Փաստ ինֆո

Որոշ մարդիկ զոհված զինծառայողների ընտանիքների համար գումար չունեին, իսկ Մարտի 1-ի դեպքից տուժածների համար գումար ունեն։ Լրագրողների հետ հանդիպման ժամանակ այսօր ասաց «Զինվոր» հասարակական խորհրդի նախագահ Մարգարիտա Խաչատրյանը։

Նա նշեց, որ դիմել է կառավարությանը, որպեսզի բարձրացնեն զոհված զինծառայողների ընտանիքների նպաստները, սակայն կառավարությունից կամ մերժողական պատասխան են ստացել, կամ առհասարակ որևէ պատասխան չեն ստացել։ Մինչդեռ Մարգարիտա Խաչատրյանը նկատեց՝ վարչապետը հայտարարում է, որ ֆինանսների տեսանկյունից ոչ մի խնդիր չունենք. «Մեր գրություններից հետո հայտարարություն եղավ, որ «Մարտի 1»-ի դեպքով 30 մլն տրամադրվում է այդ ընտանիքներին։ Կարող էին 300 մլն տալ, բայց որոշ մարդիկ իրենց քողարկելու համար զոհված զինծառայողների ընտանիքների համար գումար չունեին, իսկ մարտի 1-ի դեպքերի համար գումար ունեին»,-նշեց Մարգարիտա Խաչատրյանը։

Նշենք, որ սևազգեստ մայրերի դեմ դատական հայց է ներկայացվել, որի հիմքում ընկած է Մարգարիտա Խաչատրյանի արտահայտություններն այն մասին, թե ինչու զոհված զինծառայողների ընտանիքներին փոխհատուցում չի տրամադրվում, իսկ մարտի 1-ի զոհերի իրավահաջորդներին տրամադրվում է։ Մարտի 1-ի գործով տուժողների իրավահաջորդները այդ արտահայտությունները վերագրել են իրենց և գտնում են՝ ոտնահարվել է իրենց պատիվն ու արժանապատվությունը, հետևապես հայց են ներկայացրել։

«Եթե այսօր հայցադիմումով դիմել են դատարան, որ ես և Սաթիկ Խլղաթյանը պետք է ներողություն խնդրեն, ապա չափազանց սխալվում են։ Որոշ մարդկանց համար դարձել եմ քավության նոխազ, որոշների համար բիզնես ու դղյակ ունեմ, որոշների համար էլ 30 մլն մեշոկի բերանը բացած գնում եմ վարչապետից փող ուզելու։ Ես գումարի կարիք չունեմ։ Խորհուրդ կտամ ձեռքերը հետ քաշել սևազգեստ մայրերից։ Ընդամենն ուզում ենք կառավարության կողմից հարգանքի արժանանալ»,-հավելեց Մարգարիտա Խաչատրյանը։

Աղբյուր` Փաստինֆո