Փաստ ինֆո

Մամեդյարովը մի քանի անգամ շեշտեց՝ ադրբեջանական կողմը միշտ դիտարկում է այլընտրանքային լուծում պատերազմի տեսքով, և բանակցությունները կարող են էսկալացիային զուգահեռ գնալ։ «Փաստինֆո»-ի հետ զրույցում այս մասին ասաց ադրբեջանագետ Անժելա Էլիբեգովան՝ անդրադառնալով Էլմար Մամեդյարովի հարցազրույցում հնչեցրած հայտարարություններին։

Նշենք, որ Ադրբեջանի ԱԳ նախարար Էլմար Մամեդյարովը CBC-ին տված հարցազրույցում մի քանի հետաքրքրական հայտարարություններ է արել, դրանցից մեկն էլ ԼՂ հակամարտության լուծման որպես այլընտրանքային տարբերակ պատերազմի վկայակոչումն էր։ Անժելա Էլիբեգովան վաղուց չի հիշում՝ Մամեդյարովը նման բացահայտ կերպով սպառնար։ Սովորաբար դա անում է Իլհամ Ալիևը կամ Պաշտպանության նախարարը, սակայն ադրբեջանագետի խոսքով այս անգամ բավական նյարդային էր արտգործնախարարը և չբացառեց ռազմական լուծումը։

«Նա բացահայտ ակնարկեց, որ նույնիսկ եթե բանակցություններ են ընթանում, չի նշանակում, որ խնդրի լուծման պատերազմական տարբերակը բացառված է։ Մի քանի անգամ ակնարկեց, նաև սպառնալով, որ բանակցություններն ու պատերազմն Ապրիլյանի ժամանակ էլ իրար զուգահեռ են ընթացել և պարտադիր չէ՝ այս անգամ, եթե բանակցային փուլ են մտնում, Ադրբեջանն այդ հնարավորությունից չօգտվի»,-նշեց Էլիբեգովան։

Ադրբեջանի ԱԳ նախարարի հաջորդ հայտարարությունը վերաբերում էր երկու համայնքների շփմանը։ Այս տեսանկյունից ադրբեջանագետն ընդգծեց՝ կարևոր է, որ հայկական կողմը ֆիքսի՝ մեզ համար ինքնին անընդունելի է բուն ձևակերպումը՝ Ղարաբաղի երկու համայնք հասկացողությունը. «Դա բարձրացնում է փաստացի սուբյեկտայնությունը Ղարաբաղի այսպես կոչված ադրբեջանական համայնքի, որը չպետք է մեր փախստականների շահերը ներկայացնող հկ-ների մակարդակից ավելի բարձր լինի։ Նրանք արդեն 1.5 տարի է՝ փորձում են բանակցային սեղանի շուրջ բերել իրենց համայնքը, և այս շփումներն իրենց պետք են նաև դրանց համար։ Հայկական կողմի համար անընդունելի է, որ պաշտոնական Ստեփանակերտը դրվի մեկ մակարդակի վրա իրենց այսպես կոչված համայնքի հետ»,-ասաց Անժելա Էլիբեգովան։

Նա նկատեց՝ Ադրբեջանն անվտանգությունը կապում է խաղաղապահների և իրենց փախստականների անվտանգությունն ապահովելու հետ և կոչ անում հայկական կողմին՝ հստակեցնել ինչ ենք հասկանում Արցախի անվտանգություն ասելով. «Կողմ եմ, որ պաշտոնապես այդ պարզաբանումը տանք, հստակեցնենք և բավականին պարզ դրա մասին խոսենք, քանի որ, ցավոք սրտի, Զոհրաբ Մնացականյանի Բրատիսլավայի ելույթից դուրս մնաց այն թեզը, որ Հայաստանն է Արցախի անվտանգության երաշխավորը և որ Արցախի բնակչությունը կարող է նաև իր ուժերով ինքնապաշտպանվել, բայց այս կոնտեքստում նաև շատ կարևոր է հանրության մեջ, փորձագիտական և պաշտպանական մակարդակով խոսել ռազմավարական փոխօգնության և համագործակցության դաշինքի մասին»,-նշեց Էլիբեգովան, ում կարծիքով եկել է ժամանակը, որ Հայաստանի Հանրապետության և Լեռնային Ղարաբաղի Հանրապետությունը կնքեն այդ ռազմավարական դաշինքը, որպեսզի Ադրբեջանի մոտ այլևս հարցեր չառաջանան՝ ինչ ենք հասկանում մեր անվտանգությունն ապահովելու համար։

Անդրադառնալով Մամեդյարովի այն դիտարկմանը, որ հայկական կողմի հայտարարությունների և գործողությունների 99 տոկոսը զգացմունքայնության ֆոնի վրա են արվում՝ ադրբեջանագետի կարծիքով ԱԳ նախարարը նկատի է ունեցել բանակցային գործընթացին Հայաստանի ներսում հանրության բավականին զգայուն վերաբերմունքը. «Նրանք ուշադիր հետևում են, և ես ուրախ եմ դրա համար։ Շատ լավ է, որ նրանց համար հասկանալի է՝ հասարակության համար ցանկացած ոչ ընդունելի ուղով գնացող պրոցես այստեղ բավականին բուռն և բացասական ռեակցիայի է բերելու, հետևաբար իշխանությունները պետք է ուշադիր և աչալուրջ լինեն հենց հասարակության տրամադրություններին։ Լավ է, որ Մամեդյարովն ինքը ֆիքսեց։ Նշանակում է՝ իրենք հասկանում են, որ բանակցային սեղանի շուրջ այդպես հեշտ չեն կարող ճնշում գործադրել հայկական կողմի վրա, որովհետև հասարակությունը չափազանց ուշադիր է հետևում պրոցեսին և ունենալով պրոցեսից սակավ ինֆորմացվածություն՝ էլ ավելի կենտրոնացված է այդ թեմայի վրա»,-հավելեց Անժելա Էլիբեգովան։

Վերջինս ընդգծեց, որ Ադրբեջանը միշտ դիտարկում է պատերազմի տարբերակը՝ բանակցություններում իր ուզած լուծումը չստանալու դեպքում։ Ինչ վերաբերում է հետագա զարգացումներին, ապա դա պարզ կլինի հունվարին՝ ԱԳ նախարարների հաջորդ հանդիպմանը։

Հեղինակ՝ Հասմիկ Կոշկարյան

Աղբյուր` Փաստինֆո