրա նկատմամբ հայտարարվել է հետախուզում։ Նրան մեղադրում են Էմիր Արամյանի կողմից 2016 թվականին կատարված կողոպուտը կազմակերպելու, 2019 թվականին նույն Էմիլի առեւանգումը կազմակերպելու, ապա 2020 թվականի մարտի 4-ին նրա նկատմամբ սպանության փորձ կատարելու մեջ։

«Փաստինֆո»-ն արդեն տեղեկացրել է, որ մարտի 4-ին Բուռնազյան փողոցում կրակոցներ են հնչել, որի ժամանակ հրազենային վնասվածքներ են ստացել երկու անձ՝ 50-ամյա Մհեր Մարտիրոսյանը եւ 37-ամյա Էմիլ Ամիրյանը։ Վերջինս նախկինում եղել է Արամ Վարդանյանի թիկնազորում, սակայն, ինչպես «Փաստինֆո»-ին պատմել են տարածքի բնակիչները, ճամբարափոխ է եղել ու հիմա նրան առավել հաճախակի նկատել են նախկին քրեաօլիգարխիկ համակարգի ներկայացուցիչ , ներկայումս գործարար Գռզոյի՝ Խաչատուր Սուքիասյանի շրջապատում։ Նրա անունը շրջանառվում է նաեւ Ա.Վարդանյանի՝ մտերիմ ընկերոջ՝ «Սիցիլի» սպանության համատեքստում։

Նշենք, որ վերջինս սպանվել է 2019 թվականի դեկտեմբերի 18-ին։ Քննչական կոմիտեն պաշտոնապես հայտարարեց, թե պարզել են առերեւույթ հանցագործություն կատարած անձի ինքնությունը ու հանձնարարել են ոստիկանությանը նրան հայտնաբերել ու ներկայացնել վարույթն իրականացնող մարմնին։ Անցած շուրջ 4 ամիսների ընթացքում այդպես են ոստիկանությունը չկարողացավ կամ չցանկացավ հայտնաբերել այդպես էլ սպանության մեջ կասկածվողին։

Հեղինակ՝ Իզաբել Սահակյան

Աղբյուր` Փաստինֆո