Փաստ ինֆո

Մասնավոր հատվածում բազմաթիվ ներդրումային նախաձեռնություններ սկսում են դառնալ իրականություն և վստահ ենք՝ դրանք շարունակվելու են։ Լրագրողների հետ զրույցում այս մասին հայտարարեց Էկոնոմիկայի նախարար Տիգրան Խաչատրյանը։

Հարցին՝ արդյոք ներդրումների ոլորտում առկա ակնկալիքներն ու ստացված արդյունքը տարբերվում են, արդյոք ակնկալիքները բեկվել են, նախարարն արձագանքեց. «Ակնկալիքները չեն բեկվել, դրանք հաստատված են կառավարության ծրագրով։ Մենք արձանագրել ենք, որ 2023 թվականին ունենալու ենք ՀՆԱ-ի նկատմամբ 23-25 տոկոս նվազագույնը ներդրումներ հիմնական միջոցներում։ Դա ունի երկու բաղադրիչ. առաջինը դա պետական ներդրումների բաղադրիչն է, իսկ երկրորդը մասնավոր ներդրումների բաղադրիչը և վստահ ենք, որ դա իրականություն է դառնալու»,-նշեց Տիգրան Խաչատրյանը։

Դիտարկմանը, որ ընդդիմադիրներն ասում են՝ տնտեսական հեղափոխություն չի կարող լինել՝ հաշվի առնելով երկրում առկա տնտեսական վիճակը, Տիգրան Խաչատրյանը նկատեց՝ տնտեսական հեղափոխությունն արդեն տեղի է ունեցել. «Ընդդիմադիրները, ովքեր պնդում են՝ հնարավոր չէ, իրենց թվում է, որ դա մի բան է, որը պետք է տեղի ունենա ապագայում և անտեսում են այն կարևոր փոփոխությունները, որոնք մեր իրականության մի մասն են։ Արհեստական մենաշնորհներ չկան և չեն կարող լինել, կոռուպցիա չկա և չի կարող լինել, հավասար մրցակցային պայմաններում բոլորն ազատ են իրենց գաղափարներն իրագործելու։ Սա այն հեղափոխական փոփոխությունն է, որ մեր տնտեսական կյանքի մի մասն է»,-նշեց նախարարը։

Անդրադառնալով տնտեսական ակտիվության ցուցանիշի՝ Տիգրան Խաչատրյանն ընդգծեց՝ 7.1 տոկոսը լավ է, բայց համաձայն են, որ այն պետք է և կարող է լինել ավելի լավ։ Նախարարի խոսքով տարին կավարտենք 7 տոկոս տնտեսական ակտիվությամբ։

Աղբյուր` Փաստինֆո