Փաստ ինֆո

Դատավոր Դավիթ Բալայանի դատարան մուտք գործելուն խոչընդոտելու դեպքի առթիվ քրեական գործի հարուցումը մերժելու մասին քննիչի որոշումը չպատճառաբանված, չհիմնավորված որոշում էր: Այս մասին «Փաստինֆո»-ի հետ զրույցում ասաց փաստաբան Հրանտ Անանյանը՝ հավելելով, որ առնվազն քրեական գործ հարուցելու հիմքեր կային:

Նշենք, որ մայիսի 20-ին դատավոր Դավիթ Բալայանը փորձել է մուտք գործել դատարանի շենք, սակայն վարչապետ Նիկոլ Փաշինյանի հորդորով դատարանի դիմաց հավաքված անձինք թույլ չեն տվել, քաշքշել են՝ արդյունքում դատավորը վայր է ընկել։ Փաստաբանը կատարվածի վերաբերյալ հաղորդում էր ներկայացրել հանցագործության մասին, սակայն ՀՔԾ-ն տվյալ օրվա վերաբերյալ բոլոր ահազանգերը միացրել է մեկ վարույթում ու մերժել քրեական գործի հարուցումը՝ հանցադեպի բացակայության պատճառով։ Այս որոշումը փաստաբան Անանյանը բողոքարկել էր դատախազություն, սակայն դատախազությունը ևս մերժել էր բողոքը, ինչից հետո փաստաբանը դիմել է դատարան։ «Նվազագույն շեմը կար հասկանալու համար, թե քաղաքացիները, որոնք հրում են դատավոր Բալայանին, հասկանու՞մ են, որ նա դատավոր է, ի՞նչ նպատակով են հրում, հրելու արդյունքում է ընկել, թե ոչ և այլ հարցեր, որոնք կարող են միայն քննության ընթացքում պարզվել»,- նշեց Անանյանը:

Ըստ Անանյանի՝ տեսանյութից պարզ երևում է, որ խնդիր կա և նույնիսկ որպես մեղադրյալ ներգրավվելու հիմքեր կան, բայց անհրաժեշտ է հարցաքննություն լինի: «Քննիչը որոշման մեջ գրել էր՝ չգիտեին, որ դատավոր է, հաստատ, թե ոչ, չէին հրում, որ վնաս պատճառեն, այլ՝ ներս չթողնելու համար, հրելուց չի ընկել և այլն »,- ասաց փաստաբանը: Դիտարկմանը, որ կա նաև կարծիք, որ դատավորը սայթաքել և ընկել է՝ Անանյանը պատասխանեց, որ օրենքը սահմանում է, որ անձի կամքին բռնանալը և ֆիզիկական ներգործումը ևս համարվում է բռնություն:

«Պարտադիր չէ, որ բռնությունը լինի հարվածելու եղանակով, իսկ ընկնելն ակնհայտ է, որ գործադրված բռնությունը բավականին իրական էր: Եթե որևէ մեկին հրեն, կարող է սայթաքել և ընկնել և պարտադիր չէ, որ անմիջապես ընկնելուց ընկնի»,- նշեց Անանյանը՝ հավելելով. «Ի՞նչ ենք խրախուսում՝ կարելի է դատավորին հրել Եթե դատավորին կարելի է հրել, ուրեմն կարելի է փաստաբանին էլ հրել,դատախազին էլ՝ հենց դատական նիստի ընթացքում: Մեկ է՝ բռնություն չէ»: Ինչ վերաբերում է հանգամանքին, որ միջադեպը տեղի է ունեցել վարչապետի՝ դատարանների մուտքերն արգելափակելու կոչի հետևանքով, Անանյանը նշեց, որ վարչապետի կոչը վերաբերում էր մուտքերը փակելուն, ոչ թե՝ դատավորին հրելուն: «Ասել էր՝ մուտքը շրջափակել: Իրենք անգամ մուտքը շրջափակելու կոչի սահմաններից են դուրս եկել: Դա էքսցեզ է կոչվում»,- ասաց Անանյանը՝ հավելելով, որ կոչը չի օրինականացնում ոչինչ: Հարցին, թե արդյո՞ք դա ճնշող հանգամանք չի կարող դառնալ դատարանի համար՝ Անանյանը պատասխանեց. «Դատավորի համար բավականին բարդ է լինելու, բայց ունենք այն, ինչ ունենք: Պետք է ճիշտ գնահատական տրվի այս ամեն ինչին:

Ակնկալում ենք արդարացի որոշում»: Անանյանն ընդգծեց, որ քննիչի որոշումը վերածվել էր քաղաքական փաստաթղթի՝ իրավաբանության բացակայությամբ: Նրա խոսքով՝ վկայակոչվել են բոլոր հնարավոր հիմքերը, նույնիսկ այն հիմքերը, որոնք հակասում էին իրար՝ ամեն գնով քրեական գործ չհարուցելու համար:

Հեղինակ՝ Իզաբել Սահակյան

Աղբյուր` Փաստինֆո