Փաստ ինֆո

«Փաշինյանը չհասկացավ, որ այդ հայտարարությամբ վիրավորեց Հռոմի ամբողջ կաթոլիկ եկեղեցուն»,- «Փաստինֆո»-ի հետ զրույցում նման կարծիք հայտնեց ասաց «Ազգային անվտանգություն» կուսակցության նախագահ Գառնիկ Իսագուլյանը՝ անդրադառնալով ՀՀ վարչապետ Նիկոլ Փաշինյանի՝ Միլանի հայկական եկեղեցում արված հայտարարությանը։

«Այսինքն, Հռոմի կաթոլիկ եկեղեցին՝ Հռոմի պապի գլխավորությամբ, զբաղված է պադվալներում հանցագործներ թաքցնելո՞վ եւ ահա Հայաստանից Քրիստոս Նիկոլ Փաշինյանը բռնելո՞ւ է ու հանելու է»,-տարակուսեց Իսագուլյանը։
Հիշեցնենք, Փաշինյանը խոսելով կոռուպցիայի մասին, ասել է, թե Իտալիայում թաքնված են որոշ հայտնի կոռուպցիոներներ, ապա ավելացրել, որ որևէ մեկը թող հույս չունենա, թե «պլստալու» է։ «Հայաստանի արդարադատության ձեռքը հասնելու է նրանց։ Չգիտեմ Վատիկանների որ պադվալում են պահված, վզներից բռնելու ենք հանենք, տանենք կանգնեցնենք դատարանները և գողացված վերջին կոպեկը պետք է վերադարձվի ժողովրդին, բայց մենք քարոզում ենք սեր»,-նշել է վարչապետը։

Նույն ՝ Միլանի հայ համայնքի հետ հանդիպմանը նա իրեն համեմատել էր Քրիստոսի հետ՝ նշելով. «Մենք քարոզում ենք սեր, եկեղեցում ենք մենք գտնվում, ես ինքս, ինչպես մեր Տեր Հիսուս Քրիստոսն էր սեր քարոզում, բայց երբ որ եկավ ժամանակը, նա մտավ տաճարի տարածք և շուռ տվեց սեղանները՝ ասելով, որ այս սրբության տաճարը դուք դարձրել եք առևտրի և դալալության միջավայր: Նույնիսկ Հիսուս Քրիստոսը մտավ տաճար և շուռ տվեց էն սեղանները, որտեղ պղծվում էին սրբությունները»:

Ըստ Իսագուլյանի, իհարկե Վատիկանում, հաշվի առնելով որոշ հանգամանքներ, չեն արձագանքի Փաշինյանին, բայց այդ հայտարարությամբ, փաստորեն Փաշինյանը Վատիկանին տրամադրում է հայկական պետականության ու հայ եկեղեցու դեմ։ «Իրեն հայտարարելով Քրիստոս, ասում է, թե այդ պադվալներից հանցագործներին կհանի ու Հայաստանում կկանգնեցնի դատարանի առջեւ։ Լավ է չասաց՝ դատաստան»,-նշեց Իսագուլյանը՝ շեշտելով, որ սովորական, շարքային մարդն անգամ չի կարող նման հայտարարություն անել, ուր մնաց՝ պետության ղեկավարը։

«Այդ մարդը չի հասկանում թե ինքը ով է, նրան թվում է, որ եթե ինքը ՀՀ վարչապետն է, ինքը Քրիստոսն է, Մովսեսն է, Պապ թագավորն էր... Մենք ի՞նչ անենք, այդ մարդը իրեն զգում է տարբեր մարմինների մեջ, սա վտանգավոր է»,-եզրափակեց Իսագուլյանը։

Նշենք, որ Փաշինյանն ակնարկում էր Սուրբ Աթոռում ՀՀ նախկին դեսպան Միքայել Մինասյանին, ով ի դեպ, արձագանքել է վարչապետի հայտարարությանը՝ Ֆեյսբուքում գրառմամբ։

Միքայել Մինասյանը նշել է. «Վատիկանի նկուղներից մեկում հանգչում է Պետրոս առաքյալի աճյունը։ Սուրբ Պետրոսի գերեզմանն ուխտավայր է, որտեղ հավատավորները՝ Աստվածային հրաշագործության խոնարհ սպասումով աղոթքի են գնում։ Այնտեղ գնալուց առաջ խորհուրդ են տալիս ինքնամաքրվել ու ապաշխարել: Այնտեղ չեն մտնում «պադվալի» աշխարհընկալմամբ»:

Աղբյուր` Փաստինֆո