Փաստ ինֆո

Ձեր նպատակն ի՞նչ է, որ մեզ վարկաբեկե՞ք, խայտառակե՞ք։ Զարմանում եմ էսքան հավաքվել եք, ոնց որ հայ-թուրքական հարցը լինի։ ԱԺ «Բարգավաճ Հայաստան» խմբակցության պատգամավոր Վարդան Ղուկասյանն այսկերպ արձագանքեց լրագրողների հարցերին այն մասին, արդյոք «Իմ քայլը» պատգամավորին սպառնալուց հետո իրավապահ մարմիններն իրեն հրավիրե՞լ են, թե ոչ։

«Ձեր տերերին մի բան եմ ասում, ասեք, որ ինձանից հեռու մնան ես շատ շնորհքով մարդ եմ, հայրենասեր, երկիր սիրող։ Ալիևին էսքան հարց չեք տալիս, ոնց ինձ։ Ուրիշ պատգամավոր էս քաղաքապետարան, կներեք, Ազգային ժողովում չկա՞»։
Լրագրողի դիտարկմանը, թե ո՞վ է իր տերը՝ ՀՀԿ-ն, թե՞ ԲՀԿ-ն, պատգամավորը նկատեց. «Ես միակ մարդկանցից մեկն եմ, որ տերեր չեմ փնտրել մինչև էսօր։ Մի բան էլ ես եմ ուրիշներին տեր լինում»։

Անդրադառնալով «Օազիս» սրճարանում կրակոցներին, «Դուետ» սրճարանում տեղի ունեցած սպանությանը նա ասաց. ««Օազիս» սրճարանում, որ նմանատիպ բան եք ասում, դուք ձեր լրատվական կառույցները նմանատիպ զրպարտանք ներկայացնելով դուք տարածեցիք, խայծը գցում եք հետո պարզում եք, չեք պարզում և ոչ մի նմանատիպ իմ կողմից ոչ մի բանի մեջ ներկա չեմ եղել, ոչ մի քրեական գործ ինձ հետ կապված չի առաջացել։ Երբ «Դուետ» սրճարանի վերաբերյալ եք ասում, «Դուետ» սրճարանի հորեղբոր տղան իմ փեսան է, դրանից հետո ինչպես կարող է նմանատիպ բան լինի։ Ամբողջ ընտանիքն իմ հարազատությունն է։ Ինչքա՞ն կարելի է սուտ բաներ ասել։ Որ ձեզ դատի չեմ տալիս, դուք էսպես ամեն ինչ պետք է մեզ քցե՞ք»,-նշեց պատգամավորը։

Դիտարկմանը, որ ԱԺ ամբիոնից վարչապետն է խոսել պատգամավորին սպառնալու դեպքի վերաբերյալ, Վարդան Ղուկասյանն ասաց. «Ես պաշտոն հարգող մարդ եմ, ՀՀ թագավոր, վարչապետ և կաթողիկոս հարգում եմ և կոռեկտության մեջ եմ ինձ պահում։ Ասել է , միգուցե հետագայում զգա, որ սխալվել է, ոչինչ։ Ես իրեն լավն եմ ցանկանում, ամենաբարիքները։ ՀՀ նախագահին ևս ուժ, կարողություն, հզորություն և կաթողիկոսին, որ կարողանան մեր երկիրը հասցնել կառամատույց»։

Վարդան Ղուկասյանը նկատեց, որ իրավապահներն իրենց շատ են ստուգել և խիստ են եղել նրանց նկատմամբ և որ ինքն արտոնյալ պայմաններում չի եղել մինչ այսօր։

«Մինչև քաղաքապետ դառնալը՝ ես եկեղեցիներ եմ կառուցել, ողորմած եմ եղել, մարդկանց տեր եմ եղել, հասնող եմ եղել։ Ես անում եմ, որ հոգիս հանգիստ լինի, որ երբ հոգիս ավանդեցի պետք է հարցնեն, որ էսքան բանը կառուցեցիր բա Աստծո տունը փլված էր, ինչու չկառուցեցիր։ Ես մի եկեղեցի չեմ կառուցել։ Գնացեք մտեք ՀՀ բոլոր եկեղեցիները, կտեսնեք իմ մոմակալներն ամեն մեկը 500-ից 1000 դոլար են»,-նշեց պատգամավորը։

Լրագրողի դիտարկմանը, որ ավելի շատ մեղքերի թողության համար են նման քայլերի դիմում, պատգամավորն արձագանքեց. «Ուզում ես ասած լինես, որ շատ մեղք եմ գործե՞լ։ Այո, շատ մեղք եմ գործել։ Երբ որ Գրիգոր Նարեկացին ասում էր, եթե իմ մեղքերը դնես կշեռքի մի նժարին, իսկ Արարատ լեռը մյուս նժարին, իմ մեղքերը կգերազանցեն Արարատ լեռին։ Եթե նրանք մեղավոր են, բա ես ո՞վ եմ, որ ասեմ մեղավոր չեմ»։

Հարցին՝ հնարավոր է առաջադրվի Գյումրու քաղաքապետի պաշտոնում, Վարդան Ղուկասյանն ասաց. «Այ էս ասեք, որ հարձակվում եք իմ վրա։ Վախենում եք, որ ես դնեմ Գյումրու քաղաքապետի իմ թեկնածությունն ու անցնեմ, որովհետև սոցհարցում եք անում էս հարյուր տարի է, գիտեք, որ իմ ռեյտինգը չի պակասում, ինչքան դնում եմ, անցնում եմ, դրա համար էլ էսպես հարձակվում եք։ Չեմ դնելու, բայց ժողովուրդն իհարկե ամեն րոպե ասում է ՝ինչու եք մեզ անտեր թողել»,-նշեց նա։

Հարցին՝ հնարավոր է մասնակցի «Վերնատուն» ակումբի հաջորդ համաժողովին, Վարդան Ղուկասյանը նկատեց. «Թիֆլիսի՞ Վերնատան։ Չգիտեմ, տեղյակ չեմ, չեմ կարող ասել»։

Աղբյուր` Փաստինֆո