Փաստ ինֆո

Իմ եզրահանգումները, իմ տպավորությունները չեն փոխվել, բանակն իր առջև դրված խնդիրը կատարել է և մեր բանակի հրամանատարական կազմի, զինծառայողների, նրանց ենթակաների հերոսությունների շնորհիվ մենք կարողացել ենք հասնել նրան, որ ՀՀ Պաշտպանության նախարարության գործողությունները ԱՀ ՊՆ-ի հետ համագործակցության շրջանակներում մարտական գործողությունները կանգնեցրել ենք։ Այս մասին այսօր լրագրողների հետ ճեպազրույցում ասաց Պաշտպանության նախկին նախարար Սեյրան Օհանյանը։

Նա նշեց, որ իր պաշտոնավարման ժամանակահատվածում եկել է այն եզրակացության, որ ՀՀ և ԱՀ զինված ուժերի ղեկավարությունն ու բոլոր օղակները ի վիճակի են խաղաղ պայմաններից պատերազմական ժամանակահատվածի անցնելուն։

«ԶՈՒ պատրաստությունների համար ուսումնանյութական բազան ապահովում է գործողություններ վարել ոչ միայն մարտավարական այլև այլ խողովակներում և դա երևացել է զորամասերի ու ստորաբաժանումների հրամանատարական կազմի զինվորների գործողություններում, նրանց քաջագործություններում, հերոսություններում»,-ասաց Օհանյանն ու ավելացրեց, որ եթե պաշտպանության բանակը 2016թ-ին անձնուրաց կռվել է, ապա դա տարիների ընթացքում պատրաստված ուսուցման և դաստիարակության, ավանդույթների հիման վրա է ձևավորվել։

Նա ընդգծեց, որ, իհարկե, տարբեր բացթողումներ եղել են, սակայն բոլոր աշխատող մարդիկ էլ սխալներ թույլ են տալիս։

«ՊՆ-ում իմ երկարատև աշխատանքի ընթացքում ես միշտ ասել եմ, որ սխալ ունենալը և դրանք վերացնելը մեծ թերություն չէ։ Սխալ ունենալը, բայց չվերացնելը նման է մարտի դաշտում զորքն անտեր թողնելուն»,-ասաց Օհանյանը։

Նա հայտնեց, որ Ապրիլյան քննիչ հանձնաժողովի նիստն անցել է շատ բաց, ջերմ, ընկերական մթնոլորտում և դրա արդյունքում հանձնաժողովն իր եզրակացությունը կանի, որի մի մասը կլինի հասարակության համար, սակայն մի զգալի հատվածը գաղտնի է։

«Ժամանակին բացթողումների համար ԱՀ ղեկավարությունը և ԱՀ ՊԲ ղեկավարությունը որոշումներ ընդունել է և համապատասխան կարգապահական գորածառություններ է իրականացրել, պաշտոնանկություններ են եղել»,-ասաց նախկին ՊՆ-ն։

Նա շեշտեց, որ ԶՈՒ հրամանատարական կազմը պատերազմի ժամանակ իր պարտականություններն իմացել է և իր գործառույթների շրջանում իրականացրել է. «ԶՈՒ-երը նյութատեխնիկական ապահովման շրջանակներում, նկատի ունեմ տեխնիկական ապահովման, նյութական ապահովման, վառելիքաքսուկային նյութերի հետ կապված որևէ խնդիր չի ունեցել»։

Օհանյանն ասաց, որ եթե ավելի ցածր մարտավարական օղակներում որոշակի բացթողումներ եղել են, ապա դա պատերազմական գործողությունների դժվարություններից, առանձնահատկություններից է գալիս։

«Եթե մեզանից յուրաքանչյուրը մարշալ էլ լինի, մենք գնահատական կարող ենք տալ այն ավագ լեյտենանտի, սերժանտի ու զինվորի տեսանկյունից, որն առաջին գծում մարտական գործողություններ է վարել՝ գտնվելով հակառակորդի կրակային ու հոգեբանական ճնշման տակ, բայց պատվով իր առջև դրված խնդիրը կատարել է»,-ասաց նա։

Անդրադառնալով հանձնաժողովի աշխատանքներին, նա նշեց, որ այն որոշ չափով լրացրել է այն ամենն, ինչ եղել է այն ժամանակ. «Հիշում եք, չէ՞ որ թվին է եղել՝ 2016թ-ին, այսօր 2020թ-նն է և ես ամենօրյա ռեժիմով դրանով չեմ զբաղվել, որոշ բաներ իրենք հիշեցրին, որոշ բաներ փոխադարձ քննարկման ընթացքում փոխլրացրեցինք»։

Հարցին, թե քննադատաբար էիք արտահայտվել հանձնաժողովի հասցեին, ասելով, որ այս հարցերը հանձնաժողովը չէ, որ պետք է քննարկի, փոխե՞լ եք Ձեր դիրքորոշումը, Օհանյանը պատասխանեց. «Մենք զուգահեռ քննարկման արդյունքում եկանք այն եզրակացության, որ հանձնաժողովը պետք է իր աշխատանքը շարունակի։ Ես, իհարկե, այդ հանձնաժողովը չէի կազմի կամ հանձնաժողովին պաշտպանության մասին առանձին-առանձին հանձնարարություն կլիներ, որպեսզի իրենք առանձին աշխատեն ՊՆ ղեկավարության հետ, բայց քանի որ ԱԺ-ում ստեղծվել է, հանձնաժողովը պետք է իր աշխատանքն ավարտի, և ես իմ կողմից աջակցելու եմ։

Լրագրողը դիտարկմանը, թե վարչապետը հայտարարել է՝ Ապրիլյան պատերազմը տեղի է ունեցել Ռուսաստանի Դաշնության գիտությամբ, երբ Օհանյանը պատրաստվում էր պատասխանել, Անդրանիկ Քոչարյանը միջամտեց ու ասաց, որ հանձնաժողովը կուսումնաիրի ու կասի։ Սակայն լրագրողի պնդումից հետո, Օհանյանն ասաց. «Վարչապետից էլ կարող եք հարցնել և ես կարող եմ փարատել բոլոր մտահոգությունները, եթե խոսում եք դավադրության տեսաբանությունից, այստեղ չի կարող լինել այլ դավադրություն, քան թուրք-ադրբեջանական դավադրությունն է։ Վերջակետ դրեք սրան»։

Խոսելով այն մասին, թե Սերժ Սարգսյանը բանակցել է տարածքներ հանձնելու շուրջ, Օհանյանն ասաց. «Ես նախկինում եմ արտահայտվել և այսօր էլ արտահայտվում եմ, որ եթե Արցախի հետ մի բան պատահի , յուրաքանչյուր թիզ հողի համար մենք պետք է պայքարենք։ Այսօր այդ զիջումների խնդիրը բանակցության առարկա չէ։ Եթե խոսքն այդ փաստաթղթերի մասին է, ապա դրանք միայն ու միայն եղել են բանակցելու համար, իսկ տարածքների հանձման վերաբերյալ իմ հետ երբևէ ոչ ոք նման խոսակցություն չի ունեցել»։

Մանրամասները՝ տեսանյութում

Աղբյուր` Փաստինֆո