Փաստ ինֆո

«Դոլմամա» շենքի տանիքում բռնկված հրդեհի դեպքի առթիվ հարուցվել է քրեական գործ, որով նախաքննությունը կկատարվի ՀՀ քննչական կոմիտեի վարույթում։ ՔԿ դեպարտամենտի տեղեկատվության և հասարակայնության հետ կապերի բաժնի պետի պաշտոնակատար Նաիրա Հարությունյանը «Փաստինֆո»-ին հայտնեց, որ քրեական գործն ստացվել է եւ քննիչն արդեն վարույթ է ընդունել։

Նրա փոխանցմամբ՝ քրեական գործը հարուցվել է ՀՀ քրեական օրենսգրքի 185-րդ հոդվածի 3-րդ մասի 1-ին կետի հատկանիշներով, այն է՝ ուրիշի գույքը դիտավորությամբ ոչնչացնելը կամ վնասելը, որն առանձնապես խոշոր չափերի վնաս է պատճառել։
Հիշեցնենք, որ նոյեմբերի 21-ին ժամը 13:46-ին «911» ծառայություն ահազանգ է ստացվել, որ Երևանի Աբովյան և Պուշկինի փողոցների խաչմերուկում՝ երկհարկանի շինության տանիքում, հրդեհ է բռնկվել: Դեպքի վայր ժամանելով հրշեջները պարզել են, որ խոսքը գնում է «Դոլմամա» ռեստորանի մասին։ Այրվում են տանիքի փայտյա կառուցատարրերը: ԱԻՆ-ը տեղեկացրել էր, որ այրվել է 250 քառակուսի մետր տարածք։ Ժամը 16:08-ին հրդեհը մեկուսացվել է, 17:00-ին՝ մարվել:

Տարածքի բնակիչներից մեկը կարծիք էր հայտնել, որ հրդեհը միտումնավոր է առաջացել. «Եթե հիմա սա որպես պատմամշակութային տարածք վերացավ, պարզ չէ, որ մեծ հեշտությամբ կարող են այս տարածքում նորից շենք կառուցել և կրկին ծախի այդ տարածքները։ Մենք բոլոր բնակիչներով վստահ ենք, որ հրդեհը միտումնավոր է»,-ասել էր բնակիչներից մեկը։

Հարցին՝ ով է կանգնած հրդեհի հետևում, բնակիչն ասաց իրենց տարածքները ձեռք բերողը՝ Սամվել Մայրապետյանը. «Տարածքները վերցրել է Սամվել Մայրապետյանը 10-15 տարի առաջ և բնակիչներիս ասել են, որ այս տարածքում ուզում են հյուրանոց սարքել։ Մենք պայքարեցինք և հեղափոխությունից հետո էլ ասացինք, որ այս տարածքներից չենք դուրս գալու։ Արդեն որերորդ անգամ է, որ մեր տարածքներում միտումն»,-հավելեց բնակիչը։

Հեղինակ՝ Իզաբել Սահակյան

Աղբյուր` Փաստինֆո