Փաստ ինֆո

Հատուկ քննչական ծառայությունը մերժել է ԱԺ նախկին նախագահ Արա Բաբլոյանի նկատմամբ որպես խափանման միջոց ընտրված ստորագրությունը երկրից չհեռանալու մասին վերացնելու պաշտպանի միջնորդությունը։

ՀՔԾ մամուլի խոսնակ Մարինա Օհանջանյանը «Փաստինֆո»-ի հետ զրույցում նշեց, որ «Միջնորդությունը մերժվել է անհիմն լինելու պատճառաբանությամբ»։
Ավելի վաղ «Փաստինֆո»-ի հետ զրույցում Արամ Վարդևանյանը հայտնել էր՝ միջնորդություն է ներկայացրել՝ վերացնելու ԱՐա Բաբլոյանի նկատմամբ որպես խափանման միջոց ընտրված ստորագրությունը երկրից չհեռանալու մասին։

«Եթե նախաքննական մարմինը, այնուհետև դատախազությունը, ըստ էության, մեղադրական եզրակացության հաստատման չեն հանգում, հետևաբար դա իրենից ենթադրում է առնվազն մեղադրանքի հիմնավորվածության խնդիր։ Մեղադրանքն էլ կառուցված է 300-րդ և 314-րդ հոդվածների վրա։ Այսինքն` հոդվածներից մեկն առնվազն համաներման ենթակա հոդված է։ Համաներման օրենքի տիրույթում դիտարկելու դեպքում՝ դրանով պատիժ, որպես այդպիսին, որևէ անձի նկատմամբ չի կարող կիրառվել, հետևաբար ի՞նչ խափանման միջոցի մասին է խոսքը»,-նշեց Արամ Վարդևանյանը։ Վերջինս նկատեց՝ Արա Բաբլոյանի՝ ՀՀ-ից մեկնելու հնարավորություն չունենալը, իր գործունեությունն իրականացնելու նպատակով, հնարավոր է նաև վնաս պատճառի ընդհանուր առողջապահության ոլորտին։

Հիշեցնենք, որ հոկտեմբերի 28-ին ՀՔԾ-ում հարուցված քրեական գործի շրջանակներում մեղադրանք է առաջադրվել ԱԺ նախկին նախագահ Արա Բաբլոյանին՝ Սահմանադրական դատարանի լիազորություններին տիրանալու համար՝ ՀՀ քրեական օրենսգրքի 300-րդ հոդվածի 1-ին մասով և 314-րդ հոդվածի 1-ին մասով։ Վերջինս հայտարարել է՝ պայքարելու է իր բարի համբավը վերականգնելու համար։ Դեկտեմբերի 13-ին հայտարարվեց նախաքննության ավարտի մասին, սակայն դեկտեմբերի 24-ին հայտնին դարձավ, որ դատախազություն չի հաստատել մեղադրական եզրակացությունը ու գործը վերադարձրել նախաքննության։ Ըստ ՀՔԾ պետ Սասուն Խաչատրյանի՝ դատախազը համամիտ չի եղել Արա Բաբլոյանի գործողություններին ՀՔԾ քննիչի տված իրավական գնահատականի հետ:

Հեղինակ՝ Հասմիկ Կոշկարյան

Աղբյուր` Փաստինֆո